ກວ່າ 160 ປີທີ່ລິບທຳງານດ້ວຍການໃຊ້ສະລິງຫິ້ວຫ້ອງໂດຍສານ (cabin) ໃຫ້ເຄື່ອນທີ່ຂຶ້ນ ແລະ ລົງ ແຕ່ໃນອານາຄົດອັນໃກ້ນີ້ສະລິງອາດຈະບໍ່ໄດ້ນຳມາໃຊ້ງານອີກແລ້ວ ເມື່ອ ThyssenKrupp AG ບໍລິສັດໃຫຍ່ຂອງເຢຍລະມັນໄດ້ອອກແບບລິບໄຮເທັກທີ່ບໍ່ໃຊ້ສະລິງ ສາມາດເຄື່ອນທີ່ທັງຂຶ້ນ-ລົງໃນແນວດິ່ງ ແລະ ເຄື່ອນທີ່ໃນແນວຮາບພຽງໄດ້ ເຊິ່ງຈະເອີ້ນວ່າ “MULTI” ຈະເລີ່ມຕິດຕັ້ງໃຊ້ງານໃນນະຄອນຫຼວງ ເບີລິນ ປະເທດເຢຍລະມນເປັນແຫ່ງທຳອິດຂອງໂລກ
ລິບ MULTI ໃຊ້ເທັກໂນໂລຢີ Maglev (magnetically levitating) ແບບດຽວກັບລົດໄຟຄວາມໄວສູງທີ່ທັນສະໄໝທີ່ສຸດໃນປັດຈຸບັນ ທົດແທນການໃຊ້ສະລິງຫິ້ວແບບເກົ່າ ໂດຍຫ້ອງໂດຍສານຈະລອຍ ແລະ ເຄື່ອນທີ່ຢູ່ໃນຮາງທີ່ຕິດຕັ້ງຢູ່ໃນຊ່ອງລິບພາຍໃນອາຄານ
ບໍລິສັດ ThyssenKrupp AG ໄດ້ປະກາດແນວຄິດໃນທາງສ້າງລິບລະບົບໃໝ່ນີ້ຕັ້ງແຕ່ປີ 2014 ແລະ ຫາກໍ່ເຜີຍລາຍລະອຽດການອອກແບບໃນອາທິດນີ້ ລະບົບ MULTI ລິບຊຸດທຳອິດຈະຕິດຕັ້ງໃນໂຄງການອາຄານສຳນັກງານ East Side Tower Building ໃນນະຄອນຫຼວງ ເບີລິນ ປະເທດ ເຢຍລະມັນ ຕົວອາຄານມີຄວາມສູງ 140 ແມັດ ຄາດວ່າຈະສ້າງແລ້ວໃນປີ 2020
ວິດີໂອຈາກ: thyssenkrupp