ເມື່ອວັນທີ 2 ພະຈິກ ເອເອຟພີລາຍງານວ່າ ທ່ານ ນາງ ອອງຊານຊູຈີ ທີ່ປຶກສາແຫ່ງລັດ ແລະ ລັດຖະມົນຕີກະຊວງການຕ່າງປະເທດຂອງມຽນມາ ເດີນທາງລົງພື້ນທີ່ສຳຫຼວດສະພາບເຫດການໃນລັດຍະໄຂ່ເປັນຄັ້ງທຳອິດ ໂດຍບໍ່ໄດ້ແຈ້ງລ່ວງໜ້າ ທ່ານ ນາງ ອອງຊານ ຊູຈີ ໄດ້ເຂົ້າພົບປະຊາຊົນທັງຊາວພຸດ ແລະ ຊາວມຸສລິມ ແຕ່ລາຍງານບໍ່ໄດ້ລະບຸວ່າຮວມທັງຊາວໂຣຮິນຢາ ຫຼື ບໍ່ ຂະນະທີ່ບີບີຊີລາຍງານວ່າ ການລົງພື້ນທີ່ໃນເທື່ອນີ້ບໍ່ມີການເວົ້າເຖິງຜູ້ອົບພະຍົບນອກປະເທດ.
ທ່ານ ເຊີ ເຕ ໂຄສົກລັດຖະບານມຽນມາ ກ່າວວ່າ ທ່ານ ນາງ ຊູຈີ ເດີນທາງໄປທີ່ນະຄອນຊິດຕະເວ ເມືອງເອກຂອງລັດຍະໄຂ່ ແລະ ເດີນທາງຕໍ່ໄປທີ່ໝ່ອງດໍ ແລະ ພຸດທິດວງ.
ລາຍງານລະບຸວ່າ ຊາວໂຣຮິນຢາບາງສ່ວນທີ່ອາໄສໃນເມືອງ ໝ່ອງດໍ ກ່າວຮຽກຮ້ອງເຖິງທ່ານ ນາງ ອອງຊານຊູຈີ ຜ່ານຜູ້ສື່ຂ່າວວ່າ ຂໍໃຫ້ທົບທວນເລື່ອງການອອກບັດກວດສອບສັນຊາດ ຫຼື ເອັນວິຊີໃໝ່ອີກຄັ້ງ.