ບຸນອອກພັນສາປະວໍລະນາ ແມ່ນກົງກັບມື້ຂຶ້ນ 15 ຄ່ຳເດືອນ 11 ລາວຂອງທຸກໆປີ ແລະ ບຸນດັ່ງກ່າວ ຈະຕິດພັນກັບບຸນຊ່ວງເຮືອປະເພນີປະຈຳປີທ່າວັດຈັນ ເມືອງຈັນທະບູລີ ນະຄອນຫຼວງວຽງຈັນ ເຊິ່ງເປັນບຸນປະເພນີປະຈຳຊາດ ທີ່ປະຊາຊົນບັນດາເຜົ່າ ໂດຍສະເພາະປະຊາຊົນນະຄອນຫຼວງວຽງຈັນ ທີ່ເຄີຍປະຕິບັດກັນມາຫຼາຍເຊັ່ນຄົນ ແລະ ສືບທອດຕໍ່ໆໄປ.
ສຳລັບບຸນຊ່ວງເຮືອປະເພນີປະຈຳປີທ່າວັດຈັນ ມີຜາມໄຊຢູ່ທ່າວັດຈັນ ທີ່ເປັນສະຖານທີ່ສຳລັບໃຫ້ການນຳພັກ-ລັດ ແຂກຕ່າງປະເທດ ແລະ ພະນັກງານ ພ້ອມດ້ວຍມວນຊົນທົ່ວໄປ ໄດ້ຊົມການແຂ່ງຂັນເຮືອຊ່ວງຢູ່ໜ້ານ້ຳຂອງ ແລະ ໄດ້ກຳນົດເອົາຈຸດນີ້ ເປັນສະຖານທີ່ຊ່ວງເຮືອມາຕະຫຼອດ ແຕ່ຕົກມາໄລຍະສອງປີມານີ້ ເນື່ອງຈາກສະຖານທີ່ຊ່ວງເຮືອທ່າວັດຈັນ ສະພາບນ້ຳຂອງໄດ້ມີການປ່ຽນແປງນ້ຳບົກແຫ້ງ ບໍ່ສາມາດຊ່ວງເຮືອຂະໜາດໃຫຍ່ໄດ້ ດັ່ງນັ້ນ ຄະນະກຳ ມະການຈັດງານໂດຍການເຫັນດີຈາກອຳນາດການປົກຄອງເມືອງ ແລະ ນະຄອນຫຼວງວຽງຈັນ ກໍ່ຄືພາກສ່ວນກ່ຽວ ຂ້ອງ ໄດ້ມີການປ່ຽນສະຖານທີ່ຊ່ວງເຮືອຫຍັບຍ້າຍຂຶ້ນມາຊ່ວງຢູ່ເຂດບ້ານສີຖານເໜືອ ເມືອງສີໂຄດຕະບອງ ແລະ ຜ່ານການຈັດຕັ້ງເຫັນວ່າ ສະຖານທີ່ຜາມໄຊຈຸດດັ່ງກ່າວແມ່ນບໍ່ມີ ຄວາມເໝາະສົມຄືກັບຢູ່ຈຸດທ່າວັດຈັນ ເນື່ອງຈາກມີສະຖານທີ່ຄັບແຄບ ແລະ ການເຂົ້າ-ອອກ ລົດແອອັດພົບຄວາມຫຍຸ້ງຍາກ ເມື່ອເປັນຄືແນວນັ້ນ ຄະນະກຳມະການ ກໍ່ຄືອຳນາດການປົກຄອງເມືອງຈັນທະບູລີ ສົມທົບກັບພາກສ່ວນກ່ຽວຂ້ອງ ໄດ້ປຶກສາຫາລືກ່ຽວກັບການປ່ຽນແປງວັນເວລາຈັດງານບຸນຊ່ວງເຮືອປະເພນີທ່າວັດຈັນ ມາໃສ່ມື້ບຸນຫໍ່ເຂົ້າສະຫຼາກໃນວັນທີ 5-6 ກັນຍາ 2017 ແລະ ກໍ່ໄດ້ສະເໜີໄປຍັງການນຳນະຄອນຫຼວງວຽງຈັນພິຈາລະນາ ຕໍ່ກັບບັນຫານີ້ໄດ້ມີບາງຄົນນຳເອົາບັນຫາດັ່ງກ່າວລົງທາງສື່ອອນລາຍ ໂດຍສະເພາະ ເຟສບຸກ ເຮັດໃຫ້ສັງຄົມມີຄວາມສັບສົນຕໍ່ກັບການຈັດວັນເວລາງານບຸນຊ່ວງເຮືອທີ່ທ່າວັດຈັນ ຈະເອົາມື້ໃດແທ້.
ທ່ານ ບຸນທ່ຽງ ຂຸນສີ ປະທານແນວລາວສ້າງຊາດ ນະຄອນຫຼວງວຽງຈັນ ໄດ້ໃຫ້ສຳພາດ ວັນທີ 15 ສິງຫາ 2017 ວ່າ: ກ່ຽວກັບບຸນປະເພນີຊ່ວງເຮືອທ່າວັດຈັນ ປີ 2017 ແລະ ຜ່ານການຄົ້ນຄວ້າສະເໜີຂອງເມືອງຈັນທະບູລີ ຄະນະນຳ ກໍ່ຄືຄະນະປະຈຳພັກ ນະຄອນຫຼວງວຽງຈັນ ໄດ້ຄົ້ນຄວ້າເປັນເອກະພາບກັນເຫັນວ່າ ບຸນຊ່ວງເຮືອທີ່ທ່າວັດຈັນແມ່ນໃຫ້ເຮັດຖືກຕາມຮີດຄອງທີ່ເຄີຍປະຕິບັດກັນມາ ແຕ່ລະປີຈະບໍ່ມີການປ່ຽນແປງວັນເວລາຈັດງານບຸນຊ່ວງເຮືອ ຕາມທີ່ຂ່າວລືຜ່ານມາ ທີ່ວ່າຈະຊ່ວງເຮືອໃສ່ມື້ບຸນເຂົ້າສະຫຼາກກົງກັນມື້ຂຶ້ນ 15 ຄ່ຳ ເດືອນສິບ ຫຼື ວັນທີ 6 ກັນຍາ 2017 ນັ້ນແມ່ນຈະບໍ່ໃຫ້ຈັດໃສ່ ແລະ ໃຫ້ປະຕິບັດຄືເກົ່າໃສ່ມື້ບຸນອອກພັນສາປະວໍລະນາ ໃນວັນທີ 5-6 ຕຸລາ 2017 ແລະ ສະຖານທີ່ຊ່ວງເຮືອໃຫ້ກັບຄືນມາຈັດຢູ່ສະຖານທີ່ເກົ່າທ່າວັດຈັນ ແຕ່ຈະມີການປ່ຽນແປງບາງອັນຄືຖ້າປີໃດ ນ້ຳຂອງຂຶ້ນຫຼາຍໃຫ້ຊ່ວງເຮືອໃຫຍ່ ແຕ່ປີໃດນ້ຳຂອງບົກແຫ້ງ ຕື້ນເຂີນແມ່ນໃຫ້ຊ່ວງເຮືອນ້ອຍ ໄປຕາມສະພາບແວດລ້ອມຂອງທຳມະຊາດ ທັງນີ້ ກໍ່ເພື່ອປະຕິບັດຕາມຮີດຄອງປະເພນີທີ່ເຄີຍສືບທອດກັນມາຫຼາຍເຊັ່ນຄົນ ດັ່ງນັ້ນ ສັງຄົມກໍ່ຄືປະຊາຊົນບັນດາເຜົ່າຊາວນະຄອນຫຼວງວຽງຈັນ ຈົ່ງເຂົ້າໃຈຕາມນີ້ ແລະ ບໍ່ໃຫ້ເຊື່ອຂໍ້ມູນ ກໍ່ຄືຂ່າວລືທາງສື່ອອນລາຍ.
ແຫລ່ງຂ່າວ: ໜັງສືພິມວຽງຈັນໃໝ່