ໃນວັນທີ 23 ກັນຍາ 2017 ນີ້, ເຈົ້າໜ້າທີ່ ປກສ ເມືອງປາກທາ ແຂວງບໍ່ແກ້ວ ໄດ້ນໍາກໍາລັງວິຊາສະເພາະລົງສະກັດຈັບເປົ້າໝາຍຄ້າ-ຂາຍຢາເສບຕິດລາຍໃຫຍ່ ຢູ່ເຂດບ້ານໂພນທອງ ເມືອງປາກທາ ສາມາດກັກຕົວເປົ້າໝາຍໄດ້ 2 ຄົນ ພ້ອມຂອງກາງຢາເສບຕິດ ( ປະເພດຢາບ້າ ) ຈໍານວນ 6 ເປົາ ລວມມີ 480 ມັດ ເທົ່າກັບ 960.000 ເມັດ ຊຸກເຊື່ອງໄວ້ເບາະນັ່ງດ້ານຫຼັງຂອງລົດໂຕໂຢຕ້າວີໂກ້ສີຂາວ ມາສືບສວນ-ສອບສວນ.
ເຈົ້າໜ້າທີ່ ປກສ ເມືອງປາກທາ ໃຫ້ຮູ້ວ່າ: ໄດ້ສືບຮູ້ວ່າຈະມີການຂົນສົ່ງຢາເສບຕິດຂ້າມແຂວງ ຈາກເມືອງຄອບ ແຂວງໄຊຍະບູລີ ໄປເມືອງຫ້ວຍຊາຍ ແຂວງບໍ່ແກ້ວ, ກອງບັນຊາການ ປກສ ເມືອງ ຈຶ່ງໄດ້ແຕ່ງຕັ້ງເຈົ້າໜ້າທີ່ໜ່ວຍສະເພາະກິດລົງກວດກາ-ຕິດຕາມເປົ້າໝາຍ ແລະ ພົບເຫັນລົດວີໂກ້ສີຂາວ ປ້າຍທະບຽນ ມດ 9992 ກໍາແພງນະຄອນ ຂັບຂີ່ໂດຍ ທ້າວ ເຢະປໍວ່າ ອາຍຸ 42 ປີ ແລະ ນາງ ໄມວາງວື ອາຍຸ 20 ປີ ທັງສອງເປັນຜົວເມຍກັນຢູ່ບ້ານຈອມຈຸກ ເມືອງຫ້ວຍຊາຍ ແຂວງບໍ່ແກ້ວ ຜ່ານການກວດຄົ້ນພົບເຫັນຢາບ້າ ຈໍານວນ 6 ເປົາ ລວມມີ 480 ມັດ ເທົ່າກັບ 960.000 ເມັດ ຊຸກເຊື່ອງໄວ້ເບາະນັ່ງດ້ານຫຼັງ ຈຶ່ງໄດ້ກັກຕົວພວກກ່ຽວມາທຳການສືບສວນ-ສອບສວນ.
ຜ່ານການສືບສວນ-ສອບສວນໃນເບື້ອງຕົ້ນ ພວກກ່ຽວໄດ້ຮັບສາລະພາບວ່າ: ຢາບ້າຈໍານວນດັ່ງກ່າວແມ່ນຢູ່ໃນການຄອບຄອງຂອງຕົນແທ້ ເຊິ່ງໄດ້ມີບຸກຄົນບໍ່ຮູ້ຊື່ມາຕິດຕໍ່ໃຫ້ຂົນຢາບ້າຈາກເມືອງຄອບ ແຂວງໄຊຍະບູລີ ໄປສົ່ງຢູ່ເມືອງຫ້ວຍຊາຍ ແຂວງບໍ່ແກ້ວ ພາຍຫຼັງຕົກລົງກັນແລ້ວຈຶ່ງໄດ້ເດີນທາງອອກຈາກບ້ານໄປຈຸດນັດໝາຍ. ພໍໄປເຖິງສະຖານທີ່ ກໍມີຄົນຂົນຢາບ້າຈໍານວນດັ່ງກ່າວມາໃສ່ລົດ; ຈາກນັ້ນ, ໄດ້ຂັບລົດພ້ອມຢາບ້າມຸ່ງໜ້າເຂົ້າມາເມືອງປາກທາ ເຂົ້າສູ່ເມືອງຫ້ວຍຊາຍ ພໍມາຮອດສົ້ນຂົວບ້ານໂພນທອງ ເມືອງປາກທາ ກໍຖືກເຈົ້າໜ້າທີ່ກັກຕົວໄດ້ກ່ອນ.
ແຫລ່ງຂ່າວ: ໜັງສືພິມ ປກສ.