ທົ່ວປະເທດ ໄດ້ຈັດການສອບເສັງ ຈົບຊັ້ນມັດທະຍົມຕົ້ນ (ມ4) ພ້ອມກັນໃນວັນທີ 13-15 ມິຖຸນາ 2017 ນີ້. ສົກຮຽນນີ້ ມີນັກຮຽນເຂົ້າສອບເສັງທັງໝົດ 97.095 ກວ່າຄົນ, ຍິງ 46.480 ກວ່າຄົນ. ທຽບໃສ່ສົກຮຽນ ປີຜ່ານມາເພີ່ມຂຶ້ນ 7.800 ກວ່າຄົນ. ມີ 688 ສູນສອບເສັງ, 4.560 ຫ້ອງສອບເສັງ. ມີ 6 ວິຊາ ຄື: ພາສາລາວ-ວັນນະຄະດີ, ຄະນິດສາດ, ວິທະຍາສາດ-ທໍາມະຊາດ, ວິທະສາດ-ສັງຄົມ, ສຶກສາພົນລະເມືອງ ແລະ ພາສາອັງກິດ.
ອາຈານ ພູມີ ພົມແກ້ວນາ ຜູ້ອໍານວຍການໂຮງຮຽນ ມສ ໄຊເສດຖາ, ທັງເປັນຫົວໜ້າຮັບຜິດຊອບສູນສອບເສັງດັ່ງກ່າວ, ໄດ້ໃຫ້ສໍາພາດຕໍ່ນັກຂ່າວ ສໍານັກຂ່າວສານປະເທດລາວ ໃນວັນທີ 13 ມິຖຸນາ ນີ້ ວ່າ: ສະເພາະຢູ່ນະຄອນຫລວງວຽງຈັນ ໄດ້ຈັດເປັນ 28 ສູນສອບເສັງ, ມີ 572 ຫ້ອງສອບເສັງ, ມີນັກສອບເສັງທັງໝົດ 11.404 ຄົນ, ຍິງ 5.599 ຄົນ, ມີກຳມະການຍາມຫ້ອງເສັງ 1.203 ຄົນ.
ສ່ວນສູນສອບເສັງ ມສໄຊເສດຖາ ກໍເປັນອີກສູນສອບໜຶ່ງ ທີ່ໄດ້ເອົາໃຈໃສ່ໃຫ້ແກ່ບັ້ນສອບເສັງຈົບຊັ້ນໃນຄັ້ງນີ້ ບໍ່ວ່າຈະເປັນຄວາມພ້ອມທາງດ້ານສະຖານທີ່ຫ້ອງສອບເສັງ, ຄະນະກໍາມະການຍາມຫ້ອງສອບເສັງ ແລະ ອື່ນໆ. ສູນດັ່ງກ່າວ, ມີນັກຮຽນຈາກ 6 ໂຮງຮຽນ ມາເສັງຮ່ວມກັນ ຄື: ມສ ອິດສະເຕີນສະຕຣາ, ມສ ປັນຍາທິບ, ມສ ໂພນທັນ, ມໍຕົ້ນວິທະຍາ ແລະ ມໍຕົ້ນແກ້ວປັນຍາ ເຊິ່ງມີນັກສອບເສັງທັງໝົດ 381 ຄົນ, ຍິງ 183 ຄົນ.
ຮຽບຮຽງຂ່າວ: ຂັນໄຊ
ພາບປະກອບ:ສະຫວັດ