ສຳນັກຂ່າວຕ່າງປະເທດລາຍງານຈາກນະຄອນ ຟຣີທາວ ປະເທດ ເຊຍຣາລີໂອນ ເມື່ອວັນທີ 15 ສິງຫາ 2017 ວ່າ ປະທານາທິບໍດີ ເອີເນວ ໄບ ໂຮໂຣມາ ຖະແຫລງການວ່າຈຳນວນຜູ່ເສຍຊີວິດຈາກເຫດດິນຖະລົ່ມທັບໝູ່ບ້ານຫຼາຍແຫ່ງໃນ ຟຣີທາວ ເຊິ່ງເປັນຜົນກະທົບມາຈາກຝົນທີ່ຕົກລົງມາຢ່າງໜັກໃນລະດູມໍລະສຸມ ເມື່ອວັນຈັນທີ່ຜ່ານມາ ເປັນເຫດເຮັດໃຫ້ມີຜູ່ເສຍຊີວິດແລ້ວ 312 ຄົນ ແລະ ປະຊາຊົນອີກ 3,000 ຄົນ ຂາດທີ່ຢູ່ອາໃສ ໂດຍສະເພາະໃນເຂດ ຣີເຈນ ເຊິ່ງເປັນພື້ນທີ່ທີ່ໄດ້ຮັບຜົນກະທົບຫຼາຍທີ່ສຸດ ເຊິ່ງລັດຖະບານໄດ້ເນັ້ນຢ້ຳໃຫ້ທຸກໜ່ວຍງານທີ່ກ່ຽວຂ້ອງເຂົ້າຊ່ວຍເຫຼືອແກ່ປະຊາຊົນຢ່າງສຸດຄວາມສາມາດ