ໃນໄລຍະທີ່ຜ່ານມາ ປະຊາຊົນໃນນະຄອນຫຼວງວຽງຈັນ ໄດ້ເຫັນຜູ້ຍິງໄວກາງຄົນຜູ້ໜຶ່ງຍ່າງເລາະໄປຕາມທາງ ເຂົ້າເຮືອນນີ້ ຂຶ້ນເຮືອນນີ້ ໂດຍບອກວ່າຕົນເອງເດິນທາງມາແຕ່ທາງເໜືອ ມາຊອກຫາລູກສາວຂອງຕົນເອງທີ່ຫາຍໂຕໄປ ແລະບອກວ່າຕົນເອງບໍ່ມີເງິນຊິຈ້າງລົດກັບ ຜູ້ພົບເຫັນສ່ວນຫຼາຍເກີດຄວາມສົງສານ ຈຶ່ງໄດ້ເອົາເງິນໃຫ້ຜູ້ກ່ຽວໜ້ອຍແດ່ ຫຼາຍແດ່ ຕາມກຳລັງແຕ່ລະຄົນ.
ແຕ່ແລ້ວ ເມື່ອສັງຄົມອອນລາຍໄດ້ຊ່ວຍກັນປະກາດຫາຜູ້ຄົນໃນຮູບທີ່ຜູ້ກ່ຽວຖືໄປນັ້ນ ສຸດທ້າຍຈຶ່ງມີຜູ້ໃຊ້ເຟສບຸກຜູ້ໜຶ່ງໄດ້ອອກມາບອກວ່າ ຕົນເອງເປັນບຸກຄົນໃນຮູບ ແຕ່ວ່າຕົນເອງບໍ່ໄດ້ຫາຍໂຕໄປໃສ ຢູ່ບ້ານເປັນປົກກະຕິ ແລະເວົ້າວ່າແມ່ຂອງຕົນເສຍໄປແລ້ວຕັ້ງແຕ່ຍັງນ້ອຍ ແລະຜູ້ທີ່ສະແດງຕົນເອງວ່າເປັນແມ່ຊອກຫາລູກນັ້ນ ກໍບໍ່ແມ່ນແມ່ຂອງຕົນເອງ.
ເມື່ອຮູ້ຈັ່ງຊັ້ນຜູ້ຄົນທີ່ຖືກຫຼອກຕ່າງກໍອອກມາສະແດງຕົນວ່າເຄີຍພົບພໍ້ແລະໃຫ້ຄວາມຊ່ວຍເຫຼືອຜູ້ກ່ຽວ ແລະເປີດເຜີຍເຖິງພຶດຕິກຳຂອງຜູ້ກ່ຽວທີ່ຕາມຫາລູກ ບາງເທື່ອຜູ້ກ່ຽວເວົ້າວ່າລູກມາຮຽນຢູ່ວຽງ, ບາງເທື່ອຜູ້ກ່ຽວກໍເວົ້າວ່າລູກມາເຮັດວຽກ ແລະທຸກເທື່ອຜູ້ກ່ຽວກໍຈະຂໍເງິນເພື່ອຈ້າງລົດກັບບ້ານ.
ແຫຼ່ງຂ່າວ: ປະຊາຊົນ