ເພື່ອເປັນການໃຫ້ຂວັນ ແລະ ກຳລັງໃຈ ແກ່ຄະນະຮັບຜິດຊອບ ແລະ ນັກກີລາບານເຕະ ທີມຊາດລາວ ຊຸດຊີເກມ. ດັ່ງນັ້ນ, ໃນຕອນແລງຂອງວັນທີ 04 ສິງຫາ 2017 ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ພ້ອມດ້ວຍຄະນະ ໄດ້ໄປຢ້ຽມຢາມ ແລະ ພົບປະຄະນະນັກກີລາດັ່ງກ່າວ ທີ່ສະຫະພັນບານເຕະແຫ່ງຊາດລາວ(ຫ້ວຍຫົງ) ເຊິ່ງມີຄະນະນຳຈາກກະຊວງສຶກສາທິການ ແລະ ກີລາ, ປະທານ ແລະ ຄະນະ ໃນສະຫະພັນບານເຕະແຫ່ງຊາດລາວ. ພ້ອມດ້ວຍຄະນະຄູຝຶກ ແລະ ນັກກີລາບານເຕະ ຊູດຊີເກມ ໃຫ້ການຕ້ອນຮັບ.
ທີມຊາດລາວ ຊຸດຊີເກມ ໄດ້ເລີ່ມຄັດເລືອກນັກກີລາຈຳນວນ 20 ຄົນ ແລະ ເກັບຕົວຝຶກຊ້ອມ ຕັ້ງແຕ່ເດືອນພຶດສະພາ 2017 ທີ່ຜ່ານມາ ໂດຍການຄຸມທີມຂອງຫົວໜ້າຄູຝຶກ ຈາກປະເທດສິງກະໂປ ແລະ ຄະນະອີກ 4 ທ່ານ. ໃນໄລຍະຜ່ານມາ ທີມຊຸດນີ້ ໄດ້ທຳການແຂ່ງຂັນໄປແລ້ວ 1ລາຍການ ຄື: ບານເຕະຊີງແຊັມອາຊີ ລຸ້ນອາຍຸບໍ່ເກີນ 23 ປີ ຮອບຄັດເລືອກ ໃນລະຫວ່າງວັນທີ 19-23 ກໍລະກົດ 2017 ທີ່ ສປປ ເກົາຫຼີ ຊຶ່ງຢູ່ສາຍດຽວກັບເຈົ້າພາບ ສປປ ເກົາຫຼີ, ຮົງກົງ ແລະ ໄຕ້ຫວັນ ຜົນປາກົດວ່າ: ຊະນະ 1 ນັດ, ສະເໝີ 1 ນັດ ແລະ ເສຍ 1 ນັດ. ປະຈຸບັນ, ໄດສືບຕໍ່້ເກັບຕົວຝຶກຊ້ອມ ຢ່າງເປັນປົກກະຕິ ແລະ ໄດ້ລົງແຂ່ງຂັນມິດຕະພາບ ທັງພາຍໃນ ແລະ ຕ່າງປະເທດ ສາມາດຖອດຖອນບົດຮຽນ, ເສີມຈຸດດີ-ແກ້ໄຂຈຸດອ່ອນ ແລະ ມີຜົນການແຂ່ງຂັນ ທີ່ໜ້າເພິ່ງພໍໃຈ. ທີມຊາດຊີເກມຊຸດນີ້ ຍັງຈະໄດ້ເດີນທາງໄປເກັບຕົວ ແລະ ແຂ່ງຂັນມິດຕະພາບຕື່ມອີກ ທີ່ຣາຊະອານາຈັກໄທ ໃນລະຫວ່າງວັນທີ 07-12 ສິງຫາ 2017 ແລະ ເດີນທາງຕໍ່ໄປປະເທດມາເລເຊຍ ເພື່ອເຂົ້າຮ່ວມມະຫາກຳກີລາຊີເກມ ຄັ້ງທີ 29 ທີ່ເມືອງຫຼວງກົວລາລຳເປີ ໂດຍຈັດຢູ່ສາຍເອ ຊຶ່ງຈະພົບກັບມຽນມາ 16 ສິງຫາ, ສິງກະໂປ 18 ສິງຫາ, ບຣູໄນ 21 ສິງຫາ ແລະ ພົບເຈົ້າພາບມາເລເຊຍ ໃນວັນທີ 23 ສິງຫາ 2017.
ໂອກາດນີ້, ທ່ານ ສອນໄຊ ສີພັນດອນ ກໍ່ໄດ້ສະແດງຄວາມຊົມເຊີຍ ຕໍ່ບັນດາຜົນງານ ທີ່ນັກກີລາພວກເຮົາ ສາມາດຍາດມາໄດ້ ໃນໄລຍະຜ່ານມາ. ພ້ອມນີ້, ກໍ່ຍົກໃຫ້ເຫັນ ໄລຍະແຫ່ງການພັດທະນາ ຂອງສະຫະພັນບານເຕະແຫ່ງຊາດລາວ ແລະ ຄວາມພະຍາຍາມ ໃນການລະດົມທຶນຮອນ ເພື່ອປັບປຸງພື້ນຖານໂຄງລ່າງດ້ານກີລາ ແລະ ຍົກລະດັບນັກກີລາລາວ ໄປສູ່ຄຸນນະພາບໃໝ່. ໃນຕອນທ້າຍ, ທ່ານຮອງນາຍົກລັດຖະມົນຕີ ຍັງໄດ້ເນັ້ນໃຫ້ຄະນະນັກກີລາ ຕ້ອງເອົາໃຈໃສ່ຕໍ່ລະບຽບວິໄນ ເພື່ອຮັກສາສຸຂະພາບໃຫ້ສົມບູນ ມີຄວາມພ້ອມຕໍ່ການລົງແຂ່ງຂັນ, ມີສະຕິຕໍ່ການປະຕິບັດລະບຽບຂອງສາກົນ, ມີຄວາມສາມັກຄີ ແຂ່ງຂັນຢ່າງເປັນລະບົບ ແລະ ເປັນທີມ, ພະຍາຍາມຄວາມຄຸມສະຕິອາລົມ ມີນ້ຳໃຈນັກກີລາ, ຕ້ອງມີການໃຫ້ກຳລັງໃຈເຊິ່ງກັນ ແລະ ກັນ, ພະຍາຍາມບໍ່ໃຫ້ເກີດບັນຫາການລົ້ມບານ ເພື່ອກຽດສັກສີຂອງ ສປປ ລາວ ແລະ ພ້ອມກັນນຳເອົາຊື່ສຽງ ມາສູ່ປະຊາຊົນ ແລະ ຊາດລາວເຮົາ. ນອກຈາກນີ້, ທາງສະຫະ ພັນບານເຕະ ຍັງຈະໄດລະດົມ ແລະ ້ມອບນະໂຍບາຍ ໃຫ້ທີມນັກກີລາບານເຕະຊຸດນີ້ ປະມານ 1 ຕື້ກີບ ຖ້າສາມາດຢ່າງໜ້ອຍເຂົ້າໄປໄດ້ໃນຮອບ 4 ທີມສຸດທ້າຍ.
ແຫລ່ງຂ່າວ: ສຳນັກຂ່າວສານປະເທດລາວ