ສຳນັກຂ່າວຊານາຂອງລັດຖະບານຊີຣີ ໄດ້ລາຍງານວ່າ ເກີດເຫດກຸ່ມຕໍ່ຕ້ານລັດຖະບານຊີຣີ ລະດົມຍິງປືນຄົກໃສ່ຫລາຍພື້ນທີ່ຂອງ ນະຄອນຫລວງດາມັສກັສຂອງປະເທດ ເມື່ອວັນອາທິດທີ 16 ກໍລະກົດຜ່ານມາ ສົ່ງຜົນເຮັດໃຫ້ມີຜູ້ໄດ້ຮັບບາດເຈັບໄປ 7 ຄົນ ໃນຂະນະທີ່ມີລູກປືນຄົກ 2 ລູກ ຖືກຍິງໃສ່ສະຖານເອກອັກຄະລັດຖະທູດຣັດເຊຍ ປະຈຳຊີຣີ ຊຶ່ງໃນນັ້ນລູກໜຶ່ງໄດ້ເຂົ້າໄປຕົກຢູ່ດ້ານໃນສະຖານທູດ ແລະ ອີກລູກໜຶ່ງຕົກໃສ່ບໍລິເວນໃກ້ຄຽງ ສ້າງຄວາມເສຍຫາຍທາງດ້ານວັດຖຸໃຫ້ແກ່ສະຖານທູດດັ່ງກ່າວ.

ທັງນີ້ ສົງຄາມກາງເມືອງຢູ່ຊີຣີ ຊຶ່ງດຳເນີນມາເປັນເວລາ 7 ປີແລ້ວ ໄດ້ສັງຫານຜູ້ຄົນໄປປະມານ 475,000 ຄົນ ໃນຈຳນວນດັ່ງກ່າວນີ້ ເປັນພົນລະເຮືອນ 99,617 ຄົນ ນອກເໜືອໄປຈາກທະຫານຂອງລັດຖະບານຊີຣີ, ກຸ່ມຕໍ່ຕ້ານລັດຖະບານ ແລະ ກຸ່ມຕິດອາວຸດຫົວຮຸນແຮງອື່ນໆ.