ລົດເມສີຂຽວສາຍຕະຫຼາດເຊົ້າ-ດົງໂດກ ຕໍາລົດຈັກ ແລະ ຢຽບຜູ້ຂັບຂີ່ເສຍຊີວິດຄາທີ່ ຢູ່ຖະໜົນໂພນຕ້ອງ-ດົງໂດກ ເຂດບ້ານຄໍາຮຸ່ງ ເມືອງໄຊທານີ ນະຄອນຫຼວງວຽງຈັນ ເກີດຈາກຜູ້ຂັບຂີ່ລົດຈັກປ່ຽນຊ່ອງທາງການສັນຈອນເພື່ອຫຼົບຫຼີກລົດຈອດຢູ່ຂ້າງທາງກະທັນຫັນ, ເຊິ່ງເຫດການດັ່ງກ່າວເກີດຂຶ້ນໃນເວລາປະມານ 13:00 ໂມງ ຂອງວັນທີ 12 ຕຸລາ 2017.
ເຈົ້າໜ້າທີ່ຕໍາຫຼວດຈະລາຈອນ ປກສ ນະຄອນຫຼວງວຽງຈັນ ໃຫ້ຮູ້ວ່າ: ນາງ ມະລີ ອາຍຸ 15 ປີ, ນັກຮຽນບ້ານດົງຄໍາຊ້າງ ເມືອງຫາດຊາຍຟອງນະຄອນຫຼວງວຽງຈັນ ຂັບຂີ່ລົດຈັກຮອນດາຄຼີກໄອ ບໍ່ມີໝາຍເລກທະບຽນ ພ້ອມໝູ່ 1 ຄົນ ມາຈາກມະຫາວິທະຍາໄລແຫ່ງຊາດ ມຸ່ງໜ້າໄປທາງບ້ານສີວິໄລ ເມືອງໄຊທານີ ເຊິ່ງມີລົດເມສີຂຽວຂັບຂີ່ຕາມຫຼັງມາ. ພໍຮອດຈຸດເກີດເຫດເຂດບ້ານຄໍາຮຸ່ງ ເຊິ່ງເປັນທາງແຄບນາງ ມະລີ ຜູ້ຂັບຂີ່ລົດຈັກ ໄດ້ປ່ຽນຊ່ອງທາງ ໂດຍຫັກ ຫຼົບລົດໃຫຍ່ທີ່ຈອດຢູ່ແຄມທາງ ມາທາງຊ້າຍມືກະທັນຫັນ.
ໃນຂະນັ້ນ, ມີລົດເມຂັບຂີ່ຕາມຫຼັງມາດາດລົດຈັກ ເຮັດ ໃຫ້ລົດຈັກເສຍຫຼັກລົ້ມ ຜູ້ຂັບຂີ່ຟົ້ງເຂົ້າກ້ອງລົດໃຫຍ່ຖືກຢຽບເສຍຊີວິດຄາທີ່, ສ່ວນໝູ່ທີ່ຊ້ອນທ້າຍລົດຈັກຄັນດັ່ງກ່າວປອດໄພ. ເຊິ່ງລົດເມຄັນດັ່ງກ່າວເປັນລົດເມສີຂຽວເປັນລົດລັດວິສະຫະກິດລົດເມ ນະຄອນຫຼວງວຽງຈັນ ສາຍໂພນຕ້ອງ-ດົງໂດກ ໝາຍເລກທະບຽນ ບຂ 0797 ກໍາແພງນະຄອນ ຂັບຂີ່ໂດຍ ທ້າວ ສີສຸພັນ ອາຍຸ 36 ປີ ພັກເຊົາບ້ານນໍ້າກ້ຽງ ເມືອງນາຊາຍທອງ ນະຄອນຫຼວງວຽງຈັນ.
ນອກນີ້, ໃນວັນທີ 16 ຕຸລາ 2017 ເວລາ 2:00 ໂມງ ທ້າວ ທອງແດງ ອາຍຸ 18 ປີ ບ້ານໂນນສະຫວັນ ເມືອງໄຊເສດຖາ ນະຄອນຫຼວງວຽງຈັນ ຂັບຂີ່ລົດກະບະວິໂກ້ ກຂ 5287 ກໍາແພງນະຄອນ ຈາກຫົວຂົວ-ມຸ່ງໜ້າມາທາງສະໜາມມ້າ ຂັບຂີ່ໃນສະພາບມືນເມົາ, ພໍມາຮອດເຂດບ້ານວັງຊາຍ ໄດ້ຂັບລົດຕໍາໃສ່ເຮືອນດີທີ່ມີເຕັ້ນກາງກວມເອົາທາງ ( ເຮືອນດີ ), ອຸບັດຕິເຫດຄັ້ງນີ້ເຮັດໃຫ້ຄົນມາງັນເຮືອນດີ ໄດ້ຮັບບາດເຈັບສາຫັດ 1 ຄົນ ແລະ ສົມຄວນ 4 ຄົນ. ນອກນັ້ນ ຍັງເຮັດໃຫ້ລົດເປ່ເພ່ ແລະ ໃຊ້ການບໍ່ໄດ້ຈໍານວນໜຶ່ງ.
ແຫລ່ງຂ່າວ: Sengaloun Sayalath