ຂປລ. ທ່ານ ສົມໄຊ ວັນນະຈອມຈັນ ຫົວໜ້າຂະແໜງປູກຝັງ, ຫ້ອງການກະສິກຳ-ປ່າໄມ້ ເມືອງຜາ​ອຸດົມ ​ແຂວງ​ບໍ່​ແກ້ວ ໃຫ້ຮູ້ວ່າ: ກະສິິກອນຢູ່ເມືອງຜາອຸດົມ ໄດ້ເລີ່ມລົງມືສຸມໃສ່ປັກດຳ ເຂົ້ານາປີ ຂອງຕົນມາແຕ່ກາງເດືອນມິຖຸນາ, ປັດຈຸບັນໄດ້ສຳເລັດແລ້ວ 95% ໃນເນື້ອທີ່ 2.470 ເຮັກຕາໃນ 35 ບ້ານ, ມີ 2.097 ຄອບຄົວ. ຄາດວ່າຈະໃຫ້ສຳເລັດການປັກດຳ 100%, ໃນຕົ້ນເດືອນສິງຫານີີ້; ຄາດຄະເນສະມັດ ຕະພາບ 4,5 ໂຕນ/ເຮັກຕາ ​ແລະ ຜົນຜະລິດ​ໃຫ້​ໄດ້ 11.115 ໂຕນ.

ນອກຈາກການຜະລິດເຂົ້ານາປີແລ້ວ ກະສິກອນຢູ່ເມືອງຜາອຸດົມ ທີ່ອາໄສຢູ່ເຂດເນີນສູງຍັງໄດ້ ຜະລິດເຂົ້າໄຮ່່ໝູນວຽນໃນເນື້ອທີ່ 3,929 ເຮັກຕາ, ປູກໝາກເດືອຍ 125 ເຮັກຕາ, ສາລີແຂງ 40 ເຮັກຕາ, ສາລີຫວານ 150 ເຮັກຕາ, ໝາກງາ 120 ເຮັກຕາ ແລະ ພືດຜັກຊະນິດຕ່າງໆໃນເນື້ອທີ່ 20 ກວ່າເຮັກຕາ, ຄາດຄະເນຜົນຜະລິດໄດ້ທັງໝົດ 17.197 ໂຕນ.

ແຫລ່ງຂ່າວ: ຂປລ