ເກີດເຫດການຈະລາຈົນທີ່ຄ້າຍຄຸມຂັງໃນບຣາຊິນ ມີຜູ້ຄຸມຖືກຈັບເປັນໂຕປະກັນ ແລະ ມີນັກໂທດຖືກຂ້າຕັດຄໍ 3 ຄົນ
ສຳນັກຂ່າວຕ່າງປະເທດລາຍງານວ່າ ເກີດເຫດການຈະລາຈົນໃນຄ້າຍຄຸມຂັງ ເມືອງກາສກາເບນ ທາງຕອນໃຕ້ຂອງ
ປະເທດບຣາຊິນ ເຊິ່ງມີນັກໂທດຫຼາຍກ່ວາພັນຄົນ ເປັນເຫດໃຫ້ມີຜູ້ໄດ້ຮັບບາດເຈັບຈຳນວນຫຼວງຫຼາຍ ແລະ ມີນັກ
ໂທດໃນຄ້າຍຄຸມຂັງດັ່ງກ່າວ 3 ຄົນ ຖືກຂ້າຕັດຄໍ ໃນຂະນະທີ່ຜູ້ຄຸມຂອງຄ້າຍຄຸມຂັງອີກ 2 ຄົນ ລວມເຖິງນັກໂທດອີກ
ຈຳນວນໜຶ່ງຖືກຈັບເປັນໂຕປະກັນ.
ເຈົ້າໜ້າທີ່ຂອງບຣາຊິນເປີດເຜີຍວ່າ ເຫດການຈະລາຈົນດັ່ງກ່າວ ເກີດຂຶ້ນໃນຕອນຂ້ອນແຈ້ງມື້ວັນອາທິດ (24 ສິງ
ຫາ 2014) ຫຼັງຈາກຜູ້ຄຸມຄຸກໄດ້ນຳອາຫານໄປໃຫ້ຜູ້ຖືກຂັງກິນ ແຕ່ກໍຖືກລຸມທຳຮ້າຍຮ່າງກາຍ ແລະ ຖືກຈັບເປັນໂຕ
ປະກັນ, ຈາກນັ້ນນັກໂທດຈຳນວນຫຼາຍ ກໍລຸກຮືຂຶ້ນມາຮື້ຄົ້ນເຄື່ອງຂອງ ແລ້ວມີການຈູດໄຟເຜົາ, ໃຊ້ທ່ອນເຫຼັກທຸບ
ສ້າງຄວາມເສຍຫາຍແກ່ຫ້ອງຂັງ.
ມີນັກໂທດອີກຫຼາຍສິບຄົນ ປິດບັງໃບໜ້າຕົນເອງດ້ວຍຜ້າຂາວ ແລ້ວຂຶ້ນໄປເທິງດາດຟ້າຂອງຄ້າຍຄຸມຂັງ ເພື່ອທຸບ
ຕີທຳຮ້າຍໂຕປະກັນ ເຊິ່ງຖືກເຊືອກມັດໄວ້ທີ່ຄໍ ຫຼື ຂໍ້ມື.
ເຫດການດັ່ງກ່າວໄດ້ຍືດເຍື້ອຈົນເຖິງເວລາຕາເວັນຕົກດິນ ສະຖານະການຈິ່ງເລີມປ່ຽນແປງໄປໃນທິດທາງທີ່ດີຂຶ້ນ,
ເຖິງຢ່າງໃດກໍຕາມ ເຈົ້າໜ້າທີ່ກຳລັງພະຍາຍາມເຈລະຈາກັບເຫຼົ່ານັກໂທດ ເພື່ອຢຸຕິການຈະລາຈົນຢູ່.
ສຳລັບສາເຫດຂອງການຈະລາຈົນໃນຄັ້ງນີ້ ຍັງບໍ່ທັນເປັນທີ່ຊັດເຈນເທື່ອ, ແຕ່ ທ່ານ ໄຮໂຣ ເຟຣເຣຣາ ທະນາຍຂອງ
ສະຫະພາບເຈົ້າໜ້າທີ່ຄ້າຍຄຸມຂັງ ໄດ້ກ່າວວ່າ ນັກໂທດຮຽກຮ້ອງຂໍໃຫ້ເຈົ້າໜ້າທີ່ໃຫ້ການເບິ່ງແຍງໃນດ້ານອາຫານ
ແລະ ດ້ານອຸປະກອນການຢາໃຫ້ດີຂຶ້ນ, ເຖິງແນວໃດກໍຕາມ ຍັງບໍ່ທັນມີການເປີດເຜີຍລາຍລະອຽດອື່ນໆອີກ.