ຄືດັ່ງທີ່ເຮົາຮູ້ນຳກັນແລ້ວວ່າ ບັນຫາອາຊະຍາກຳເກີດຂຶ້ນຕາມທ້ອງຖະໜົນນັບມື້ຫຼາຍຂຶ້ນ ພວກໂຈນດຶງກະເປົາ, ພວກຫາລັກເຄື່ອງ, ປຸ້ນຈີ້ຊິງຊັບ ແລະລັກລົດ ສ່ວນຫຼວງຫຼາຍລ້ວນແຕ່ໃຊ້ລົດທີ່ບໍ່ມີແຜ່ນປ້າຍທະບຽນ (ອາດຈະເປັນລົດທີ່ມີປ້າຍ ແຕ່ເອົາອອກໄວ້ກໍໄດ້) ເພາະຈະເຮັດໃຫ້ຫຍຸ້ງຍາກໃນການນຳຈັບໂຕ ຫຼືຄວາມເປັນໄປໄດ້ໃນການເອົາໂຕລອດຂອງໂຈນມີຫຼາຍຂຶ້ນ.
ຮູ້ດັ່ງນີ້ແລ້ວຍັງຈະປ່ອຍໃຫ້ມີລົດທີ່ບໍ່ຕິດປ້າຍແລ່ນຕາມທ້ອງຖະໜົນໄດ້ຢ່າງສະບາຍຢູ່ບໍ? ເປັນຫຍັງເຮົາບໍ່ກຳນົດວ່າ ລົດທີ່ບໍ່ຕິດປ້າຍແມ່ນລົດຜິດກົດໝາຍ ທີ່ເຈົ້າໜ້າທີ່ສາມາດຈັບຢຶດໄວ້ເລີຍ.
ແນ່ນອນ, ລົດທີ່ບໍ່ໄດ້ຕິດປ້າຍຫຼາຍຄັນກໍບໍ່ແມ່ນລົດຂອງກຸ່ມຄົນບໍ່ດີ ແຕ່ຈະເປັນການດີທີ່ສຸດຖ້າກຳນົດແລະເຄັ່ງຄັດທີ່ສຸດວ່າ ຫ້າມລົດທີ່ບໍ່ມີປ້າຍແລ່ນຕາມທ້ອງຖະໜົນ ຄືນັບແຕ່ອອກຈາກຮ້ານຊື້-ຂາຍລົດຕ້ອງຕິດປ້າຍກ່ອນ ຈະເປັນປ້າຍຖາວອນຫຼືຊົ່ວຄາວກໍໄດ້ ທັງນີ້ກໍເພື່ອເຮັດໃຫ້ສິ່ງຫຍໍ້ທໍ້ທັງຫຼາຍທີ່ມັກເກີດຂຶ້ນປິ່ນອ້ອມທ້ອງຖະໜົນຫຼຸດໜ້ອຍຖອຍລົງ ແລະກາຍເປັນຖະໜົນຫົນທາງທີ່ປອດໄພ ຖືກລະບຽບຫຼາຍຂຶ້ນ.