ມາດຕາທີ 14 ຜົນກະທົບຕໍ່ເສດຖະກິດ-ສັງຄົມ: ການຊົມໃຊ້ຢາສູບ ນອກຈາກຈະມີຜົນຮ້າຍຕາມທີ່ໄດ້ກຳນົດໄວ້ໃນ ມາດຕາ 13 ຂອງກົດໝາຍສະບັບນີ້ແລ້ວ ຍັງເປັນການທຳລາຍສຸຂະພາບຂອງຜູ້ອອກແຮງງານ, ຜູ້ຜະລິດ ທັ່ງເພີ່ມຄ່າໃຊ້ຈ່າຍທີ່ບໍ່ຈຳເປັນ ຊຶ່ງເປັນຜົນກະທົບທາງລົບຕໍ່ການພັດທະນາເສດຖະກິດ-ສັງຄົມ ຂອງຊາດ ແລະ ເປັນການທຳລາຍສິ່ງແວດລ້ອມ.

ມາດຕາທີ 15 ຜົນກະທົບຕໍ່ຄອບຄົວ: ການຊົມໃຊ້ຢາສູບ ນອກຈາກຈະມີຜົນຮ້າຍຕາມທີ່ໄດ້ກຳນົດໄວ້ໃນ ມາດຕາ 13 ຂອງກົດໝາຍສະບັບນີ້ ແລະ ມີຜົນຮ້າຍຕໍ່ສະມາຊິກຂອງຄອບຄົວ ເປັນຕົ້ນ ແມ່ຍິງ ແລະ ເດັກນ້ອຍ ແລ້ວ ຜູ້ສູບຢາຍັງຕ້ອງໄດ້ຈ່າຍເງິນເຂົ້າໃນການຊື້ຢາສູບ ແລະ ປິ່ນປົວພະຍາດທີ່ເກີດຂື້ນ ຊຶ່ງເປັນການເພີ່ມພາລະແບກຫາບຂອງຄອບຄົວ.

ນອກຈາກນີ້ຢູ່ໃນຢາສູບຍັງມີສານພິດ ແລະ ສານທີ່ພາໃຫ້ເປັນພະຍາດມະເຮັງໃນຄວັນຢາສູບ:

– ຄວັນຢາສູບມີສານ ຄາບອນ ມໍນອກໄຊ ເປັນສານພິດແບບດຽວກັນກັບ ຄວັນທໍ່ລົດ.
– ຄວັນຢາສູບມີສານ ໄຮໂດຣເຈນ ໄຊຢາໄນ ແມ່ນແກັສພິດທີ່ທຳລາຍຫລອດປອດ ແລະ ຖົງປອດ.
– ນິໂກຕີນໃນຢາສູບ ເຮັດໃຫ້ເສບຕິດ ແລະ ໃຊ້ຜະລິດເປັນຢາຂ້າແມງໄມ້, ສານນິໂກຕີນ ໃນຢາສູບ 1 ກອກ ສາມາດເຮັດໃຫ້ໜູຕາຍໄດ້ 1 ໂຕ ແລະ ຖ້າສານນິໂກຕີນ ໃນຢາສູບ 20 ກອກ ສາມາດເຮັດໃຫ້ງົວຕາຍໄດ້ 1 ໂຕ.

– ຄວັນຢາສູບ ມີແກັສພິດ ໄນໂຕຣເຈນ ໄດອອກໄຊ.
– ຄວັນຟາສູບ ມີສານ ອາກເຊນິກ ທີ່ໃຊ້ເປັນຢາເບື່ອໜູ.
– ຄວັນຢາສູບ ມີສານ ທາຣ ທີ່ພາໃຫ້ເປັນມະເຮັງປອດ.
– ຄວັນຢາສູບ ມີສານ ໄນໂຕຣຊາມີນ ທີ່ພາໃຫ້ເປັນມະເຮັງ
– ຄວນຢາສູບ ມີສານ ແອມໂມເນຍ ໃຊ້ເປັນນໍ້າຢາລ້າງຫ້ອງນໍ້າ.
– ຄວັນຢາສູບ ມີສານ ຟອກໂມນ ເປັນນໍ້າຢາດອງສົບ

– ຄວັນຢາສູບ ພາໃຫ້ເປັນ ມະເຮັງປອດ.
– ຄວັນຢາສູບ ພາໃຫ້ເປັນ ມະເຮັງປາກ.
– ຄວັນຢາສູບ ພາໃຫ້ ຫົວໃຈວາຍ.
– ຄວັນຢາສູບ ພາໃຫ້ ເສັ້ນເລືອດສະໝອງແຕກ.
– ຄວັນຢາສູບ ພາໃຫ້ ແຂ້ວດຳ-ປາກເໝັນ.
– ຄວັນຢາສູບ ຂ້າຄົນອ້ອມຂ້າງ.

ເມື່ອທ່ານຮູ້ຄືຈັ່ງຊີ້ແລ້ວ ທ່ານຈະຍັງສູບຢາຢູ່ອີກບໍ?