ສຳນັກຂ່າວຕ່າງປະເທດ ລາຍງານໃນວັນທີ 16 ກໍລະກົດຜ່ານມານີ້ວ່າ ປະຊາຊົນຊາວຕວກກີຈຳນວນຫລາຍແສນຄົນ ໄດ້ອອກມາເດີນຂະບວນສະເຫລີມສະຫລອງ ເພື່ອລະນຶກຄົບຮອບ 1 ປີ ການປາບປາມການກໍ່ລັດຖະປະຫານ ເມື່ອວັນເສົາທີ 15 ກໍລະກົດຜ່ານມານີ້ ຊຶ່ງທາງການໄດ້ປະກາດໃຫ້ກາຍເປັນວັນພັກລັດຖະການປະຈຳປີ ຊຶ່ງສະແດງໃຫ້ເຫັນເຖິງໄຊຊະນະຄັ້ງປະຫວັດສາດຂອງ ລະລອບປະຊາທິປະໄຕຕວກກີ.
ທ່ານ ເຣເຊບ ເຕຢິບ ເອີໂດກັນ ປະທານາທິບໍດີຕວກກີ ໄດ້ເຂົ້າຮ່ວມປາໄສຕໍ່ໜ້າມວນຊົນ ຢູ່ນະຄອນຫລວງອິສຕັນບູນ ໂດຍທ່ານໄດ້ກ່າວອີກວ່າ ຈະຊອກຫາຜູ້ທໍລະຍົດຕໍ່ປະເທດຊາດມາລົງໂທດໃຫ້ໝົດ ແລະ ຈະຜັກດັນໃຫ້ມີການປະກາດໃຊ້ໂທດປະຫານຊີວິດອີກເທື່ອໜຶ່ງ.
ທັງນີ້ ເມື່ອວັນທີ 15 ກໍລະກົດ 2016 ກອງກຳລັງສ່ວນໜຶ່ງຂອງກອງທັບຕວກກີ ໄດ້ສົ່ງລົດຕັງ ແລະ ກຳລັງທະຫານອອກມາຕາມຖະໜົນ ພ້ອມທັງເຮືອບິນຈຳນວນໜຶ່ງ ອອກປະຕິບັດການໂຄ່ນລົ້ມລັດຖະບານຕວກກີ ພາຍໃຕ້ການນຳຂອງທ່ານ ເອີໂດກັນ ແຕ່ຄວາມພະຍາຍາມດັ່ງກ່າວ ໄດ້ຖືກປາບປາມລົງໃນເວລາບໍ່ພໍເທົ່າໃດຊົ່ວໂມງ ຫລັງຈາກທີ່ເຈົ້າໜ້າທີ່ລັດຖະບານເລີ່ມເຄື່ອນໄຫວຕອບໂຕ້ ແລະ ປະຊາຊົນຈຳນວນຫລວງຫລາຍ ໄດ້ອອກມາເດີນຂະບວນສະໜັບສະໜູນລັດຖະບານ ແລະ ຕໍ່ຕ້ານລັດຖະປະຫານ.
ເຫດການດັ່ງກ່າວນີ້ ໄດ້ສົ່ງຜົນເຮັດໃຫ້ມີຜູ້ເສຍຊີວິດທັງໝົດ 249 ຄົນ, ມີຜູ້ຖືກຈັບກຸມຫລາຍກວ່າ 50,000 ຄົນ ແລະ ມີເຈົ້າໜ້າທີ່ພາກສ່ວນຕ່າງໆ ຖືກປົດຕຳແໜ່ງ ແລະ ສັ່ງໃຫ້ໂຈະການປະຕິບັດໜ້າທີ່ຊົ່ວຄາວເກືອບ 150,000 ຄົນ.