ສຳນັກຂ່າວຊິນຮວາ ລາຍງານໃນວັນທີ 11 ກໍລະກົດຜ່ານມານີ້ວ່າ ທ່ານ ນາງ ອອງຊານຊູຈີ ທີ່ປຶກສາແຫ່ງລັດມຽນມາ ໄດ້ໃຫ້ຄຳໝັ້ນສັນຍາ ໃນການລິເລີ່ມແຜນປະຕິບັດການທາງຍຸດທະສາດ ປະຕິຮູບລະບົບລັດຖະການ ໃນໄລຍະ 4 ປີ ຊຶ່ງກຳນົດວິໄສທັດສຳລັບການປ່ຽນແປງໃນໄລຍະແຕ່ປີ 2017-2020 ເພື່ອເປັນແນວທາງໃນການປະຕິຮູບ ແນໃສ່ຮັບປະກັນໃຫ້ພະນັກງານ-ລັດຖະກອນ ມີຈະລິຍະທຳຫລາຍຂຶ້ນ ແລະ ສາມາດຊ່ວຍເຫລືອແກ້ໄຂບັນຫາສັນຕິພາບທີ່ຊັບຊ້ອນ, ການສ້າງຄວາມສາມັກຄີປອງດອງຊາດ, ການຕ້ານການສໍ້ລາດບັງຫລວງ ແລະ ການພັດທະນາປະເທດ ຊຶ່ງມຽນມາກຳລັງປະເຊີນໜ້າຢູ່ ໃຫ້ໄດ້ຢ່າງມີປະສິດທິພາບສູງ.
ທ່ານ ອອງຊານຊູຈີ ຍັງຮຽກຮ້ອງໃຫ້ຫລີກລ່ຽງແນວຄິດຂອງການລຳອຽງ ຫລື ການຫລິ້ນພັກຫລິ້ນພວກ ໂດຍກ່າວວ່າ ການປັບເລື່ອນຕຳແໜ່ງ ຈະຕ້ອງພິຈາລະນາດ້ວຍຫລັກການທີ່ໂປງໃສ ປາສະຈາກການເລືອກປະຕິບັດໃນຮູບແບບຕ່າງໆ, ພ້ອມກັນນັ້ນ ແຜນການປະຕິຮູບດັ່ງກ່າວນີ້ ຍັງລວມໄປເຖິງການເປີດເຜີຍຂໍ້ມູນຊັບສິນຂອງບຸກຄົນ ໃນຕຳແໜ່ງລະດັບສູງ ແລະ ການໃຊ້ເຕັກໂນໂລຊີທີ່ທັນສະໄໝ ເຂົ້າໃນຂະບວນການບໍລິຫານ ເພື່ອຫລຸດຊ່ອງວ່າງໃນການຮັບສິນບົນຂອງເຈົ້າໜ້າທີ່ລັດ.