ສຳນັກຂ່າວຣອຍເຕີ້ ລາຍງານໃນວັນທີ 13 ກໍລະກົດນີ້ວ່າ ໃນມື້ວັນພຸດທີ 12 ກໍລະກົດຜ່ານມາ (ຕາມເວລາໃນທ້ອງຖິ່ນ) ສານບຣາຊິນ ໄດ້ພິພາກສາລົງໂທດ ທ່ານ ລູອິດ ອິນາຊິໂອ ລູລາ ດາ ຊິນບາ ອະດີດປະທານາທິບໍດີບຣາຊິນ ຊຶ່ງດຳລົງຕຳແໜ່ງສະໄໝທຳອິດເມື່ອປີ 2003 ດ້ວຍການຕັດອິດສະຫລະພາບ 10 ປີ ຈາກຄວາມຜິດໃນຂໍ້ຫາສໍ້ລາດບັງຫລວງ, ຄຳພິພາກສາໄດ້ລະບຸວ່າ ທ່ານ ລູລາ ມີຄວາມຜິດຮັບເງິນສິນບົນ ມູນຄ່າ 3.7 ລ້ານຣຽວ ຫລື ປະມານ 1.2 ລ້ານໂດລາ ຈາກບໍລິສັດ OAS SA ໂດຍໄອຍະການໄດ້ລະບຸວ່າ ບໍລິສັດດັ່ງກ່າວໄດ້ທຸ່ມງົບປະມານເພື່ອຕົບແຕ່ງອາພາດເມັ້ນແຄມຊາຍຫາດຫລັງໜຶ່ງ ໃຫ້ແກ່ທ່ານ ລູລາ ເພື່ອແລກກັບການຊ່ວຍເຫລືອຂອງທ່ານ ໃຫ້ໄດ້ຮັບສັນຍາຈາກບໍລິສັດນ້ຳມັນແຫ່ງລັດ ເປໂຕຣບາສ.
ແນວໃດກໍຕາມ, ເຖິງແມ່ນທ່ານ ລູລາ ຈະຍັງບໍ່ທັນໄດ້ເຂົ້າຄຸກ ເນື່ອງຈາກຈະມີການຕໍ່ສູ້ຄະດີໃນຂັ້ນອຸທອນ ແຕ່ຄຳພິພາກສາຂອງສານດັ່ງກ່າວ ໄດ້ກໍ່ຄວາມເສຍຫາຍໃຫ້ແກ່ທ່ານ ສຳລັບໂອກາດໃນການຫວນຄືນເຂົ້າສູ່ເວທີການເມືອງ ໂດຍເປັນທີ່ຄາດການຈາກນັກວິເຄາະໃນບໍ່ດົນມານີ້ວ່າ ທ່ານ ລູລາ ຈະເປັນຕົວເຕັງສຳຄັນ ໃນການຊະນະເລືອກຕັ້ງປະທານາທິບໍດີບຣາຊິນ ສະໄໝໜ້າ.