ສຳນັກຂ່າວເອເອັບພີ ລາຍງານໃນວັນທີ 4 ກໍລະກົດຜ່ານມານີ້ວ່າ ອົງການສາກົນເພື່ອການຍົກຍ້າຍຖິ່ນຖານ (International Organization for Migration: IOM) ຊຶ່ງເປັນໜ່ວຍງານຂອງ ອົງການສະຫະປະຊາຊາດ ໄດ້ອອກມາລະບຸວ່າ ນັບຕັ້ງແຕ່ຕົ້ນເດືອນມັງກອນ ຈົນເຖິງວັນທີ 3 ກໍລະກົດປີນີ້ ມີຈຳນວນຜູ້ອົບພະຍົບ ເດີນທາງເຂົ້າສູ່ເອີຣົບແລ້ວທັງໝົດ 101,070 ຄົນ ຊຶ່ງທຽບກັບໄລຍະເວລາດຽວກັນຂອງປີກາຍ ມີຈຳນວນ 231,503 ຄົນ ເຫັນວ່າມີທ່າອ່ຽງຫລຸດລົງ.

ທັງນີ້ ອີຕາລີ ເປັນປະເທດທີ່ເປີດຮັບເອົາຜູ້ອົບພະຍົບຫລາຍທີ່ສຸດ ກວມເອົາເຖິງ 85% ຂອງຈຳນວນຜູ້ອົບພະຍົບ ຊຶ່ງທາງການອີຕາລີ ໄດ້ຮຽກຮ້ອງໃຫ້ບັນດາປະເທດເອີຣົບອື່ນໆ ເປີດທ່າເຮືອ ແລະ ສົ່ງເຮືອອອກໄປຊ່ວຍບັນດາຜູ້ອົບພະຍົບ ທີ່ກຳລັງຂ້າມທະເລເມດິແຕຣານຽນ ໂດຍທ່ານ ວິນລຽມ ສະວິງ ຜູ້ອຳນວຍການ ອົງການສາກົນເພື່ອການຍົກຍ້າຍຖິ່ນຖານ ຫລື IOM ໄດ້ກ່າວວ່າ ການຊ່ວຍເຫລືອຜູ້ອົບພະຍົບ ບໍ່ຄວນເບິ່ງວ່າເປັນໜ້າທີ່ຂອງອີຕາລີພຽງລຳພັງ ແຕ່ບັນຫາດັ່ງກ່າວນີ້ ຕ້ອງເປັນເລື່ອງຂອງເອີຣົບທັງໝົດ.