ງານບຸນອອກພັນສາ ປະວໍລະນາ ແລະ ຊ່ວງເຮືອ ທີ່ທ່າວັດຈັນ ເມືອງຈັນທະບູລີ ນະຄອນຫລວງວຽງຈັນ, ໃນປີນີ້ ໄດ້ກຳນົດເອົາວັນທີ 4-6 ຕຸລາ 2017 ແລະ ໄດ້ມີຂໍ້ຫ້າມຕ່າງໆ ສຳລັບພໍ່ຄ້າຊາວຂາຍ ແລະ ພໍ່ແມ່ປະຊາຊົນ ຜູ້ທີ່ເຂົ້າມາທ່ຽວຊົມໃນງານບຸນດັ່ງກ່າວ, ມີຄື:
1) ຫ້າມບໍ່ໃຫ້ມີການໂຄສະນາທຸກຮູບແບບ ທີ່ຜິດຕໍ່ກົດລະບຽບຂອງ ສປປ ລາວ.
2) ຫ້າມຂາຍ ຫລື ນຳເອົາອາວຸດທຸກປະເພດລວມທັງພ້າ, ມີດ, ງ້າວ, ໜ້າເກັກ, ກະຖຸນ, ສະໜັບມື, ໂຄມໄຟລອຍ ແລະ ປະເພດຂອງມີຄົມຕ່າງໆເຂົ້າໄປໃນງານໂດຍເດັດຂາດ ເວັ້ນເສຍແຕ່ເຈົ້າໜ້າທີ່ ທີ່ໄດ້ຮັບອະນຸຍາດ.
3) ຫ້າມນຳເອົາຢາເສບຕິດ, ທາດເບື່ອ, ສານເຄມີ ທີ່ອອກລິດປະສາດທຸກຊະນິດ, ສິ່ງເກີດສຽງດັງເກີນຂອບເຂດ, ບັ້ງກະໂພກເຂົ້າມາຈູດ ຫລື ຂາຍພາຍໃນງານເດັດຂາດ.
4) ຫ້າມນຳເອົາຜະລິດຕະພັນທີ່ລອກຮຽນແບບຜ້າສິ້ນລາວ ຫລື ເຄື່ອງນຸ່ງລາວ ນຳມາຂາຍ-ຈຳໜ່າຍພາຍໃນງານຢ່າງເດັດຂາດ (ໂດຍສະເພາະສິ້ນຈີນ).
5) ຫ້າມວາງ ແລະ ຂາຍເຄື່ອງເກີນຂອບເຂດ ທີ່ທາງຄະນະກຳມະການຈັດງານໄດ້ກຳນົດໃຫ້.
6) ຫ້າມຂາຍ ແລະ ນຳເອົາຜະລິດຕະພັນວັດທະນະທຳລາມົກເຊັ່ນ: ກະແຊັກ, ແຜ່ນຊີດີລາມົກ ແລະ ຮູບພາບລາມົກຕ່າງໆເຂົ້າມາຂາຍໃນງານຢ່າງເດັດຂາດ.
7) ຫ້າມຫລີ້ນການພະນັນທຸກປະເພດ ແລະ ອາລະວາດຕີກັນຢ່າງເດັດຂາດ.
8) ຫ້າມຂາຍເຄື່ອງຊະຊາຍໂດຍບໍ່ໄດ້ຮັບອະນຸຍາດ ຈາກຄະນະກຳມະການຈັດງານຕະຫລາດນັດ, ງານບຸນອອກພັນສາ ແລະ ບຸນຊ່ວງເຮືອ 2017 ທີ່ທ່າວັດຈັນ.
9) ຫ້າມດື່ມສິ່ງຂອງມືນເມົາເກີນຂອບເຂດ ຖ້າຜູ້ໃດລະເມີດ ຈະຖືກເຈົ້າໜ້າທີ່ກ່າວເຕືອນ ຫລື ນຳຕົວໄປພັກຜ່ອນໄວ້ກ່ອນ.
10) ຫ້າມບຸກຄົນ, ນິຕິບຸກຄົນ, ສຳນັກງານອົງການ ປົກຄອງບ້ານກີດຂວາງການຈັດສະຖານທີ່ວາງສະແດງສິນຄ້າຂອງຄະນະກຳມະການຈັດງານຕະຫລາດນັດ.
11) ຫ້າມຕອກເຫລັກ ຫລື ສິ່ງຂອງຕ່າງໆ ໃສ່ພື້ນທີ່ຢ່າງເດັດຂາດ. ຖ້າບຸກຄົນໃດ, ອົງກອນໃດ ຫາກຝ່າຝືນກົດລະບຽບ ແລະ ຂໍ້ກຳນົດຕ່າງໆ ທີ່ໄດ້ວາງອອກນີ້ ຈະຖືກກ່າວເຕືອນສຶກສາອົບຮົມ, ປັບໄໝ ແລະ ປະຕິບັດວິໄນຕາມສະຖານໜັກ ຫລື ເບົາ ຂອງຄວາມຜິດ ແລະ ຕາມລະບຽບກົດໝາຍຂອງລັດ.
ນອກຈາກນີ້, ຜູ້ຮັບ-ຝາກລົດ ຕ້ອງໄດ້ຕິດລາຄາຄ່າຝາກລົດຢູ່ຕໍ່ໜ້າບ່ອນຝາກລົດຄື ລົດໃຫຍ່ບໍ່ເກີນ 15.000 ກີບ ແລະ ລົດຈັກ ບໍ່ເກີນ 5.000 ກີບ. ຖ້າບ່ອນຝາກຂອງບຸກຄົນໃດຫາກບໍ່ຂຽນ ຫລື ຂຶ້ນຄ່າຝາກລົດຕາມອຳເພີໃຈໃຫ້ແຈ້ງຄະນະກຳມະການຢູ່ຜາມໄຊ ຫລື ໂທ 020 2221 5552.
ທ່ານ ນາງ ບົວລອນ ວົງດາລາແສນ ຄະນະພັກນະຄອນຫລວງວຽງຈັນ, ເລຂາພັກເມືອງ ເຈົ້າເມືອງຈັນທະບູລີ ກ່າວເທື່ອທ້າຍອາທິດທີ່ຜ່ານມານີ້ວ່າ: ສຳລັບຂອບເຂດ ແລະ ບໍລິເວນພື້ນທີ່ຈັດງານດັ່ງກ່າວ, ທາງເໜືອແມ່ນໄດ້ກຳນົດເອົາຈຸດປ່ອຍເຮືອ ເຂດບ້ານສີຖານເໜືອ ເມືອງສີໂຄດຕະບອງ ລົງໄປຫາຜາມໄຊໜ້າວັດຈັນ; ສຳລັບສະຖານທີ່ວາງສະແດງ-ຂາຍສິນຄ້າ ແມ່ນກຳນົດເອົາບໍລິເວນຕາມຖະໜົນຟ້າງຸ່ມ ນັບແຕ່ເຂດສາມແຍກປາກປ່າສັກ ໄປຫາໂຮງແຮມລ້ານຊ້າງ, ສ່ວນສະຖານທີ່ບໍລິການຮັບຝາກລົດ ແມ່ນກຳນົດເອົາແຕ່ໂຮງຮຽນ ມສ ສີໂຄດ ໄປຫາໂຮງໝໍມະໂຫສົດ ແລະ ຕາມເສັ້ນທາງຊອຍຕ່າງໆ ທີ່ທາງຄະນະກຳມະການກຳນົດໄວ້.
ດັ່ງນັ້ນ, ຈຶ່ງຮຽກຮ້ອງມາຍັງພໍ່ແມ່ປະຊາຊົນບັນດາເຜົ່າ, ຊາວຄ້າຂາຍຕະຫລອດຮອດພະນັກງານ ທະຫານຕຳຫລວດ ຈົ່ງຮ່ວມແຮງຮ່ວມໃຈເປັນເຈົ້າການໃນການປະກອບສ່ວນ ແລະ ເຂົ້າຮ່ວມໃນບຸນຄັ້ງນີ້ ດ້ວຍບັນຍາກາດເບີກບານມ່ວນຊື່ນ, ມີສະຕິລະວັງຕົວ, ເປັນເຈົ້າການໃນການໃນການປ້ອງກັນຄວາມສະ ຫງົບ, ຄວາມເປັນລະບຽບຮຽບຮ້ອຍ ແລະ ຮັກສາອະນາໄມຄວາມສະອາດໃຫ້ຈົບງາມ.
ຂ່າວຈາກ: ມະນີທອນ (ສຳນັກຂ່າວສານປະເທດລາວ)