ສຳນັກຂ່າວຕ່າງປະເທດລາຍງານ ໃນວັນທີ 27 ກໍລະກົດນີ້ວ່າ ນ້ຳຖ້ວມຂັງຢູ່ຖະໜົນສາຍໜຶ່ງ ໃຈກາງນະຄອນຫລວງທາກາ ປະເທດບັງກາລາເດສ ໄດ້ຮັບຄວາມສົນໃຈຈາກທົ່ວໂລພກ ພາຍຫລັງທີ່ນ້ຳຖ້ວມຂັງດັ່ງກ່າວ ໄດ້ກາຍສະພາບເປັນສີຂຽວອົມຟ້າ ແຕກຕ່າງໄປຈາກນ້ຳຖ້ວມຂັງທົ່ວໆໄປ ທີ່ຈະເປັນສີຂຸ່ນດຳ.
ສະພາບນ້ຳຖ້ວມຂັງດັ່ງກ່າວ ແມ່ນເກີດຈາກປະລິມານຝົນຕົກລົງມາຢ່າງຕໍ່ເນື່ອງ ພາຍໃນພື້ນທີ່ນະຄອນຫລວງທາກາ ເມື່ອວັນທີ 25 ກໍລະກົດເປັນຕົ້ນມາ ເຮັດໃຫ້ຫລາຍພື້ນທີ່ຂອງຕົວເມືອງມີນ້ຳຖ້ວມຂັງ ຍ້ອນທໍ່ລະບາຍນ້ຳບໍ່ສາມາດລະບາຍນ້ຳອອກໄດ້ທັນ ເຮັດໃຫ້ຖະໜົນສາຍໜຶ່ງ ມີນ້ຳກາຍເປັນສີຂຽວອົມຟ້າ ສ້າງສີສັນແປກຕາ ໂດຍບໍ່ແມ່ນການໃຊ້ແອ໊ບພິເຄຊັນ ເພື່ອຕົບແຕ່ງຮູບພາບແຕ່ປະການໃດ.
ທັງນີ້ ອີງຕາມແຫລ່ງຂ່າວໄດ້ລະບຸວ່າ ການທີ່ນ້ຳປ່ຽນເປັນສີຂຽວອົມຟ້າດັ່ງກ່າວ ແມ່ນເນື່ອງຈາກສານເຄມີຂອງໂຮງຈັກໂຮງງານ ພາຍໃນບໍລິເວນດັ່ງກ່າວ ທີ່ປ່ອຍລົງສູ່ທໍ່ລະບາຍນ້ຳແບບບໍ່ຖືກກົດໝາຍ ເຮັດໃຫ້ນ້ຳເກີດປະຕິກິລິຍາເຄມີ ຈົນກາຍສະພາບປ່ຽນສີຄືດັ່ງກ່າວ.