ເວັບໄຊອາເທຣີຂອງຣັດເຊຍເຜີຍຄລິບວີດີໂອທີ່ບໍລິສັດຜູ້ຜະລິດອຸປະກອນແຫ່ງໜຶ່ງໃນຣັດເຊຍ ທົດສອບຄວາມແຂງແຮງຂອງຊຸດໃນແບບສະບັບ ຣັດເຊຍ ໂດຍການໃຫ້ນາງແບບສາວທີ່ຊື່ວ່າ ວິກຕໍເຣຍ ໂຄເລສນິກໂຄວາ ໃສ່ຊຸດເກາະ ແລ້ວຍ່າງຜ່ານສະໜາມຮົບຈຳລອງທີ່ເຕັມໄປດ້ວຍ ແປວໄຟ ແລະ ລະເບີດ ໂດຍບໍ່ມີທ່າທີສະແດງຄວາມຕົກໃຈແຕ່ຢ່າງໃດ ພາຍຫລັງ ສິ້ນສຸດການທົດສອບແລ້ວນາງປົດໝວກອອກມາພົບພຽງຮອຍເປື້ອນທີ່ໃບໜ້າພຽງເລັກນ້ອຍເທົ່ານັ້ນ
ຫົວຫນ້າທີມພັດທະນາຊຸດ ກ່າວຕີ່ມອີກວ່າ ຊຸດທີ່ນາງແບບໃສ່ນີ້ ເຮັດມາຈາກຜ້າ ອາຣາມິດ (Aramid) ເຊິ່ງເຮັດມາຈາກເສັ້ນໄຍສັງເຄາະທີ່ມີຄວາມແຂງແຮງ ມີຄຸນສົມບັດທົນຕໍ່ຄວາມຮ້ອນສູງ ແລະ ແຮງອັດກະແທກໄດ້ເປັນຢ່າງດີ ທີມຜູ້ອອກ ແບບຊຸດດັ່ງກ່າວເຜີຍວ່າ ວັດຖຸດິບຂອງຊຸດນີ້ສາມາດປ້ອງກັນລູກປືນ ແລະ ເສດສິ້ນສ່ວນລະເບີດໄດ້ ແຕ່ພວກເຂົາຍັງຢູ່ໃນຂັ້ນຕອນພັດທະນາ ໃຫ້ສາມາດທົນຄວາມຮ້ອນຈາກໄຟໃຫ້ດົນຂຶ້ນຕື່ມ ໂດຍທາງບໍລິສັດຄາດວ່າຊຸດດັ່ງກ່າວຈະສາມາດຜະລິດເພື່ອຈຳໜ່າຍໄດ້ ພາຍໃນ ປີ 2020 ສຳລັບໃຊ້ໃນພາລະກິດທາງການທະຫານ