ເຄີຍໄດ້ຍິນແຕ່ຢູ່ຕ່າງປະເທດວ່າ ການໄປເລາະຊື້ເຄື່ອງບໍ່ຈຳເປັນຕ້ອງພົກພາເງິນສົດໄປ ພຽງມີໂທລະສັບສະມາດໂຟນທີ່ໃຊ້ອິນເຕີເນັດ ແລ້ວໃຊ້ແອັບພລິເຄຣຊັ່ນສະແກນບາໂຄດ ກໍເປັນອັນວ່າລະບົບທະນາຄານຫາກຈ່າຍເງິນໃຫ້ເອງ. ແລະມັນກໍເປັນຄວາມຝັນຂອງບັນດາ ຮ້ານຄ້ານ້ອຍໃຫຍ່ແລະກາງທັງຫຼາຍ ກໍຄືນັກຊັອບປິງທັງຫຼາຍ ທີ່ຄິດຢາກໃຫ້ມີລະບົບນັ້ນມາໃຊ້ຄືກັນ. ມາຮອດມື້ນີ້ຄວາມຝັນນັ້ນເກີດຂຶ້ນແລ້ວຢູ່ປະເທດລາວ ເມື່ອຮ້ານຈີ່ໝາກກ້ວຍກໍໄດ້ໃຊ້ຄວາມທັນສະໄໝນັ້ນແລ້ວ.
ທະນາຄານການຄ້າຕ່າງປະເທດລາວໄດ້ເພິ່ມຟັງຊັ່ນໜຶ່ງເຂົ້າໃນແອັບພລິເຄຣຊັ່ນ BCEL One ນັ້ນກໍຄື OnePay ເພື່ອໃຊ້ສຳລັບຈ່າຍຄ່າສິນຄ້າໂດຍການສະແກນ QR Code ຂອງສິນຄ້າແລ້ວລະບົບກໍຈະຕັດເງິນຢູ່ບັນຊີທະນາຄານເລີຍ ເຊິ່ງຜະລິດຕະພັນນີ້ເໝາະສຳລັບທຸລະກິດຫ້າງຮ້ານຂະຫນາດນ້ອຍ ແລະ ກາງ. ຈ່າຍງ່າຍສະດວກສະບາຍບໍ່ຈຳເປັນຕ້ອງພົກພາເງິນສົດໃຫ້ຫຍຸ້ງຍາກ, ຜູ້ຂາຍກະບໍ່ຕ້ອງຊອກຫາເງິນທອນໃຫ້ລໍາບາກ, ມີຄວາມປອດໄພໝັ້ນໃຈໄດ້. ນອກນັ້ນ, ຍັງຊ່ວຍຫລຸດຜ່ອນຄວາມສ່ຽງຖືກເງິນປອມ ແລະ ຄຸນນະປະໂຫຍດອື່ນໆອີກຫລວງຫລາຍ.
ນີ້ເປັນບາດກ້າວທີ່ສຳຄັນຂອງວົງການໄອທີລາວ ກໍຄືລະບົບການເງິນການທະນາຄານຂອງລາວ ທີ່ມີຄວາມກ້າວໜ້າທັນສະໄໝຂຶ້ນຢ່າງບໍ່ຢູດຢັ້ງ.
ແຫຼ່ງຂ່າວ: ສາວລາວ ອອນລາຍ