Homeຂ່າວພາຍ​ໃນຮອງນາຍົກລັດຖະມົນຕີ ຕ້ອນຮັບປະທານກຸ່ມບໍລິສັດ ຊີພີ ປະເທດໄທ

ຮອງນາຍົກລັດຖະມົນຕີ ຕ້ອນຮັບປະທານກຸ່ມບໍລິສັດ ຊີພີ ປະເທດໄທ

Published on

ວັນ​ທີ 11 ກໍລະກົດ 2017 ທີ່ ​ສຳນັກງານ​ນາຍົກລັດຖະມົນຕີ ທ່ານ ສອນ​ໄຊ ສີ​ພັນ​ດອນ ຮອງ​ນາຍົກລັດຖະມົນຕີ​ ​ໄດ້​ໃຫ້ກຽດຕ້ອນຮັບ ການ​ເຂົ້າຢ້ຽມຂ່ຳນັບ ​ຂອງ ທ່ານ ສຸພະ​ກິດ ຈີຣະວະ​ນົນ ປະທານ​ກຸ່ມ​ບໍລິສັດ ຊີ​ພີ (ປະ​ເທດ​ໄທ) ພ້ອມ​ດ້ວຍ​ຄະນະ ​ເນື່ອງ​ໃນ​ໂອກາດ​ເດີນທາງ​ມາ​ຢ້ຽມຢາມ ​ແລະ ​ເຮັດ​ວຽກ ຢູ່ ສປປ ລາວ.

​​ໂອກາດ​ນີ້, ທ່ານ​ຮອງ​ນາຍົກລັດຖະມົນຕີ ​ໄດ້​ສະ​ແດງ​ຄວາມ​ຊົມຕໍ່ການ​ເດີນທາງ​ມາຢ້ຽມຢາມ ​ຂອງ​ຄະນະຜູ້​ແທນ​ຈາກ​ກຸ່ມ​ບໍລິສັດ ຊີ​ພີ (ປະ​ເທດ​ໄທ) ​ໃນ​ເທື່ອ​ນີ້ ​ໂດຍ​ສະ​ເພາະ ​ເພື່ອ​ເປັນ​ການ​ເສີມ​ຂະຫຍາຍ​ການ​ຮ່ວມ​ມື ດ້ານ​ການ​ພັດທະນາ​ພື້ນຖານ​ເສດຖະກິດ ​ໃນ ສປປ ລາວ ​ເຊິ່ງ​ມີ​ສາຂາ​ກວ່າ 40 ປະ​ເທດ​ໃນ​ໂລກ ​ ໄລຍະ​ຜ່ານ​ມາ ບໍລິສັດ CP ​ໄດ້​​ລົງທຶນ​ຈຳນວນໜຶ່ງ​ໃນ ສປປ ລາວ ​ໂດຍ​ສະ​ເພາະໃນ​ຂະ​​ແໜງປູກຝັງ ​ແລະ ລ້ຽງສັດ. ​

ໃນ​ປີ 2017 ບໍລິສັດ CP ຍັງ​ໄດ້​ເຊັນ​ສັນຍາ​ຊື້ໝາກກາ​ເຟ ຢູ່​ພາກ​ໃຕ້​ຂອງ​ລາວມູນ​ຄ່າ 75 ຕື້ກີບ ພ້ອມ​ນີ້, ຄະນະ​ນັກ​ລົງທຶນ​ຈາກ​ ບໍລິສັດ CP ຍັງ​ຈະ​ໄດ້​ຮ່ວມ​ກັບ​ພາກ​ທຸລະ​ກິດ​ຂອງ​ລາວ ​ເພື່ອ​ປຶກສາ​ຫາລື​ກັນ​ຕື່ມ​ອີກ ກ່ຽວກັບ​ທິດ​ທາງ​ການ​ພັດທະນາ​ທຸລະ​ກິດ ​ໃນ ສປປ ລາວ ທັງ​ເປັນ​ການ​ສ້າງ​ຖານ​ການ​ຜະລິດ​ເພື່ອ​ສົ່ງ​ອອກ ​ໃນ​ເງື່ອນ​ໄຂ​ການ​ເຊື່ອມ​ໂຍງ​ພາກພື້ນ ​ແລະ ສາກົນ, ການ​ສົ່ງ​ເສີມ​ການ​ຜະລິດ ຕິດ​ພັນ​ກັບ​ການ​ແກ້​ໄຂ ​ຄວາມທຸກ​ຍາກ​ຂອງ​ປະຊາຊົນ, ການ​ສ້າງ​ເຄື່ອງໝາຍການ​ຄ້າ ​ທີ່​ເປັນ​ຂອງ​ລາວ ​ແລະ ການ​ລົງທຶນ ​ໃນ​ຮູບ​ແບບ​ອື່ນໆ ທີ່​ນອນ​ໃນ​ຂະ​ແໜງການ​ປູກຝັງ-​ລ້ຽງສັດ​ຂອງ​ລາວ. ​

ທ່ານ​ ສອນ​ໄຊ ສີ​ພັນ​ດອນ ​ແລະ ທ່ານ ສຸພະ​ກິດ ຈີຣະວະ​ນົນ ຍັງ​ໄດ້​ແລກປ່ຽນຄຳ​ຄິດ​ຄຳ​ເຫັນ​ກັນ ​ໃນ​ບາງ​ບົດຮຽນ​ໃນ​ການ​ພັດທະນາ ​ເປັນຕົ້ນ ບົດຮຽນ​ໃນ​ການ​ພັດທະນາ​ທີ່​ດິນ ​ແລະ ອະສັງຫາລິມມະ​ຊັບ, ການລະດົມ​ແຫລ່ງທຶນ-​ຕະຫລາດທຶນ. ​

ໃນ​ຕອນ​ທ້າຍ, ທ່ານ​ຮອງ​ນາ​ຍົກ​ລັດຖະມົນຕີ ຍັງ​ໄດ້​ສະ​ແດງ​ຄວາມ​ຫວັງ​ວ່າ ນອກຈາກ​ການ​ຮ່ວມ​ມື​ພັດທະນາ​ດັ່ງກ່າວ​ແລ້ວ, ທັງ​ສອງ​ຝ່າຍ ຕ້ອງ​ໄດ້​ເອົາ​ໃຈ​ໃສ່​ຕື່ມ ​ໃນ​ບາງ​ຂະ​ແໜງການ​ທີ່​ມີ​ຄວາມ​ຈຳ​ເ​ປັນ ​ແລະ ​ທີ່ເປັນ​ທ່າ​ແຮງ​ຂອງ ສປປ ລາວ ​ໂດຍ​ສະ​ເພາະ ດ້ານ​ການ​ລ້ຽງສັດ ​ແລະ ປູກຝັງ ທີ່​ຕ້ອງ​ໄດ້​ຍົກ​ຄຸນ​ນະພາ​ບ ​ແລະ ສ້າງ​ກາໝາຍ ​ໃນ​ບາງ​ສິນຄ້າ​ທີ່​ຈຳ​ເປັນ ​ເພື່ອ​ການ​ສົ່ງ​ອອກ, ການ​ປັບປຸງຍົກ​ລະດັບ​ດ້ານ​ປັດ​ໄຈ​ການ​ຜະລິດ ທັງ​ທາງ​ດ້ານ​ຝຸ່ນ, ປຸ໋ຍ, ຫົວ​ອາຫານ ​ແລະ ​ແນວ​ພັນ ​ເພື່ອ​ເຮັດ​ໃຫ້ການ​ຜະລິດ ມີ​ຕົ້ນທຶນ​ທີ່​ຕ່ຳລົງ ແລະ ສາມາດ​ແຂ່ງຂັນ​ໄດ້, ການ​ຮ່ວມ​ມື​ດ້ານ​ການທ່ອງທ່ຽວ ​ທັງ​ການພັດທະນາ​ແຫຼ່ງທ່ອງ​ທ່ຽວ, ການ​ດຶງ​ດູດ​ນັກ​ທ່ອງທ່ຽວ ​ແລະ ສະຖານ​ທີ່​ພັກຜ່ອນ ຕາມ​ແຫລ່ງທຳ​ມະ​ຊາດ​ທີ່​ສວຍ​ງາມ, ອາກາດ​ບໍລິສຸດ ​ໃຫ້​ໄດ້​ມາດຕະຖານ​ສາກົນ ​​ແຕ່ເປັນ​ເອກະ​ລັກສະ​ເພາະ​ຂອງ​ລາວ.

 

ແຫລ່ງຂ່າວ: ສຳນັກຂ່າວສານປະເທດລາວ

ບົດຄວາມຫຼ້າສຸດ

ແຂວງຊຽງຂວາງ ໄດ້ຊີ້ແຈງເຫດການປາຕາຍ ແມ່ນເກີດມາຈາກ ບຸກຄົນລັກລອບແຊ່ແຮ່ຄໍາ

ໃນວັນທີ 19 ພະຈິກ 2026, ຄະນະທີມງານສະເພາະກິດເມືອງແປກ ແຂວງຊຽງຂວາງ ໄດ້ຊີ້ແຈງເຫດການປາຕາຍເປັນຈໍານວນຫລາຍໃນນໍ້າຫ້ວຍຫີນລາຍ ລະຫວ່າງຊາຍແດນບ້ານຍວນ ແລະ ບ້ານໂພນງາມເໜືອ ເມືອງແປກ ແມ່ນເກີດມາຈາກ ບຸກຄົນລັກລອບແຊ່ແຮ່ຄໍາທີ່ບໍ່ຖືກຕ້ອງຕາມກົດໝາຍ ຢູ່ບ້ານໂພນງາມເໜືອ....

ໂດຍຕອບສະໜອງຄໍາເຊື້ອເຊີນຂອງສະຫາຍ ຢູນ ເຈີງ ໂຮ, ລັດຖະມົນຕີກະຊວງພົວພັນເສດຖະກິດກັບຕ່າງປະເທດ ແຫ່ງ ສປປ ເກົາຫຼີ, ສະຫາຍ ມະໄລທອງ ກົມມະສິດ, ລັດຖະມົນຕີກະຊວງອຸດສາຫະກໍາ ແລະ ການຄ້າ...

ໄລຍະ 9 ເດືອນ ປີ 2026, ແຂວງອັດຕະປື ກໍ່ຄືພະແນກໂຍທາທິການ ແລະ ຂົນສົ່ງແຂວງ ໄດ້ເປັນເຈົ້າການຕິດຕາມ ແລະ ຄວບຄຸມຄຸນນະພາບໂຄງການກໍ່ສ້າງ-ສ້ອມແປງຂົວ-ທາງ ທີ່ເປັນໂຄງການສືບຕໍ່ ຈໍານວນ...

ທ່ານ ອາລຸນໄຊ ສູນນະລາດ ກຳມະການສູນກາງພັກ ເລຂາຄະນະບໍລິຫານງານພັກແຂວງຈໍາປາສັກ ໄດ້ຕ້ອນຮັບ ທ່ານ ເຫຼັກໄຫຼ ສີວິໄລ ກໍາມະການສູນກາງພັກ ລັດຖະມົນຕີກະຊວງໂຍທາທິການ ແລະ ຂົນສົ່ງ (ຍທຂ)...