ທ່ານ ຄຳ​ໄພ ປະເສີດ ຮອງ​ປະທານສະຫະພັນ​ບານເຕະ​ແຫ່ງ​ຊາດ​ລາວ (​ສຕລ) ໄດ້​ໂອ​ລົມ​ຕໍ່​ຄະນະ​ນຳ ຄູ​ເຝິກ ແລະ ນັກກີລາ​ເຕະບານ​ຍິງ​ທີມ​ຊາດ​ລາວ ຮຸ່ນ​ອາຍຸ​ບໍ່​ເກີນ 16 ປີ ໃນ​ວັນ​ທີ 4 ກັນຍາ 2017 ທີ່ ​ສຕລ ກ່ອນ​ເຂົ້າ​ຮ່ວມ​ການແຂ່ງຂັນ​ເຕະບານ​ຊີງ​ຂັນ​ອາຊີ ຮຸ່ນ​ອາຍຸ​ບໍ່​ເກີນ 16 ປີ ຮອບ​ສຸດ​ທ້າຍ ທີ່​ແຂວງ​ຊົນ​ບຸ​ຣີ ປະເທດ​ໄທ ເປັນ​ເຈົ້າພາບ ລະຫວ່າງ​ວັນ​ທີ 10-23 ກັນຍາ 2017 ເຊິ່ງ​ທ່ານ​ໄດ້​ເນັ້ນ​ໜັກ​ໃຫ້​ນັກກີລາ​ໃຫ້​ມີ​ຄວາມ​ສາມັກຄີ​ກັນ ຕັ້ງໃຈ​ຫຼິ້ນ​ໃຫ້​ສຸດ​ຄວາມ​ສາມາດ ຕາງໜ້າ​ປະຊາຊົນ​ລາວ​ທັງ​ປະເທດ ຫຼີກເວັ້ນ​ທີ່​ສຸດ​ຄື​ການ​ລົ້ມ​ບານ ຫຼື ລ໊ອກ​ຜົນ​ບານ ແລະ ບໍ່​ຊື່ສັດ​ຕໍ່​ປະເທດ​ຊາດ​ບ້ານເມືອງ​ຂອງ​ຕົນ​ເອງ.

ສ່ວນ​ຕາຕະລາງ​ການ​ແຂ່ງຂັນ​ຂອງ​ທີມ​ຊາດ​ລາວ ປະກອບ​ມີ ໃນ​ວັນ​ທີ 10 ກັນຍາ 2017ເວລາ 19:00 ໂມງ ພົບ​ກັບທີມຊາດ​ໄທ ທີ່​ສະໜາມ​ຊົນ​ບຸ​ຣີ, ວັນ​ທີ 13 ກັນຍາ 2017 ເວລາ 17:00 ໂມງ ພົບ​ກັບທີມ​ຊາດ ​ສປ ຈີນ ທີ່​ສະໜາມ Institute of Physical Education Stadium ວັນ​ທີ 16 ກັນຍາ 2017 ເວລາ 18:00 ໂມງ ພົບ​ກັບທີມ​ຊາດ ສ ເກົາຫຼີ ທີ່​ສະໜາມ Institute of Physical Education ເຊິ່ງ​ການ​ແຂ່ງຂັນ​ຄັ້ງ​ນີ້ແມ່ນ​ຈະ​ເອົາ​ອັນ​ດັບ 1-3 ຜ່ານ​ເຂົ້າ​ໄປ​ຫຼິ້ນ​ໃນ​ການແຂ່ງຂັນ​ບານເຕະ​ຊີງ​ຂັນ​ຊະນະ​ເລີດ​ໂລກ ຮຸ່ນ​ອາຍຸ​ບໍ່​ເກີນ 17 ປີ ທີ່​ປະເທດ ອຸ​ຣຸ​ໄກວ ໃນ​ປີ 2018.

ແຫລ່ງຂ່າວ: ໜັງສືພິມ ວຽງຈັນໃໝ່