ສຳນັກຂ່າວຕ່າງປະເທດລາຍງານຈາກນະຄອນຫຼວງ ເນປິດໍ ປະເທດມຽນມາ ເມື່ອວັນທີ 23 ຕຸລາ 2017ວ່າ ມີປະຊາຊົນຫຼາຍຮ້ອຍຄົນເດີນຂະບວນໄປຕາມທ້ອງຖະໜົນໃນເມືອງ ຊິດເວ ເມືອງເອກຂອງລັດຍະໄຂ່ ເມື່ອອາທິດທີ່ຜ່ານມາ ເພື່ອສະແດງຈຸດຢືນຄັດຄ້ານການຮັບຜູ້ລີ້ໄພຊາວໂຣຮິນຢາກັບປະເທດ ຫຼັງຈາກລັດຖະບານຂອງທ່ານ ນາງ ອອງ ຊານ ຊູຈີ ເຈລະຈາຮ່ວມມືກັບບັງກາລາເທດເມື່ອຕົ້ນເດືອນນີ້ ແລະ ມີການເຫັນດີແຕ່ງຕັ້ງຄະນະທຳງານຮ່ວມກັນໃນເລື່ອງນີ້

ນອກຈາກນີ້ໃນມື້ດຽວກັນມີລາຍງານວ່າຊາວມຽນມາຈຳນວນຫຼາຍຊຸມນຸມກັນໃນນະຄອນຫຼວງເນປິດໍ ເພື່ອໃຫ້ກຳລັງໃຈ ແລະ ສະແດງຄວາມສະໜັບສະໜູນລັດຖະບານ ໃນການແກເໄຂບັນຫາຄວາມໝັ້ນຄົງໃນລັດຍະໄຂ່ ແລະ ວິກິດ ການດ້ານສິດທິມະນຸດຂອງຊາວໂຣຮິນຢາອີກດ້ວຍ ຫຼັງຈາກທີ່ລັດຖະມົນຕີກະຊວງການຕ່າງປະເທດຂອງອິນເດຍກ່າວວ່າລັດຖະບານຂອງມຽນມາ “ຕ້ອງ” ຮັບຜູ້ລີ້ໄພຊາວໂຣຮິນຢາຈາກບັງກາລາເທດທັງໝົດ ກັບຄືນ ທີ່ສະຫະປະຊາຊາດລາຍງານວ່າປັດຈຸບັນເພີ່ມເປັນ 600,000 ຄົນແລ້ວ ນັບຕັ້ງແຕ່ມີການຕໍ່ສູ້ໃນລັດຍະໄຂ່ເມື່ອວັນທີ 25 ສິງຫາ 2017 ທີ່ຜ່ານມາ.