ຄະນະສານອາຍາ ສານປະຊາຊົນຂັ້ນຕົ້ນ ນະຄອນຫຼວງວຽງຈັນ ໄດ້ພິຈາລະນາຄະດີນາງ ມະນີສອນ ອາຍຸ 40 ປີ ຢູ່ບ້ານແກ້ງປາຢ້າງ ເມືອງຫາດຊາຍຟອງ ນະຄອນຫຼວງວຽງຈັນ ໃນວັນທີ 29 ສິງຫາ 2017 ສະຖານສໍ້ໂກງຊັບພົນລະເມືອງ ຖືກສານຕັດອິດສະຫຼະພາບ 2 ປີ 6 ເດືອນ ພ້ອມທັງຊົດເຊີຍໃຊ້ໜີ້ຈຳນວນທີ່ສໍ້ໂກງໃຫ້ແກ່ໂຈດທາງແພ່ງ.
ຄະດີດັ່ງກ່າວເກີດຂຶ້ນໃນໄລຍະຕົ້ນເດືອນຕຸລາ 2014 ທ້າວ ສົມສະໄຫວ ຜູ້ເສຍຫາຍໄດ້ນຳເອົາເງິນ ຈຳນວນ 410.000 ບາດ ໃຫ້ນາງ ມະນີສອນ ເພື່ອແລ່ນເອົາລູກຊາຍ ທ້າວ ສຸກັນຍາ ຜູ້ຖືກຫາຄະດີຄ້າຂາຍຢາເສບຕິດ ອອກຈາກຄ້າຍຄຸມຂັງ ນາງ ມະນີສອນ ຮັບປາກວ່າ: ຈະແລ່ນໃຫ້ພາຍໃນໄລຍະ 1 ເດືອນ ແຕ່ບໍ່ສຳເລັດ ຈາກນັ້ນ ທ້າວ ສົມສະໄຫວ ໄດ້ທວງເອົາເງິນຄືນ ແຕ່ນາງ ມະນີສອນ ບໍ່ສົ່ງໃຫ້ຜູ້ກ່ຽວ ຈຶ່ງມີການແຈ້ງຄວາມຕໍ່ເຈົ້າໜ້າທີ່ ປກສ ກຸ່ມ I ບໍ່ໂອ ເມືອງຫາດຊາຍຟອງ ມາໄກ່ເກ່ຍ ແລະ ສົ່ງໃຫ້ເມືອງດຳເນີນຄະດີ.
ໃນວັນດຽວກັນ ສານໄດ້ເລື່ອນໄຕ່ສວນຄະດີລັກຊັບພົນລະເມືອງ (ລັກລົດຈັກ) ຈຳນວນ 3 ຄົນ ຊື່ທ້າວ ເພັດມະນີ ອາຍຸ 20 ປີ ຢູ່ບ້ານດົງນາໂຊກໃຕ້ ທ້າວ ສີວຽງຄຳ ອາຍຸ 30 ປີຢູ່ບ້ານໂພສີ ແລະ ທ້າວ ຄາວຽງ ຢູ່ບ້ານໜອງສະໂນຄຳ ເມືອງສີໂຄດຕະບອງ ນະຄອນຫຼວງວຽງຈັນ ຍ້ອນຂາດຄວາມຈິງບາງຢ່າງ ຈຶ່ງໂຈະການໄຕ່ສວນຄະດີດັ່ງກ່າວໄວ້ ເພື່ອພິຈາລະນາໃນຂັ້ນຕໍ່ໄປ ໃນສຳນວນຄະດີມີຢູ່ວ່າ: ມີຜູ້ຖືກຫາທັງໝົດ 7 ຄົນ ໄດ້ຖືກເຈົ້າໜ້າທີ່ກັກຕົວໃນວັນທີ 4 ທັນວາ 2014 ໃນຂໍ້ຫາລັກຊັບພົນລະເມືອງລົດຈັກ ປະມານ 10 ຄັນ ໃນນີ້ ໄດ້ຖືກປ່ອຍຕົວພາງຖືກຕ້ອງຕາມລະບຽບແລ້ວ ຈຳນວນ 4 ຄົນ.
ແຫຼ່ງຂ່າວ: ໜັງສືພິມວຽງຈັນໃໝ່