ກະຊວງສາທາລະນະສຸກ ຢືນຢັນວ່າ: ອັດຕາສະເລັ່ຍ ຂອງເດັກນ້ອຍລາວ ປະມານ 96% ທົ່ວປະເທດ ແມ່ນກິນນົມແມ່ ຂະນະທີ່​ເດັກນ້ອຍ​ກິ​ນນໍ້ານົມ​ແມ່​ ຈະ​ຊ່ວຍ​ເຮັດ​ໃຫ້​ເຂົາ​ເຈົ້າ​ສະຫລາດ ​ແລະ ມີ​ພູມ​ຄຸ້ມ​ກັນ​ພະຍາດ​ຕ່າງໆ​ໄດ້.

ກອງປະຊຸມໂຄສະນາ ສັບປະດາສາກົນ ຂອງການລ້ຽງລູກ ດ້ວຍນ້ຳນົມແມ່ (1-7ສິງຫາ) ຮ່ວມແຮງຮ່ວມໃຈ ເຮັດໃຫ້ການລ້ຽງລູກ ດ້ວຍນົມແມ່ຍືນຍົງ ຈັດຂຶ້ນໃນວັນທີ 28 ກໍລະກົດ 2017 ທີ່ສູນຝຶກອົບຮົມ ສູນກາງແນວລາວສ້າງຊາດ ເພື່ອ​ໂຄ​ສະນາ​ໃຫ້​ສັງຄົມ​​ ເຫັນຄວາມ​ສຳຄັນ​ ຂອງ​ການ​ລ້ຽງລູກ​ດ້ວຍ​ນ້ຳມົນ​ແມ່ ​​ແລະ ຫລຸດ​ຈຳນວນ​ການລ້ຽງ​ລູກ​ດ້ວຍ​ນົມຜົງ ​ເພື່ອ​ຫລຸດຜ່ອນ​ ການ​ຂາດ​ສານ​ອາຫານ ​ແລະ ປັບປຸງ​ໂພຊະ​ນາ​ການ​ເດັກ​ໃຫ້​ດີ​ຂຶ້ນ.​ ໂດຍການເປັນປະທານຂອງ ທ່ານ ສົມສະຫວາດ ພົງສາ ຮອງຫົວໜ້າກົມສື່ມວນຊົນ ກະຊວງ​ຖະ​ແຫລ​ງຂ່າວ ວັດທະນະທຳ ​ແລະ ທ່ອງ​ທ່ຽວ, ຫົວໜ້າພະແນກສາທາ ແລະ ໂພສະນາການ ປະຈຳ​ອົງການ ຢູນິເຊບ ​ແລະ  ທ່ານ ນາງ ຄຳເສັງ ພິລາວົງ ຮອງຫົວໜ້າ ສູນໂພຊະນາ ກະຊວງ​ສາທາລະນະ​ສຸກ ພ້ອມ​ດ້ວຍ​ສື່​ມວນ​ຊົນ​ເຂົ້າ​ຮ່ວມ.

ທ່ານ ນາງ ຄຳເສັງ ພິລາວົງ ໄດ້ເຜີຍໃຫ້ຮູ້ເຖິງຜົນດີ ຂອງການລ້ຽງລູກດ້ວຍນົມແມ່ ແລະ ຄຳແນະນຳກ່ຽວກັບ ການລ້ຽງລູກດ້ວຍນົມແມ່ຢ່າງດຽວ ເຊິ່ງໄດ້​ແນະນຳ​ວ່າ​ຄວນ ເອົາລູກດູດນົມແມ່ທັນທີ ຫລື ພາຍໃນ 1 ຊົ່ວໂມງຫລັງເກີດ ເຊິ່ງປັດຈຸບັນ ແມ່ຍິງລາວລ້ຽງລູກດ້ວຍນ້ຳນົມແມ່ມີ 96%,​​ ແຕ່​ມີ​ພຽງ 39% ແມ່ນເອົາລູກດູດນົມແມ່ ພາຍໃນ 1 ຊົ່ວໂມງຫລັງເກີດ, 40% ​ແມ່ນ​ລ້ຽງລູກ​ດ້ວຍນົມ​ແມ່​ຢ່າງ​ດຽວ ​ແຕ່​ມື້​ເກີດ​ຮອດ​ອາຍຸ 6 ​ເດືອນ, 73% ​ແມ່ນ​ສືບ​ຕໍ່ລ້ຽງລູກດ້ວຍນົມແມ່ ຮອດ​ອາຍຸ 1 ປີ ​ແລະ 40% ​ແມ່ນ​ສືບ​ຕໍ່​ລ້ຽງລູກ​ດ້ວຍ​ນົມ​ແມ່ ​ຮອດ​ອາຍຸ 2 ປີ ​ເຖິງ​ແນວ​ໃດ​ກໍ​ດີ ອັດຕາ​ການ​ລ້ຽງລູກ​ດ້ວຍນົມ​ແມ່ ​ໃນ​ສປປ ລາວ ຍັງ​ຖື​ວ່າຢູ່​ໃນ​ລະດັບ ​ຕ່ຳ​ກວ່າ​ເປົ້າໝາຍ ທີ່​ວ່າງ​ໄວ້​ເພື່ອ​ສະໜັບ ສະໜູນ ຊ່ວຍ​ເຫລືອ​ແມ່ ​ໃຫ້​ໄດ້​ລ້ຽງລູກ​ດ້ວຍ​ນ້ຳນົມ​ແມ່​ຢ່າງ​ດຽວ ຮອດ​ອາຍຸ 6 ​ເດືອນ ​ແລະ ສືບ​ຕໍ່​ລ້ຽງລູກ​ດ້ວຍ​ນົມ​ແມ່​ ຈົນ​ຮອດ 2 ປີ ຫລື ຫລາຍ​ກວ່າ​ນັ້ນ ສປປ ລາວ ​ໄດ້​ມີ​ກົດໝາຍ​ແຮງ​ງານ ​ໃຫ້​ແມ່ຍິງ ທັງ​ພັກ​ລັດ ​ແລະ ​ເອກ​ກະ​ຊົນ ລາ​ພັກ ​ເກີດ​ລູກ​​ເພີ່ມ​ຂຶ້ນ​ເປັນ 105 ວັນ ພ້ອມ​ເງິນ​ເດືອນ​ເຕັມ ຈາກ​ແຕ່​ກ່ອນ​ມີ​ພຽງ 90 ວັນ, ​ແລະ ​ແມ່ລູກອ່ອນ ​ສາມາດ​ພັກ​ການ​ໄດ້ວັນ​ລະ 1 ຊົ່ວ​ໂມງ​ ເພື່ອ​ໃຫ້​ລູກ​ກິນ​ນ້ຳນົມ​ແມ່ ​ເຊິ່ງຕໍ່​ມາ​​ໄດ້​ມີກົດໝາຍສຳລັບລັດຖະກອນ ​ທີ່​ສາມາດໃຫ້​ແມ່ຍິງ​ລາ​ພັກ​ ໄດ້​ຮອດ 5 ​ເດືອນ​ເຕັມ ພ້ອມ​ເງິນ​ເດືອນ​ເຕັມ  ນອກ​ນັ້ນ​ ຍັງ​ຮຽກຮ້ອງ​ໃຫ້​ອົງການຈັດ​ຕັ້ງ​ຕ່າງໆ ຈັດ​ຫ້ອງ​​ໃຫ້ນົມ​ ສຳລັບ​ແມ່ລູກອ່ອນ ທີ່​ສາມາດ​ເອົາ​ລູກ​ກິນ​ນົມ​ແມ່ ຫລື​ ບີບ​ນ້ຳນົມ​ແມ່​ໄວ້​ໃຫ້​ລູກ​ກິນ.

ທ່ານ ນາງ ຄຳເສັງ ພິລາວົງ ຍັງ​ກ່າວ​ຕື່ມ​ອີກ​ວ່າ: ນໍ້ານົມ​ແມ່​ແມ່ນ​ອາຫານ​ທີ່​ດີ​ສຸດ ​ສໍາລັບ​ເດັກ, ມີ​ຄຸນ​ປະ​ໂຫຍ​ດມະຫາສານ ​ເຮັດ​ໃຫ້​ເດັກ​ສຸຂະພາບ​ແຂງ​ແຮງ, ມີ​ໂພ​ສະນາ​ການ​ດີ, ມີ​ການຈະ​ເລີ​ນ​ເຕີບ​ໂຕ, ການ​ພັດທະນາ​ຮ່າງກາຍ ​ແລະ ສະໜອງ​ດີ, ​ເຮັດ​ໃຫ້​ເດັກ​ສະຫລາດ ​ຮຽນ​ຮູ້​ໄດ້​ໄວ ​ເພາະວ່ານົມ​ແມ່​ມີ​ສານ​ອາຫານ​ຄົບຖ້ວນ ​ແລະ ຊ່ວຍ​ປົກ​ປ້ອງ​ເດັກ​ຈາກ​ພະຍາດ​ຊືມ​ເຊື້ອ.

ຂຽນຂ່າວ: ກິດ​ຕາ.
ພາບປະກອບຂ່າວ: ​ເກດສະໜາ
ແຫລ່ງຂ່າວ: ສຳນັກຂ່າວສານປະເທດລາວ