ສຳນັກຂ່າວເອພີລາຍງານຈາກນະຄອນຫຼວງໂຊລ ປະເທດເກົາຫຼີໃຕ້ ເມື່ອວັນທີ 12 ມິຖຸນາ 2017ວ່າ ຖະແຫລງການຂອງທຳນຽບຂາວປະທານາທິບໍດີແຫ່ງເກົາຫຼີໃຕ້ ລະບຸວ່າ ປະທານາທິບໍດີ ມຸນ ແຈ-ອິນ ແຫ່ງເກົາຫຼີໃຕ້ໄດ້ສະເໜີຕົວໃນການເປັນເຈົ້າພາບຈັດການແຂ່ງຂັນບານໂລກ 2030 ກັບປະເທດຄູ່ປໍລະປັກຢ່າງເກົາຫຼີເໜືອ ຮວມເຖິງປະເທດເພື່ອນບ້ານອື່ນໆຢູ່ໃນເຂດພາກພື້ນອາຊີຕະເວັນອອກສຽງເໜືອ ໃນລະຫວ່າງການຮ່ວມຫາລືກັບທ່ານ ຈິອານນີ ອິນຟານຕິໂນ ປະທານສະຫະພັນບານເຕະນານາຊາດ (ຟີຟ່າ) ທີ່ທຳນຽບຂາວປະທານາທິບໍດີເກົາຫຼີໃຕ້ໃນນະຄອນຫຼວງໂຊລ ເມື່ອວັນຈັນທີ 12 ມິຖຸນາ 2017 ທີ່ຜ່ານມາ.
ປະທານາທິບໍດີ ມຸນ ແຈ-ອິນ ກ່າວວ່າ “ຫາກເພື່ອນບ້ານໃນອາຊີຕະເວັນອອກສຽງເໜືອຮວມເຖິງເກົາຫຼີໃຕ້ ແລະ ເກົາຫຼີເໜືອ ສາມາດເປັນເຈົ້າພາບຮ່ວມຈັດການແຂ່ງຂັນບານໂລກໄດ້ ຕົນຄິດວ່າຈະຊ່ວຍສົ່ງເສີມສັນຕິພາບລະ ຫວ່າງເກົາຫຼີເໜືອ ແລະ ເກົາຫຼີໃຕ້ທີ່ແຫຼມເກົາຫຼີ ແລະ ໃນອາຊີຕະເວັນອອກສຽງເໜືອ ຕົນຢາກໃຫ້ທ່ານປະທານຟີຟ່າຮັບໄວ້ພິຈາລະນາດ້ວຍ ”
ສ່ວນປະທານຟີຟ່າກ່າວວ່າ “ຕົນເຄົາລົບຄວາມເຫັນຂອງປະທານາທິບໍດີ ມຸນ ແຈ-ອິນ ແລະ ຈະລົມເລື່ອງນີ້ກັບປະທານາທິບໍດີ ສີ ຈິ້ນຜິງ ຂອງຈີນໃນອາທິດໜ້າ”
ທັງນີ້ ຈີນກັບຍີ່ປຸ່ນໄດ້ສະເໜີຕົວມາແລ້ວວ່າ ຕ້ອງການທີ່ຈະເປັນເຈົ້າພາບບານໂລກພຽງຜູ່ດຽວ ແຕ່ເມື່ອອາທິດທີ່ຜ່ານມາ ແນວຄິດຂອງປະທານາທິບໍດີ ມຸນ ແຈ-ອິນ ທີ່ຈະຜັກດັນໃຫ້ເກີດການແລກປ່ຽນຂ້າມພົມແດນກັບເກົາຫຼີເໜືອຕ້ອງພົບກັບບັນຫາ ເມື່ອເກົາຫຼີເໜືອປະຕິເສດທີ່ຈະຮັບຄວາມຊ່ວຍເຫຼືອບັນເທົາທຸກຈາກກຸ່ມປະຊາຊົນຈາກນະຄອນຫຼວງໂຊລ.