ທ່ານທອງລຸນ ສີສຸລິດ ນາຍົກລັດຖະມົນຕີ ໄດ້ອອກຕົກລົງ  ເລກທີ 67/ນວ ວັນທີ 14/09/2017 ວ່າດ້ວຍການແຕ່ງຕັ້ງຄະນະຮັບຜິດຊອບຄົ້ນຄວ້າແກ້ໄຂບັນຫາ ບໍລິສັດ ພີເອສ (PS) ສົ່ງເສີມກະສິກຳ ແລະ ອຸດສາຫະກຳ ຄົບວົງຈອນ ຂາອອກ-ຂາເຂົ້າ ແລະ ບັນດາບໍລິສັດ ທີ່ດຳເນີນທຸລະກິດທາງດ້ານການເງິນບໍ່ສອດຄ່ອງກັບກົດໝາຍ ແລະ ລະບຽບຂອງ ສປປ ລາວ.

ໂດຍໄດ້ແຕ່ງຕັ້ງ
1. ທ່ານ ປອ. ສົມພາວ ໄຟສິດ ຜູ້ວ່າການ ທະນາຄານແຫ່ງ ສປປ ລາວ ເປັນຫົວໜ້າຄະນະ;
2. ທ່ານ ພັນທອງ ພິດທຸມາ, ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ເປັນຮອງຫົວໜ້າຄະນະ;
3. ທ່ານ ພຕ. ກົງທອງ ພົງວິຈິດ, ຮອງລັດຖະມົນຕີ ກະຊວງປ້ອງກັນຄວາມສະຫງົບ ເປັນຮອງຫົວໜ້າຄະນະ;

ນອກນັ້ນຍັງມີຄະນະອີກ10 ທ່ານ ທີ່ມາຈາກກະຊວງທີ່ກ່ຽວຂ້ອງ

ໜ້າທີ່ ແລະ ສິດ ຂອງຄະນະດັ່ງກ່າວ ມີດັ່ງນີ້:1. ມີໜ້າທີ່ຊີ້ນຳ-ນຳພາ ໃນການແກ້ໄຂບັນຫາບໍລິສັດ ພີເອັສ ແລະ ບັນດາບໍລິສັດ ທີ່ດຳເນີນທຸລະກິດການເງິນທີ່ບໍ່ສອດຄ່ອງກັບກົດໝາຍ ແລະ ລະບຽບການ ຢ່າງຮອບດ້ານ ໂດຍສະເພາະການເກັບກຳສະພາບການເຄື່ອນໄຫວຕົວຈິງ, ການສຶກສາຄົ້ນຄວ້າຂໍ້ມູນໃຫ້ລະອຽດເລີກເຊິ່ງ, ກຳນົດທິດທາງ, ວິທີການ, ມາດຕະການ ແລະ ດຳເນີນແກ້ໄຂບັນຫາດັ່ງກ່າວ ໃຫ້ຂາດຕົວ. ສຳລັບບັນຫາໃດຫາກເກີນສິດຕົກລົງຂອງຄະນະ ກໍ່ໃຫ້ນຳສະເໜີລັດຖະບານພິຈາລະນາ.2. ແຕ່ງຕັ້ງກອງເລຂາ ຫຼື ອະນຸກຳມະການຊ່ວຍວຽກ ຕາມຄວາມເໝາະສົມ ເພື່ອໃຫ້ການເຄື່ອນໄຫວວຽກງານດັ່ງກ່າວ ໄດ້ຮັບຜົນເປັນຢ່າງດີ.3. ປະຕິບັດວຽກງານອື່ນໆ ທີ່ຕິດພັນກັບການແກ້ໄຂບັນຫາດັ່ງກ່າວ ຕາມການຊີ້ນຳ ຂອງລັດຖະບານ ແລະ ພາລະບົດບາດຂອງຕົນ.