ສຳນັກຂ່າວຊິນຮວາ ລາຍງານໃນວັນທີ 31 ກໍລະກົດຜ່ານມານີ້ວ່າ ທ່ານ ສີຈິ້ນຜິງ ເລຂາທິການໃຫຍ່ ພັກກອມມູນິດຈີນ, ປະທານປະເທດຈີນ ໄດ້ເຂົ້າຮ່ວມເປັນປະທານໃນພິທີກວດການສວນສະໜາມຂອງກອງທັບ ເນື່ອງໃນໂອກາດສະເຫລີມສະຫລອງ ວັນສ້າງຕັ້ງກອງທັບປົດປ່ອຍປະຊາຊົນຈີນ ຄົບຮອບ 90 ປີ ຊຶ່ງສະແດງໃຫ້ເຫັນເຖິງຄວາມເຕີບໃຫຍ່ເຂັ້ມແຂງ ທາງດ້ານກຳລັງພົນ ແລະ ຍຸດໂທປະກອນຈຳນວນມະຫາສານ, ໃນນີ້ ຍັງມີການສະແດງແສນຍານຸພາບ ເຕັກໂນໂລຊີທາງການທະຫານທີ່ທັນສະໄໝຂອງກອງທັບ ບໍ່ວ່າຈະເປັນເຮືອບິນສູ້ຮົບ, ຂີປະນາວຸດຂ້າມທະວີບຕິດຫົວຮົບນິວເຄລຍ, ເຮລິຄອບເຕີ້, ລົດຕັງ-ຍານເກາະ ແລະ ກອງຕີພິເສດ.
ພິທີສວນສະໜາມດັ່ງກ່າວ ຈັດຂຶ້ນໃນທະເລຊາຍແຄວ້ນມອງໂກລີຂອງຈີນ ໂດຍພາຍໃນພິທີ ທ່ານປະທານປະເທດຈີນ ສີຈິ້ນຜິງ ໄດ້ກ່າວວ່າ ຈະຕ້ອງມີຄວາມພ້ອມທີ່ຈະທຳລາຍລ້າງຜູ້ຮຸກຮານທັງໝົດ ບໍ່ວ່າຈະເປັນໃຜກໍຕາມ.
