ສຳນັກຂ່າວເອເອບພີ ລາຍງານໃນວັນທີ 25 ກໍລະກົດນີ້ວ່າ ທ່ານ ໂດນັນ ທຣັມ ປະທານາທິບໍດີສະຫະລັດອາເມຣິກາ ໄດ້ປະກາດໃນມື້ນີ້ (25 ກໍລະກົດ) ໂດຍສັ່ງໃຫ້ມີການຢຸຕິໂຄງການສະໜັບສະໜູນ ກຸ່ມຕໍ່ຕ້ານລັດຖະບານຊີຣີ ຊຶ່ງດຳເນີນການຕໍ່ສູ້ໂຄ່ນລົ້ມລັດຖະບານ ພາຍໃຕ້ການນຳຂອງທ່ານ ບາຊາ ອັນ-ອັສຊາດ ເນື່ອງຈາກຄວາມກົດດັນທີ່ເຫັນວ່າ ການສະໜັບສະໜູນດັ່ງກ່າວ ເປັນສິ່ງທີ່ໜັກໜາ ອັນຕະລາຍ ແລະ ຟຸ່ມເຟືອຍ.
ການປະກາດດ່ັງກ່າວຂອງຜູ້ນຳອາເມຣິກາຄັ້ງນີ້ ສອດຄ່ອງກັບຄວາມຄິດເຫັນຂອງ ທ່ານ ພົນເອກ ໂທນີ ໂທມັສ ຫົວໜ້າປະຕິບັດການພິເສດຂອງສະຫະລັດອາເມຣິກາ ທີ່ໄດ້ອອກມາຢືນຢັນວ່າງບໍ່ດົນມານີ້ວ່າ ປະຕິບັດການຕ່າງໆທີ່ຍາວນານ 4 ປີ ໄດ້ຖືກຍົກເລີກແລ້ວ.
ທັງນີ້, ອະດີດປະທານາທິບໍດີ ບາຣັກ ໂອບາມາ ຂອງອາເມຣິກາ ໄດ້ອະນຸມັດໂຄງການຊ່ວຍເຫລືອ ກຸ່ມຕໍ່ຕ້ານລັດຖະບານຊີຣີ ເມື່ອປີ 2013 ໂດຍນັກຮົບກຸ່ມດັ່ງກ່າວຫລາຍພັນຄົນ ໄດ້ຮັບການເຝິກສອນ ແລະ ຕິດອາວຸດໂດຍກອງທັບສະຫະລັດ, ແນວໃດກໍຕາມ ແຮງສະໜັບສະໜູນດັ່ງກ່າວ ໄດ້ຖືກຕໍ່ຕ້ານລົງຢ່າງກວ້າງຂວາງ ພາຍຫລັງທີ່ກຸ່ມຕໍ່ຕ້ານລັດຖະບານຊີຣີ ກຳລັງຢູ່ໃນທ່າປະລາໄຊ.
ເປັນທີ່ໜ້າສັງເກດວ່າ ການປະກາດດັ່ງກ່າວນີ້ຂອງ ທ່ານ ໂດນັນ ທຣັມ ໄດ້ມີຂຶ້ນ ພາຍຫລັງທີ່ທ່ານໄດ້ພົບປະກັບ ປະທານາທິບໍດີ ວະລາດີເມຍ ປູຕິນ ຜູ້ນຳຣັດເຊຍ ລະຫວ່າງກອງປະຊຸມ ຈີ 20 ທີ່ນະຄອນຮຳເບີກ ປະເທດເຢຍລະມັນ ຊຶ່ງເປັນການພົບປະກັນຄັ້ງທຳອິດເມື່ອຕົ້ນເດືອນທີ່ຜ່ານມານີ້.