ເອເອຟພີລາຍງານວ່າ ປະທານາທິບໍດີວາລາດິເມຍ ປູຕິນ ຂອງຣັດເຊຍອອກຖະແຫຼງການທາງໂທລະພາບຂອງຣັດເຊຍໃນມື້ນີ້ວ່າ ຣັດເຊຍໄດ້ທຳລາຍອາວຸດເຄມີຊຸດສຸດທ້າຍທີ່ເຫຼືອຢູ່ຄັງອາວຸດຄິຊເນີໃນສາທາລະນະລັດອຸດມູຣເຊຍ ທາງພາກໃຕ້ຂອງປະເທດສຳເລັດເມື່ອວານນີ້ ຜູ້ນຳຣັດເຊຍໄດ້ກ່າວຊື່ນຊົມການກຳຈັດອາວຸດເຄມີຂອງຣັດເຊຍວ່າເປັນເຫດການສຳຄັນທາງປະຫວັດສາດອີກຄັ້ງໜຶ່ງຂອງໂລກໃນແງ່ການຊ່ວຍໃຫ້ໂລກສະໄໝໃໝ່ມີຄວາມປອດໄພຫຼາຍຂຶ້ນ ແລະ ຕຳນິລັດຖະບານສະຫະລັດທີ່ບໍ່ເຮັດຕາມຣັດເຊຍໃນເລື່ອງນີ້ ແລະ ກ່າວຫາວ່າລັດຖະບານສະຫະລັດເລື່ອນແຜນການກຳຈັດອາວຸດເຄມີມາແລ້ວ 3 ເທື່ອ

ໃຮປັດຈຸບັນ 96 ເປີເຊັນ ຂອງຄັງອາວຸດເຄມີທົ່ວໄປຖືກທຳລາຍໄປໝົດແລ້ວ ອາວຸດເຄມີຍັງເຫຼືອຢູ່ສ່ວນໃຫຍ່ເປັນຂອງສອງປະເທດມະຫາອຳນາດຂອງໂລກຄື ຣັດເຊຍ ແລະ ສະຫະລັດທີ່ສະສົມອາວຸດໄວ້ຈຳນວນຫຼາຍລະຫວ່າງສົງຄາມເຢັນ ກ່ອນໜ້ານີ້ສອງປະເທດໄດ້ຕົກລົງກັນທຳລາຍອາວຸດເຄມີໃຫ້ໝົດໄປພາຍໃນເດືອນເມສາ 2012 ແຕ່ກໍ່ເລື່ອນເວລາມາເລື່ອຍໆ ຕໍ່ມາສະຫະລັດອາເມລິກາລະບຸວ່າຈະກຳຈັດອາວຸດເຄມີໃຫ້ໝົດໄປພາຍໃນປີ 2023