ອຳນາດການປົກຄອງ ນວ ເລັ່ງຈັດສັນຄວາມເປັນລະບຽບຮຽບຮ້ອຍໃນຕົວເມືອງ ແລະ ຊານເມືອງ ໂດຍເນັ້ນຈັດຕັ້ງປະຕິບັດການຈັດຄວາມເປັນລະບຽບຮຽບຮ້ອຍແຕ່ຕົວເມືອງອອກໄປຫາຊານເມືອງ ເພື່ອຍົກສູງບົດບາດຂອງ ນວ ໃຫ້ໂດດເດັ່ນໃນຖານະເປັນເມືອງຫຼວງຂອງປະເທດ ພ້ອມທັງຮັບປະກັນໃຫ້ນະຄອນຫຼວງວຽງຈັນ ຫຼຸດພົ້ນອອກຈາກສະຖານະຄວາມດ້ອຍພັດທະນາ ເປັນຕົວເມືອງໜ້າຢູ່ ແລະ ກາຍເປັນຕົວເມືອງທີ່ມີການພັດທະນາທີ່ທັນສະໄໝ.
ທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ໄດ້ໃຫ້ສຳພາດທີ່ໂທລະພາບແຫ່ງຊາດ ມີບາງຕອນກ່າວວ່າ: ການຈັດສັນຄວາມເປັນລະບຽບຮຽບຮ້ອຍໃນ ນວ ໄດ້ສຸມໃສ່ 4 ຂົງເຂດ 11 ກິດຈະກຳ ໃນນັ້ນ ຄວາມບໍ່ເປັນລະບຽບຮຽບຮ້ອຍໃນຂົງເຂດການຄ້າມີ: 2 ກິດຈະກຳ ຄື: ຈັດສັນບັນດາກິດຈະກຳທີ່ລົ້ນຕະຫຼາດຄືນໃໝ່ ການຂາຍເຄື່ອງນອກທີ່ຕັ້ງທີ່ກຳນົດໄວ້ໃນໃບອະນຸຍາດ ຄວາມບໍ່ເປັນລະບຽບຮຽບຮ້ອຍໃນຂົງເຂດໂຍທາທິການ ແລະ ຂົນສົ່ງ ນວ ມີ 5 ກິດຈະກຳ ຄື: ແກ້ໄຂທິດທາງການສັນຈອນບາງເສັ້ນທາງໃຫ້ສັນຈອນທິດທາງດຽວ ແກ້ໄຂການຈອດລົດການເຂົ້າ-ອອກ ແລະ ເຄື່ອນໄຫວໃນເມືອງຂອງລົດບັນທຸກລົດຮັບໃຊ້ການກໍ່ສ້າງ ຈັດສັນຈຸດຈອດລົດຄືນໃໝ່ ຈັດສັນບັນດາສະຖານີ (ຄິວລົດ) ຄືນໃໝ່ ຮື້ຖອນສິ່ງຕໍ່ເຕີມກໍ່ສ້າງບໍ່ຖືກຕ້ອງກັບແຜນຜັງ ແລະ ສິ່ງຮົກເຮື້ອຕາມຖະໜົນຫຼວງ ແລະ ເສັ້ນທາງສຳຄັນໃນເທສະບານ ແລະ ຮື້ຖອນປ້າຍໂຄສະນາທຸກຊະນິດ ທີ່ຕິດຕັ້ງບໍ່ຖືກລະບຽບການ ແກ້ໄຂສິ່ງກີດຂວາງຕາມທາງຄົນຍ່າງ ແລະ ຕາມເຂດສາທາລະນະ ຈັດສັນຄວາມບໍ່ເປັນລະບຽບຮຽບຮ້ອຍໃນກິດຈະກຳກໍ່ສ້າງ ແລະ ສ້ອມແປງຕຶກອາຄານ.
ແຫ່ງຂ່າວ: ໜັງສືພິມວຽງຈັນໃຫມ່