ຄະນະນໍາ, ຄູຝຶກ ແລະ ນັກກິລາລາວໄດ້ອອກເດີນທາງໃນວັນທີ 13 ກັນຍາ 2017 ນີ້ ເພື່ອເຂົ້າຮ່ວມການແຂ່ງຂັນກິລາຄົນພິການອາຊຽນ ຫລື ອາຊຽນພາຣາເກມຄັ້ງທີ 9 ທີ່ປະເທດມາເລເຊຍເປັນເຈົ້າພາບ ຈະຈັດຂຶ້ນລະຫວ່າງວັນທີ 17-23 ກັນຍານີ້, ໂດຍພາຍໃຕ້ການນໍາພາຂອງ ທ່ານ ສີທາດ ຈັນທະບູລີ ຫົວໜ້າກົມກິລາມ່ວນຊົນ ກະຊວງສຶກສາ ທິການ ແລະ ກິລາ.
ສໍາລັບ ສປປ ລາວ ໄດ້ສົ່ງຄະນະນໍາ, ຄູຝຶກ ແລະ ນັກກິລາເຂົ້າຮ່ວມລວມທັງໝົດ 100 ຄົນ, ຍິງ 27 ຄົນ. ໃນນັ້ນ, ມີນັກກິລາຈໍານວນ 84 ຄົນ, ຍິງ 20 ຄົນ, ເຊິ່ງຈະມີການແຂ່ງຂັນມີທັງໝົດ 16 ປະເພດກິລາຄື: ແລ່ນ-ລານ, ລອຍນໍ້າ, ຍົກນໍ້າໜັກ, ໂກນບານ, ບານບ້ວງລໍ້ເລື່ອນ, ເຕະບານຄົນພິການຕາ 5 ຄົນ, ລົດຖີບທາງພຽງ-ວິບາກ, ຊີພີບານເຕະພິການ 7 ຄົນ, ບອດເຊຍ, ໝາກເສິກ, ດອກປີກໄກ, ບານສົ່ງນັ່ງ, ປິ່ງປ໋ອງ, ໂບລິງ, ຍິງທະນູ ແລະ ເທັນ ນິດລໍ້ເລື່ອນ ເຊິ່ງຈະມີການຊີງໄຊທັງໝົດ 294 ຫລຽນຄໍາ.
ຂະນະທີ່ນັກກິລາລາວເຂົ້າຮ່ວມພຽງແຕ່ 6 ປະເພດກິລາຄື: ແລ່ນ-ລານ, ລອຍນໍ້າ, ຍົກນໍ້າໜັກ, ໂກນບານ, ບານ ບ້ວງລໍ້ເລື່ອນ ແລະ ກິລາບານເຕະ.
ແຫລ່ງຂ່າວ: ລາວອັບເດດ.