ສຳນັກຂ່າວຕ່າງປະເທດລາຍງານຈາກເມືອງ ຄັອກຊ໌ບາຊາຣ໌ ປະເທດບັງກາລາເທດ ເມື່ອວັນທີ 11 ຕຸລາ 2017 ວ່າກອງທຶນເພື່ອເດັກແຫ່ງສະຫະປະຊາຊາດ (ຢູນິເຊຟ) ລາຍງານເລື່ອງການທະຍອຍຈັດສົ່ງວັກຊີນກວ່າ 650,000 ຊຸດ ໄປທີ່ຄ້າຍຜູ້ລີ້ໄພຊາວໂຣຮິນຢາຫຼາຍແຫ່ງ ທີ່ຕັ້ງຢູ່ຕາມເຂດຊາຍແດນທີ່ຕິດກັບລັດຍະໄຂ່ຂອງມຽນມາ ເພື່ອປ້ອງກັນການແຜ່ລະບາດຂອງໂຣກອະຫິວາ ທີ່ຕິດຕໍ່ກັນຜ່ານການດື່ມນ້ຳ ແລະ ອາຫານທີ່ຖືກສຸຂະອານາໄມ ໂດຍການແຈກຍາຍວັກຊີນໃນເທື່ອນີ້ແມ່ນເໜັ້ນແຈກໃຫ້ເດັກນ້ອຍກ່ອນ ເຊິ່ງຢູນິເຊຟປະເມີນວ່າມີປະມານ 250,000 ຄົນ

ປັດຈະບັນບັງກາລາເທດຮອງຮັບຜູ້ລີ້ໄພຊາວໂຣຮິນຢາຈາກມຽນມາຫຼາຍກວ່າ 800,000 ຄົນ ໃນຈຳນວນນີ້ປະມານ 500,000 ຄົນເປັນຜູ້ລີ້ໄພທີ່ຫຼົບໜີການສູ້ຮົບຄັ້ງລ້າສຸດທີ່ເກີດຂຶ້ນເມື່ອເດືອນສິງຫາທີ່ຜ່ານມາ ຂະນະທີ່ລັດຖະບານບັງກາລາເທດມີແຜນແກ້ໄຂສະຖານະການ ດ້ວຍການຂະຫຍາຍຂອບເຂດທີ່ພັກຂອງຄ້າຍຜູ້ລີ້ໄພໃນເມືອງ ກູຕູປະຫຼ່ອງ ເພື່ອໃຫ້ພຽງພໍສຳລັບການດູແລຜູ້ລີ້ໄພຊາວໂຣຮິນຢາທັງໝົດ ແຕ່ສະຫະປະຊາຊາດຄັດຄ້ານ ເນື່ອງຈາກກັງວົນດ້ານສາທາລະນະສຸກເປັນສິ່ງສຳຄັນ ແລະ ສະເໜີໃຫ້ທາງການບັງກາລາເທດເບິ່ງຫາພື້ນທີ່ແຫ່ງໃໝ່ດີກວ່າການຂະຫຍາຍອານາເຂດຂອງສະຖານທີ່ເກົ່າ