ເຖິງແມ່ນປະທານບໍລິສັດພີເອັສ ທ່ານນາງ ສຸກນາລີ ເທບສີເມືອງ ຫາກໍ່ອອກແຈ້ງການໄປໝາດໆຫວ່າງວັນທີ 12 ມິຖຸນາ 2017 ຜ່ານມາວ່າ: ປະທານບໍລິສັດຈະບໍ່ໜີໄປໃສ ແລະຢືນຢູ່ບົນພື້ນຖານແຫ່ງຄວາມເປັນຈິງ ເອົາຫຼັກຖານຂໍ້ມູນຕົວຈິງມາແກ້ໄຂບັນຫາໃຫ້ສະມາຊິກ, ຈະເຮັດລາຍງານໄປຫາທະນາຄານແຫ່ງ ສປປ ລາວ ພາຍໃນ 2 ເດືອນຂ້າງໜ້າກໍ່ຄືເດືອນ ສິງຫາປີ 2017 ນີ້ ແຕ່ຕອນແລງຂອງວັນທີ 14 ມິຖຸນາ 2017 ນີ້ປະທານບໍລິສັດອີກຄົນໜຶ່ງຄື ທ່ານປໍເຮີ່ ໄດ້ປະກາດແບບບໍ່ເປັນທາງການໃນກຸ່ມລູກຄ້າວ່າ: “ບໍລິສັດພີເອັສທີ່ສ້າງມາກັບມືປະທານທັງສອງໄດ້ພະຍາຍາມຮັກສາໃຫ້ຢູ່ຢ່າງຍາວນານທີ່ສຸດ ແຕ່ສຸດຢື້ໄດ້ພຽງເທົ່ານີ້ແລ້ວເພາະບໍ່ສາມາດຕົກລົງກັບພາກລັດໄດ້ ຍ້ອນການໂຈມຕີທີ່ຮຸນແຮງຂອງລູກຄ້າຈຳນວນຫຼວງຫຼາຍທີ່ບໍ່ເຂົ້າໃຈ”.

ປະທານບໍລິສັດໄດ້ກ່າວຕື່ມອີກວ່າ: “ຈາກນີ້ຖ້າລູກຄ້າຄົນໃດບໍ່ພໍໃຈກັບບໍລິສັດແມ່ນໃຫ້ໄປພົວພັນ(ໄປຟ້ອງ) ກັບພາກລັດດ້ວຍໂຕເອງ ຫຼື ໄປລົມກັນກັບໜ່ວຍງານກົດໝາຍຂອງບໍລິສັດພີເອັສ ຊຶ່ງເປັນໄປຕາມແຈ້ງການຂອງທ່ານ ນາງ ສຸກນາລີ ເທບສີເມືອງ ທີ່ລະບຸວ່າ ຖ້າລູກຄ້າທ່ານໃດທີ່ຕ້ອງການຍົກເລີກສັນຍາແມ່ນໃຫ້ໄປພົວພັນກັບພະແນກກົດໝາຍປະຈຳຢູ່ບໍລິສັດນັບແຕ່ວັນຈັນ-ວັນເສົາຕາມໂມງລັດຖະການ”.

ແຫລ່ງຂ່າວ: ລາວອັບເດດ