ສະພາບການສັນຈອນໃນປະເທດເຮົານັບມື້ແອອັດ ໂດຍສະເພາະແມ່ນຢູ່ໃນບັນດາຕົວເມືອງ ເປັນຕົ້ນແມ່ນຢູ່ນະຄອນຫຼວງວຽງຈັນ. ຄຽງຄູ່ກັນນັ້ນ ສະພາບການເກີດອຸບັດເຫດກໍນັບມື້ຫຼາຍຂຶ້ນເຊັ່ນກັນ ດັ່ງທີ່ມີການລາຍງານຈາກເຈົ້າໜ້າທີ່ທີ່ກ່ຽວຂ້ອງວ່າ ສະເພາະເດືອນຕຸລາ 2017 ທົ່ວປະເທດມີອຸບັດຕິເຫດຕາມທ້ອງຖະໜົນ 400 ກວ່າຄັ້ງ, ຄົນໄດ້ຮັບບາດເຈັບທັງໝົດ 770 ຄົນ, ລົດເປ່ເພທັງໝົດ 875 ຄັນ ແລະ ຄົນເສຍຊີວິດ 76 ຄົນ, ໃນນີ້ ນະຄອນຫຼວງວຽງຈັນ ເສຍຊີວິດ 14 ຄົນ.

ສາເຫດການເກີດອຸບັດເຫດມີຫຼາຍສາເຫດ ເປັນຕົ້ນແມ່ນຂັບຂີ່ລົດແບບບໍ່ປະຕິບັດຕາມກົດຈະລາຈອນຢ່າງເຄັ່ງຄັດ, ດື່ມສິ່ງມືນເມົາແລ້ວຂັບລົດ, ສະພາບເຕັກນິກລົດບໍ່ຮັບປະກັນ ແລະສະພາບເສັ້ນທາງຫຼາຍບ່ອນບໍ່ດີ ອາດຈະເປ່ເພ ຫຼືຜ່ານເສັ້ນທາງທີ່ສູງຊັນ.

ແນວໃດກໍດີ, ຕາມການສັງເກດຂອງນັກຂ່າວພວກເຮົາ ຍັງເຫັນອີກ 2 ຢ່າງ ທີ່ອາດຈະເປັນສາເຫດ ຂອງການເກີດອຸບັດເຫດຕາມທ້ອງຖະໜົນ:
1. ເສັ້ນທາງບໍ່ມີລາຍທາງ: ເຮົາຍັງສັງເກດເຫັນວ່າມີຫຼາຍເສັ້ນທາງທີ່ສວຍງາມ ໃນນະຄອນຫຼວງວຽງຈັນ ກໍຄືເສັ້ນທາງເລກທີ 13 ໃຕ້, 13 ເໜືອ ແລະອື່ນໆ ຍັງມີຫຼາຍຍ່ານ ມີຄວາມຍາວຫຼາຍກິໂລແມັດ ບໍ່ມີລາຍທາງ ເຮັດໃຫ້ການແລ່ນລົດຂອງນັກຂັບຂີ່ມີຄວາມຫຍຸ້ງຍາກ ໂດຍສະເພາະແມ່ນໃນເຂດທີ່ທາງແຄບ ຫຼືເປັນເວລາກາງຄືນ.
2. ໄຕ້ຕາສູງໃສ່ກັນ: ຖ້າທ່ານຜູ້ອ່ານເຄີຍຂັບລົດໃນເວລາກາງຄືນ ຕາມເສັ້ນທາງເລກທີ 13 ໃຕ້ ທ່ານມັກຈະພົບກັບລົດທີ່ໄຕ້ຕາສູງ ໂດຍສະເພາະແມ່ນລົດເມ ມັກຈະມີການແຕ່ງຕາສູງໃສ່ຕື່ມອີກ ເພື່ອໄວ້ເຍືອງຕອບໂຕ້ໃສ່ລົດຄັນອື່ນທີ່ສວນທາງມາ. ການເຮັດຄືດັ່ງກ່າວນັ້ນ ຈະເຮັດໃຫ້ທັດສະນະວິໄສໃນການເບິ່ງເຫັນເສັ້ນທາງຫຼຸດລົງຫຼືຈົນບໍ່ເຫັນທາງເລີຍກໍມີ ປະກອບໃສ່ເສັ້ນທາງບໍ່ມີລາຍຈຶ່ງບໍ່ຮູ້ເຂດເສັ້ນແບ່ງກາງທາງຢູ່ຈຸດໃດ.
ສອງບັນຫາທີ່ຍົກມານີ້ ອາດຈະເປັນສາເຫດຕົ້ນຕໍໜຶ່ງ ທີ່ເຮັດໃຫ້ລົດມັກເກດອຸບັດເຫດຮ້າຍແຮງຕາມທ້ອງຖະໜົນ ເຊິ່ງແນ່ນອນວ່າພາກສ່ວນໂຍທາທິການແລະຂົນສົ່ງ ຄວນຈະຕ້ອງໄດ້ພິຈາລະນາແລະຫາວິທີແກ້ໄຂຕື່ມ.