ສຳນັກຂ່າວຕ່າງປະເທດ ລາຍງານໃນວັນທີ 24 ກໍລະກົດຜ່ານມານີ້ວ່າ ກະຊວງສາທາລະນະສຸກ ແລະ ກິລາມຽນມາ ອອກຄຳຖະແຫລງ ພົບຜູ້ຕິດເຊື້ອໄວຣັສໄຂ້ຫວັດໃຫຍ່ສາຍພັນ H1N1 ຈຳນວນ 13 ຄົນ ໂດຍ 3 ຄົນພົບຢູ່ນະຄອນຢາງກຸ້ງ ແລະ ອີກ 10 ຄົນ ພົບໃນເມືອງມາຕູປີ ເມືອງຫ່າງໄກສອກຫລີກຂອງລັດຊິນ ໃກ້ກັບຊາຍແດນອິນເດຍ. ທ່ານ ວິນ ລະວິນ ຜູ້ອຳນວຍການສຳນັກງານສາທາລະນະສຸກ ເຂດຢາງກຸ້ງ ໄດ້ກ່າວຕໍ່ສື່ມວນຊົນວ່າ ມີເດັກນ້ອຍຊາຍອາຍຸ 6 ປີ ໃນຈຳນວນຜູ້ຕິດເຊື້ອຢູ່ເມືອງມາຕູປີ ເສຍຊີວິດຈາກບັນຫາກ່ຽວກັບລະບົບທາງເດີນຫາຍໃຈ ຊຶ່ງຄາດວ່າມີສາເຫດມາຈາກເຊື້ອໄວຣັສ H1N1.
ແນວໃດກໍຕາມ, ກະຊວງສາທາະລະນະສຸກ ແລະ ກິລາມຽນມາ ໄດ້ແຈ້ງເຕືອນປະຊາຊົນ ບໍ່ໃຫ້ຕົກໃຈ ເນື່ອງຈາກກໍລະນີພະຍາດດັ່ງກ່າວນີ້ ພົບເຫັນທຸກໆປີ ພ້ອມທັງແນະນຳໃຫ້ຜູ້ທີ່ມີອາການປ່ອຍໄຂ້ ໃຫ້ເຂົ້າຮັບການປິ່ນປົວຢ່າງຖືກວິທີຢູ່ຕາມສຸກສາລາ ແລະ ໂຮງໝໍຂອງລັດຖະບານ.