ຂປລ. ສະມາຄົມມິດຕະພາບລາວ-ຫວຽດນາມ, ຫວຽດນາມ-ລາວ ໄດ້ຮ່ວມເປີດງານບຸນມະໂຫລານມິດຕະພາບ ລະຫວ່າງ ປະຊາຊົນລາວ ແລະ ປະຊາຊົນຫວຽດນາມ ຄັ້ງທີ IV ຂຶ້ນ ລະຫວ່າງວັນທີ 17-23 ກໍລະກົດ 2017ນີ້ ທີ່ຫໍປະຊຸມແຫ່ງຊາດ, ນະຄອນຫລວງວຽງຈັນ ໂດຍເປັນກຽດເຂົ້າຮ່ວມຂອງ ສະຫາຍ ສອນໄຊ ສີພັນດອນກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ຮອງປະທານຄະນະຊີ້ນຳລະດັບຊາດ ກ່ຽວກັບການສະເຫລີມສະຫລອງປີສາມັກຄີພິເສດ ລາວ-ຫວຽດນາມ, ສະຫາຍ ເຈິນ ວັນຕຸ້ຍ ກຳມະການສູນກາງພັກ, ກຳມະການຄະນະປະຈຳ, ຫົວໜ້າຄະນະຮັບຜິດຊອບ ສະມາຊິກສະພາແຫ່ງຊາດ ສສ ຫວຽດນາມ, ປະທານສະມາຄົມຫວຽດນາມ-ລາວ, ມີບັນດາປະທານສະມາຄົມມິດຕະພາບລາວ-ຫວຽດນາມ, ຫວຽດນາມ-ລາວ, ພ້ອມດ້ວຍພາກສ່ວນກ່ຽວຂ້ອງທັງສອງຝ່າຍເຂົ້າຮ່ວມ.
ງານບຸນມະໂຫລານດັ່ງກ່າວ, ຄະນະຜູ້ແທນປະຊາຊົນຂອງສອງປະເທດ ຈະໄດ້ຮ່ວມຈັດກິດຈະກຳຫລາຍຢ່າງ ເພື່ອສະເຫລີມສະຫລອງປີສາມັກຄີພິເສດ ລາວ-ຫວຽດນາມ ຄື: ວັນເຊັນສົນທິສັນຍາມິດຕະພາບ ແລະ ການຮ່ວມມືຄົບຮອບ 40 ປີ (18/7/1977-18/7/2017) ແລະ ວັນສ້າງຕັ້ງສາຍພົວ ພັນການທູດ ລາວ-ຫວຽດນາມ ຄົບຮອບ 55 ປີ (5/9/1962-5/9/2017) ຊຶ່ງລາວ-ຫວຽດນາມ ມີສາຍພົວພັນມິດຕະພາບອັນດູດດື່ມ, ຄວາມສາມັກຄີພິເສດ ແລະ ການຮ່ວມມືຮອບດ້ານມາແຕ່ດົນນານ ໂດຍສາຍພົວພັນດັ່ງກ່າວ ໄດ້ຮັບການພັດທະນາ ແລະ ເສີມຂະຫຍາຍ ເຂົ້າສູ່ລວງເລິກ ກາຍເປັນມໍລະດົກອັນລ້ຳຄ່າ, ເປັນກົດເກນແຫ່ງການຄົງຕົວ ແລະ ຂະຫຍາຍຕົວຂອງສອງປະເທດ, ທັງເປັນໜຶ່ງ ໃນປັດໄຈຕັດສິນໄຊຊະນະຂອງການປະຕິວັດ ຢູ່ແຕ່ລະປະເທດ, ເຊິ່ງປັດຈຸບັນສາຍພົວພັນທີ່ຫາຍາກນັ້ນ ຍັງສືບຕໍ່ໄດ້ຮັບການເສີມຂະຫຍາຍທັງທາງກວ້າງ ແລະ ລວງເລິກ ໂດຍໄດ້ນຳເອົາຜົນປະໂຫຍດຕົວຈິງ ມາສູ່ປະຊາຊົນສອງຊາດ ລາວ-ຫວຽດນາມ, ທັງເປັນການປະກອບ ສ່ວນເຂົ້າໃນພາລະກິດສັນຕິພາບ, ສະຖຽນລະພາບ, ການຮ່ວມມື ແລະ ການພັດທະນາໃນພາກພື້ນ ແລະ ໃນໂລກ. ສາຍພົວພັນດັ່ງກ່າວ, ເປັນຄວາມເອກອ້າງທະນົງໃຈ ທັງແມ່ນມູນມໍລະດົກ ອັນລ້ຳຄ່າຂອງປະຊາຊົນສອງຊາດລາວ-ຫວຽດນາມ ຢ່າງແທ້ຈິງ.
ແຫລ່ງຂ່າວ: ຂປລ