ໃນວາລະດໍາເນີນກອງປະຊຸມ ສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ VIII ວັນທີ 6 ພະຈິກ 2017 ພາຍໃຕ້ການເປັນປະທານຂອງ ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ, ບັນດາສະມາຊິກ ສະພາແແຫ່ງຊາດ ໄດ້ພ້ອມກັນສຸມໃສ່ພິຈາລະນາ, ປະກອບຄຳຄິດຄຳເຫັນ ໃສ່ຮ່າງກົດໝາຍວ່າດ້ວຍ ການຄຸ້ມຄອງໜີ້ສິນສາທາລະນະ (ກົດໝາຍສ້າງໃໝ່) ທີ່ສະເໜີ ໂດຍ ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ເຊິ່ງຮ່າງກົດໝາຍດັ່ງກ່າວ ປະກອບມີ XIV ພາກ 4 ໝວດ 70 ມາດຕາ.
ໃນກອງປະຊຸມ, ທ່ານ ປະທານກອງປະຊຸມ ໄດ້ສັງລວມການປະກອບ ຄຳຄິດຄຳເຫັນຂອງ ບັນດາ ສສຊ ໄດ້ສຸມໃສ່ ປະກອບຄຳຄິດຄຳເຫັນ ໃສ່ຫລາຍບັນຫາສຳຄັນ ເປັນຕົ້ນດ້ານໂຄງສ້າງ ເຊິ່ງສາມາດເອົາ ບາງພາກໂຮມເຂົ້າກັນໄດ້ ແຕ່ຈະເພີ່ມບາງໝວດຂຶ້ນ ເພື່ອເຮັດໃຫ້ໂຄງສ້າງ ຈະແຈ້ງຂຶ້ນກວ່າເກົ່າ ແລະ ມີລັກສະນະຕໍ່ເນື່ອງ, ການອະທິບາຍ ຄໍາສັບໃຫ້ຈະແຈ້ງ, ນະໂຍບາຍກ່ຽວກັບ ການຄຸ້ມຄອງໜີ້ສາທາລະນະ ຄວນກຳນົດຢ່າງຈະແຈ້ງ, ທີ່ມາຂອງການກູ້ຢືມເງິນ, ນະໂຍບາຍ ແລະ ຫລັກການພື້ນຖານແມ່ນເຫັນດີປັບປຸງ ໃຫ້ຈະແຈ້ງຂຶ້ນກວ່າເກົ່າ, ການນິຍາມໜີ້ສິນສາທາລະນະ ສສຊ ຢາກໃຫ້ແຍກຊື່ໜີ້ສາທາລະນະເປັນ 2 ມາດຕາ, ການກຳນົດເປົ້າໝາຍ ການຄໍ້າປະກັນໃຫ້ມີເປົ້າໝາຍ ແລະ ມີບູລິມະສິດ, ການຈຳກັດໜີ້ສິນສາທາລະນະ ໃຫ້ມີການຮັດກຸມ, ການຄໍ້າປະກັນ ຂອງລັດຖະບານ, ຄວາມຮັບຜິດຊອບໃນການຊຳລະ ໜີ້ສິນສາທາລະນະ ແລະ ບັນຫາສຳຄັນອື່ນໆ.
ຈາກນັ້ນ, ກອງປະຊຸມໄດ້ສະເໜີ ໃຫ້ອະນຸກໍາມະການ ເນື້ອໃນກົດໝາຍ ນໍາເອົາຄໍາຄິດຄຳເຫັນຂອງ ສສຊ ໄປພິຈາລະນາ ແລະ ປັບປຸງໃສ່ກົດໝາຍດັ່ງກ່າວ ໃຫ້ເໝາະສົມ, ຄົບຖ້ວນສົມບູນທັງສອດຄ່ອງກັບ ສະພາບຄວາມເປັນຈິງ ໃນປັດຈຸບັນ ເພື່ອກະກຽມນຳມາສະເໜີ ໃນກອງປະຊຸມ ສະພາແຫ່ງຊາດໃນຊຸດຕໍ່ໄປ.
ຂ່າວຈາກ: ຈັນທະລອນ
ພາບປະກອບຈາກ: ອ່າຍຄຳ
ແຫລ່ງຂ່າວ: ສຳນັກຂ່າວສານປະເທດລາວ