ສຳນັກຂ່າວເອຟພີລາຍງານຈາກນະຄອນຫຼວງ ມະນິລາ ປະເທດຟິລິບປິນ ເມື່ອວັນທີ 21 ກັນຍາ 2017 ວ່າ ທ່ານເປົາໂລ ດູເຕີເຕ ອາຍຸ 42 ປີ ຮອງນາຍົກເທດສະມົນຕີເມືອງດາເນົາ ທາງພາກໃຕ້ຂອງຟິລິບປິນ ແລະ ເປັນລູກຊາຍກົກຂອງປະທານາທິບໍດີ ໂຣດຣິໂກ ດູເຕີເຕ ຜູ້ນຳຟິລິບປິນ ເຂົ້າໃຫ້ປາກຄຳຕໍ່ຄະນະກຳມະການວຸດທິສະພາ ໃນນະ ຄອນຫຼວງ ມະນິລາ ໃນເດືອນນີ້ ເພື່ອປະຕິເສດຂໍ້ກ່າວຫາຈາກສະມາຊິກສະພາຄອງເກຣດສາຍໜຶ່ງ ເຊິ່ງລະບຸວ່າ ເປົາໂລ ເປັນສະມາຊິກແກ໊ງອາຊະຍາກຳຊາວຈີນ ທີ່ຊ່ວຍລັກລບນຳເຂົ້າຢາໄອຊ໌ຈຳນວນມະຫາສານຈາກປະເທດຈີນ
ທ່ານ ດູເຕີເຕ ບໍ່ໄດ້ເອີ່ຍເຖິງຂໍ້ກ່າວຫາໂດຍຕົງແຕ່ໄດ້ກ່າວຢ້ຳຄຳປະກາດຂອງເຂົາ ໃນລະຫວ່າງການລົງຫາສຽງເລືອກຕັ້ງປະທານາທິບໍດີເມື່ອປີທີ່ຜ່ານມາວ່າ ບໍ່ມີລູກຄົນໃດຂອງເຂົາກ່ຽວພັນຢາເສບຕິດ ແຕ່ຖ້າຫາເຂົ້າໄປຫຍຸ້ງກ່ຽວເຂົາຈະລົງໂທດສະຖານໜັກທີ່ສຸດ “ຂ້ອຍເຄີຍເວົ້າມາແລ້ວວ່າ ຄຳສັ່ງຂອງຂ້ອຍຄື ຖ້າຂ້ອຍມີລູກທີ່ຫຍຸ້ງກ່ຽວກັບຢາເສບຕິດ ຕຳຫຼວດສາມາດຂ້າຖິ້ມໄດ້ເລີຍ” ດູເຕີເຕໄດ້ກ່າວຕໍ່ໜ້າເຈົ້າໜ້າທີ່ລັດ ທີ່ທຳນຽບປະທານາທິບໍດີໃນນະ ຄອນຫຼວງ ມະນີລາ ເມື່ອຄືນວັນພຸດທີ່ຜ່ານມາ “ຂ້ອຍຈະສັ່ງຕຳຫຼວດຍິງປູລອງ (ຊື່ຫຼິ້ນຂອງເປົາໂລ) ແລະ ຂ້ອຍຈະປົກປ້ອງຕຳຫຼວດຄົນທີ່ຍິງບໍ່ໃຫ້ຖືກດຳເນີນຄະດີ”