ຕາມການລາຍງານຂອງໜ່ວຍກູ້ໄພ ມູນນິທິຊ່ວຍເຫຼືອຄົນທຸກຍາກແຫ່ງ ສປປ ລາວ ບອກວ່າ ວັນທີ 28 ພຶດສະພາ 2017 ເວລາປະມານ 18:40 ນາທີ ໜ່ວຍກູ້ໄພໄດ້ຮັບແຈ້ງເຫດວ່າມີລົດເມທີ່ຈອດໄວ້ແລ້ວລະເບີດຂຶ້ນ ເຊິ່ງແຮງລະເບີດຖືກບ້ານປະຊາຊົນ ເຫດເກີດທີ່ບ້ານດົງບັງ ເມືອງໄຊທານີ ນະຄອນຫຼວງວຽງຈັນ.
ໜ່ວຍກູ້ໄພຈຶ່ງໄດ້ຮີບຮ້ອນເຂົ້າໄປຊ່ວຍເຫຼືອ ແລະໄດ້ພົບເຫັນລົດເມ 1 ຄັນກຳລັງລຸກໄໝ້, ມີຜູ້ບາດເຈັບ 3 ຄົນຖືກໄຟລວກ ແລະເສຍຊີວິດ 1 ຄົນ (ເປັນຄົນຂັບ) ເພດຊາຍ ອາຍຸ 42 ປີ ສັນຊາດຫວຽດນາມ ເຊິ່ງຖືກໄຟໄໝ້ທົ່ວຕົນໂຕ.
ໜ່ວຍກູ້ໄພມູນນິທິ1623 ແລະ ໜ່ວຍສະກັດກັ້ນຕ້ານອັກຄີໄພນະຄອນຫຼວງ ໄດ້ຊ່ວຍກັນຄວບຄຸມເພີງໂດຍໃຊ້ເວລາປະມານ 50ນາທີ ຈຶ່ງສຳເລັດ.
ຕາມການບອກເລົ່າຂອງປະຊາຊົນໃຫ້ຮູ້ວ່າ ເປັນລົດເມຂອງຄົນຫວຽດນາມ ເຊິ່ງໄດ້ເກີດລະເບີດຂຶ້ນຢ່າງແຮງ ຈົນໄດ້ຍິນໄປໄລຍະໄກ ສ່ວນສາເຫດທີ່ແທ້ຈິງຂອງເຫດໃນຄັ້ງນີ້ແມ່ນເຈົ້າໜ້າທີ່ກຳລັງສືບສວນຢູ່.
ແຫຼ່ງຂ່າວ: ໜ່ວຍກູ້ໄພມູນນິທິຊ່ວຍເຫຼືອຄົນທຸກຍາກ