ວັນທີ 26 ຕຸລາ 2017, ທ່ານ ບຸນຍັງ ວໍລະຈິດ ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ພ້ອມດ້ວຍພັນລະຍາ ແລະ ຄະນະ ໄດ້ເດີນທາງເຂົ້າຮ່ວມ ພິທີຖວາຍພະເພີງ ພະບໍລົມມະສົບ ພະບາດສົມເດັດ ພະປະຣະມິນທະຣະ ມະຫາພູມິພົນອະດຸນຍະເດດ ບໍຣົມນາດບໍພິດ, ຣັດຊະການທີ 9 ແຫ່ງ ຣາຊະອານາຈັກໄທ ທີ່ ບາງກອກ ໂດຍມີການເຂົ້າຮ່ວມ ຂອງກະສັດ ແລະ ການນຳຂັ້ນສູງ ຈາກບັນດາປະເທດຕ່າງໆໃນໂລກ, ທູຕານຸທູດຕ່າງປະເທດ ປະຈຳຣາຊະອານາຈັກໄທ ແລະ ອື່ນໆ. ໃນພິທີຖວາຍພະເພີງຄັ້ງນີ້, ສົມເດັດພະເຈົ້າຢູ່ຫົວ ມະຫາວະຊິຣາລົງກອນ ບໍດິນທະຣະເທບ ພະຍະວະຣາງກຸນ (ຣັດຊະການທີ 10), ສົມເດັດພະນາງເຈົ້າສິຣິກິດ ພະບໍຣົມຣາຊິນີນາດ ໃນຣັດຊະການທີ 9, ສົມເດັດພະເທບ ພະຣັດຣາຊະສຸດາ ສະຫຍາມບໍຣົມຣາຊະກຸມາຣີ ແລະ ພະບໍຣົມວົງສານຸວົງທຸກພະອົງ; ເຈົ້າໜ້າທີ່ຂັ້ນສູງ, ທະຫານ, ຕໍາຫລວດ ແລະ ປວງຊົນຊາວໄທ ໄດ້ເຂົ້າຮ່ວມ ເພື່ອສະແດງຄວາມເຄົາລົບ ແລະ ໄຫ້ວອາໄລ ຕໍ່ ພະບາດສົມເດັດ ພະປະຣະມິນທະຣະ ມະຫາພູມິພົນອະດຸນຍະເດດ ບໍຣົມນາດບໍພິດແຫ່ງ ຣາຊະອານາຈັກ ໄທ.
ພະບາດສົມເດັດ ພະປະຣະມິນທະຣະ ມະຫາພູມິພົນອະດຸນຍະເດດ ບໍຣົມນາດບໍພິດ ປະສູດເມື່ອວັນທີ 05 ທັນວາ 1927 ເປັນໂອຣົດໃນ ສົມເດັດພະມະຫິຕະລາທິເບດ ອະດຸນຍະເດັດວິກົມ ພະບໍຣົມຣາຊະນົກ ແລະ ສົມເດັດພະສີນະຄະຣິນທະຣາ ບໍຣົມຣາຊະຊົນນະນີ. ພະບາດສົມເດັດ ພະປະຣະມິນທະຣະ ມະຫາພູມິພົນອະດຸນຍະເດດ ບໍຣົມນາດບໍພິດ ອະພິເສກສົມຣົດກັບ ສົມເດັດພະນາງ ເຈົ້າສິຣິກິດ ພະບໍຣົມຣາຊິນີນາດ ໃນວັນທີ 05 ພຶດສະພາ 1950 ມີຣາຊະບຸດ 4 ພະອົງ ໄດ້ແກ່ ທຸນກະຫມ່ອມຍິງ ອຸບົນຣັດຣາຊະກັນຍາ ສິຣິວັດທະນາພັນນະວະດີ, ສົມເດັດພະເຈົ້າຢູ່ຫົວ ມະຫາວະຊິຣາລົງກອນ ບໍດິນທະຣະເທບພະຍະວະຣາງກຸນ, ສົມເດັດພະເທບ ພະຣັດຣາຊະສຸດາ ສະຫຍາມບໍຣົມຣາຊະກຸມາຣີ ແລະ ສົມເດັດພະເຈົ້າລູກເທີ ເຈົ້າຟ້າຈຸລາພອນວະໄລລັກ ອັກຄະຣາຊະກຸມາຣີ.
ພະບາດສົມເດັດ ພະປະຣະມິນທະຣະ ມະຫາພູມິພົນອະດຸນຍະເດດ ບໍຣົມນາດບໍພິດ ຂຶ້ນຄອງຣາດໃນວັນທີ 09 ມິຖຸນາ 1946 ແລະ ເປັນພະມະຫາກະສັດຣັດຊະການທີ 9 ໃນຣາຊະວົງຈັກ ກຣີ ແລະ ຊິ້ນພະຊົນ ໃນວັນທີ 13 ຕຸລາ 2016. ພະອົງເປັນພະຣາຊາ ທີ່ມີນໍ້າໃຈເສຍສະຫລະ ອັນສູງສົ່ງ ແລະ ມີຄຸນງາມຄວາມດີອັນໃຫຍ່ຫລວງ ໃນການອຸທິດໃຫ້ແກ່ປະເທດຊາດ ແລະ ປວງຊົນຊາວໄທ ຕະຫລອດ 70 ປີ ຂອງການຄອງລາດ ອັນໄດ້ເຮັດໃຫ້ພະອົງ ເປັນທີ່ເຄົາລົບຮັກ ຂອງປວງຊົນຊາວໄທ ທຸກຖ້ວນໜ້າ ແລະ ຖືເປັນກະສັດທີ່ມີອາຍຸຄອງລາດ ຍາວນານທີ່ສຸດໃນໂລກ. ພ້ອມນີ້, ພະບາດສົມເດັດ ພະປະຣະມິນທະຣະມະຫາພູມິພົນ ອະດຸນຍະເດດ ບໍຣົມນາດບໍພິດ ກໍ່ໄດ້ມີບົດບາດສຳຄັນໃນການປັບປຸງ ແລະ ຮັດແໜ້ນສາຍພົວພັນ ມິດຕະພາບ ແລະ ການຮ່ວມມື ລະຫວ່າງ ສາທາລະນະລັດ ປະຊາທິປະ ໄຕ ປະຊາຊົນລາວ ແລະ ຣາຊະອານາຈັກໄທ ຕະຫລອດມາ. ການສະເດັດຢ້ຽມຢາມ ສປປ ລາວ ແລະ ເຂົ້າຮ່ວມໃນ ພິທີເປີດການນຳໃຊ້ ຂົວມິດຕະພາບແມ່ນໍ້າຂອງ ລາວ-ໄທ ແຫ່ງທີ່ 1 ນະຄອນຫລວງວຽງຈັນ-ໜອງຄາຍ ໃນເດືອນ ເມສາ 1994 ແລະ ໂດຍສະເພາະ ໂຄງການພະຣາຊະດຳຣິຂອງພະອົງຢູ່ ສປປ ລາວ: ໂຄງການພັດທະນາ ດ້ານການກະເສດ ຫ້ວຍຊອນ-ຫ້ວຍຊົ້ວ (ຫລັກ 22) ໄດ້ກາຍເປັນສັນຍາລັກ ແຫ່ງໄມຕີຈິດ, ມິດຕະພາບ ຖານບ້ານພີ່ເມືອງນ້ອງ, ບ້ານແກ່ວເມືອງດອງ.
ສຳລັບ ສປປ ລາວ ການຈາກໄປຂອງພະອົງ ເປັນການສູນເສຍເພື່ອນມິດ ທີ່ມີຄຸນຄວາມດີຢ່າງໃຫຍ່ຫລວງ ໃນການປະກອບສ່ວນອັນສຳຄັນ ເຂົ້າໃນການເສີມສ້າງ ແລະ ຮັດແໜ້ນສາຍພົວພັນມິດ ຕະພາບ ອັນດີງາມ ລະຫວ່າງ ສອງປະເທດ ກໍຄື ປະຊາຊົນສອງຊາດ ລາວ-ໄທ. ການເຂົ້າຮ່ວມໃນພິທີຖວາຍພະເພີງ ພະບໍຣົມມະສົບ ພະບາດສົມເດັດ ພະປະຣະມິນທະຣະ ມະຫາພູມິພົນອະດຸນຍະເດດ ບໍຣົມນາດບໍພິດ ໃນຄັ້ງນີ້ ເປັນການສະແດງ ຄວາມໄຫວ້ອາໄລຮັກ ພ້ອມທັງ ເປັນການລະນຶກເຖິງຜົນງານ ແລະ ຄຸນງາມຄວາມດີອັນໃຫຍ່ຫລວງ ທີ່ ພະອົງໄດ້ເສຍສະຫລະ ແລະ ອຸທິດຕໍ່ປະເທດຊາດ ແລະ ປວງຊົນຊາວໄທ ກໍຄື ການປະກອບເຂົ້າໃນ ການພັດທະນາ ແລະ ເສີມຂະຫຍາຍສາຍພົວພັນ ມິດຕະພາບ ແລະ ການຮ່ວມມືອັນດີງາມ ລະຫວ່າງ ລາວ-ໄທ ທີ່ນັບມື້ນັບໄດ້ຮັບ ການພັດທະນາຍິ່ງຂຶ້ນ.
ຕິດຕາມ ທ່ານ ບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ ພ້ອມພັນລະຍາ ເຂົ້າຮ່ວມໃນພິທີ ຖວາຍພະເພີງໃນຄັ້ງນີ້ ມີ ທ່ານ ສະເຫລີມໄຊ ກົມມະສິດ ລັດຖະມົນຕີ ກະຊວງການຕ່າງ ປະເທດ ແລະ ເຈົ້າໜ້າທີ່ຂັ້ນສູງ ທີ່ກ່ຽວຂ້ອງຂອງລາວ ຈຳນວນໜຶ່ງ.
ແຫລ່ງຂ່າວ: ສຳນັກຂ່າວສານປະເທດລາວ