ວັນທີ 15 ສິງຫາ 2017 ຢູ່ທີ່ໂຮງແຮມຊັ່ງຈ່ຽງ ນະຄອນຫຼວງວຽງຈັນ ສະພາການຄ້າຈີນ ປະຈຳ ສປປ ລາວ ໄດ້ຈັດພິທີມອບ-ຮັບເງິນບໍລິຈາກ ໃຫ້ແກ່ຜູ້ປະສົບອັກຄີໄພສູນການຄ້າສາກົນຊັ່ງຈ່ຽງ ໂດຍເຂົ້າຮ່ວມຂອງທ່ານ ຟ້ານກວາງຢີ ເລຂາທິການສະພາການຄ້າຈີນ ປະຈຳ ສປປ ລາວ ພ້ອມດ້ວຍຊາວຄ້າຂາຍທີ່ປະສົບອັກຄີໄພເຂົ້າຮ່ວມ.
ເງິນທີ່ນຳມາຊ່ວຍເຫຼືອໃນຄັ້ງນີ້ ມີຈຳນວນທັງໝົດ 353 ລ້ານກີບ ເປັນການຊ່ວຍເຫຼືອຂອງນັກທຸລະກິດຈາກ ສປ ຈີນ ສຳລັບການຊ່ວຍເຫຼືອໃນເບື້ອງຕົ້ນຂອງສະພາການຄ້າຈີນ ປະຈຳ ສປປ ລາວ ແມ່ນມີຈຳນວນ 175 ຮ້ານ ຈາກຈຳນວນລາຍຊື່ທີ່ໄດ້ລົງທະບຽບທັງໝົດ ແລະ ຈະໄດ້ຮັບເງິນຊ່ວຍເຫຼືອ ຮ້ານລະ 2.020.000 ກີບ.
ປັດຈຸບັນ ທາງເຈົ້າໜ້າທີ່ຕຳຫຼວດແມ່ນໄດ້ດຳເນີນການສືບສວນ-ສອນສວນ ຫາສາເຫດຕົ້ນຕໍຂອງການເກີດອັກຄີໄພຄັ້ງນີ້ ເຊິ່ງເຫດການດັ່ງກ່າວເກີດຂຶ້ນໃນວັນທີ 14 ກໍລະກົດ 2017 ເນື້ອທີ່ຖືກໄໝ້ທັງໝົດ 15.600 ຕາແມັດ ມີຫ້ອງຂາຍເຄື່ອງ 430 ຫ້ອງ ທີ່ຂາຍເຄື່ອງປະເພດເຄື່ອງນຸ່ງ ເກີບ ກະເປົາ ເຄື່ອງຫຼີ້ນເດັກນ້ອຍ ຜ້າກັ້ງ ພົມປູພື້ນ ເຄື່ອງນຸ່ງແພໄໝ ແລະ ເຄື່ອງໃຊ້ປະຈຳວັນອື່ນໆ ອັນໄດ້ສ້າງຄວາມເສຍຫາຍດ້ານຊັບສິນຂອງຊາວຄ້າຂາຍທັງຄົນລາວ ແລະ ຄົນຈີນ ຈຳນວນຫຼາຍຕື້ກີບ.
ແຫລ່ງຂ່າວ: ໜັງສືພິມວຽງຈັນໃໝ່