ໃນ​ຕອນ​ບ່າຍ​ ຂອງ​ວັນ​ທີ 18 ພຶດສະພາ 2017 ນີ້ ທີ່​ຫໍ​ສະພາ​ແຫ່ງ​ຊາດ ກອງ​ປະຊຸມ​ສະ​ໄໝ​ສາມັນ ​ເທື່ອ​ທີ 3 ຂອງ​ສະພາ​ແຫ່ງ​ຊາດ ຊຸດ​ທີVIII ​ໄດ້​ອັດ​ລົງ​ດ້ວຍ​ຜົນສຳ​ເລັດ ​ອັນ​ຈົບງາມ ​ໂດຍ​ການ​ເຂົ້າຮ່ວມ​ ຂອງ​ທ່ານ ບຸນ​ຍັງ ວໍລະ​ຈິດ ປະທານ​ປະ​ເທດ ​ແຫ່ງ ສປປ ລາວ ພ້ອມ​ດ້ວຍ​ຜູ້ນຳ ​ພັກ-ລັດ, ອະ​ດີດກາ​ນນຳ​ຂັ້ນ​ສູງ ​ແລະ ສະມາຊິກ​ສະພາ​ແຫ່ງ​ຊາດ ​ເຂົ້າ​ຮ່ວມ. ກອງ​ປະຊຸມ​ດັ່ງກ່າວ, ​​ໄດ້​ດຳ​ເນີນ​ແຕ່​ວັນ​ທີ 25 ​ເມສາ-18 ພຶດສະພາ 2017, ໄດ້​ພິຈາລະນາ ​ແລະ ຮັບຮອງ​ເອົາ​ກົດໝາຍ 14 ສະບັບ ​ໃນ​ຂົງ​ເຂດ ​ເສດຖະກິດ-ສັງຄົມ, ການ​ປ້ອງ​ກັນຊາ​ດ-ປ້ອງ​ກັນ​ຄວາມ​ສະຫງົບ, ການ​ປົກຄອງ ແລະ ຍຸຕິ​ທຳ, ​ອົງການ​ຈັດ​ຕັ້ງມະຫາຊົນ ​ແລະ ການ​ຕ່າງປະ​ເທດ ​ເຊິ່ງ​ເປັນ​ການ​ ເພີ່ມ​ເຄື່ອງ​ມື​ຄຸ້ມ​ຄອງ​ລັດ, ຄຸ້ມ​ຄອງ​ ເສດຖະກິດ-ສັງຄົມ ​ໃນ​ຂະ​ແໜງການ​ຕ່າງ​ໆ ​ໃຫ້​ມີ​ຄວາມ​ສົມບູນ​ຄົບ​ຖ້ວນ ຫລາຍ​ຂຶ້ນ​ກວ່າ​​ເກົ່າ.

ທ່ານ ນາງ ປານີ ຢາ​ທໍ່​ຕູ້ ປະທານ​ສະພາ​ແຫ່ງ​ຊາດ, ພ້ອມ​ທັງ​ເປັນ ​ປະ​ທານ​ກອງ​ປະຊຸມ​ ກ່າວ​ວ່າ: ຕະຫລອດ​ໄລຍະ 17 ວັນ ​ໃນ​ການ​ດຳ​ເນີນ​ ກອງ​ປະຊຸມ​ສະ​ໄໝ​ສາມັນ​ ເທື່ອ​ທີ 3 ຂອງ​ສະພາ​ແຫ່ງ​ຊາດ ຊຸດ​ທີ VIII ທີ່​ເຕັມ​ໄປ​ດ້ວຍ ​ບັນຍາ ກາດ​ທີ່​ສ້າງສັນ ​ແລະ ມີ​ຄວາມ​ເປັນ​​ເອກະ​ພາບ​ສູງ​ ຂອງ​ສະມາຊິກ​ສະພາ​ແຫ່ງ​ຊາດ ​ໃນ​ການ​ຄົ້ນ​ຄວ້າ, ປະກອບ​ຄຳ​ຄິດ​ເຫັນ ​ຢ່າງ​ກົງ​ໄປ​ກົງ​ມາ ຕໍ່​ບັນ​ດາ​ເນື້ອ​ໃນ ທີ່​ນຳ​ມາ​ພິຈາລະນາ ​ແລະ ​ຮັບຮອງ​ເອົາ. ກອງ​ປະຊຸມ​ດັ່ງກ່າວ​, ໄດ້​ສຳ​ເລັດ​ຕາມ​ຈຸດປະສົງ ​ແລະ ລະດັບ​ຄາດໝາຍ​ທີ່​ວາງ​ໄວ້ ​ເຊັ່ນ: ກອງປະຊຸມໄດ້ຮັບຟັງ ແລະ ພິຈາລະນາ ສະພາບການ ຈັດຕັ້ງປະຕິບັດ ແຜນພັດທະນາ ເສດຖະກິດ-ສັງຄົມ; ແຜນງົບປະມານ ແຫ່ງລັດ 6 ເດືອນຜ່ານມາ ແລະ ວຽກງານຈຸດສຸມ ທ້າຍປີ  2017; ພິຈາລະນາຮັບຮອງ ເອົາບົດລາຍງານ ກ່ຽວກັບການຄຸ້ມຄອງ ລາຄາສິນຄ້າ ແລະ ມາດຕະການ ແກ້ໄຂຈຳນວນໜຶ່ງ ເພື່ອຫລຸດຜ່ອນຜົນກະທົບ ຕໍ່ການຜະລິດ ແລະ ຊີວິດການເປັນຢູ່ ຂອງປະຊາຊົນ; ໄດ້ພິຈາລະ ນາ ເອົາບົດລາຍງານ ຂອງອົງການໄອຍະການ ປະຊາຊົນສູງສຸດ ກ່ຽວກັບການ ປະຕິບັດສິດ ສັ່ງຟ້ອງ ຄະດີອາຍາຂຶ້ນສານ ແລະ ການເຂົ້າຮ່ວມ ການດຳເນີນຄະດີແພ່ງ ຢູ່ທີ່ປະຊຸມສານ ແລະ ບົດລາຍງານ ຂອງສານປະຊາຊົນສູງສຸດ ກ່ຽວກັບການດຳເນີນຄະດີ ຢູ່ສານຂັ້ນຕົ້ນ ແລະ ສານອຸທອນ ໃນໄລຍະຜ່ານມາ, ທິດທາງປັບປຸງ ແລະ ຍົກສູງຄຸນນະ ພາບ ວຽກງານໃນຊຸມປີຕໍ່ໜ້າ; ກອງປະຊຸມ ໄດ້ພິຈາລະນາ ແລະ ເລືອກຕັ້ງເອົາທ່ານ ນາງ ວຽງທອງ ສີພັນດອນ ເປັນປະທານອົງການ ກວດສອບ ແຫ່ງລັດ ອີກສະໄໝໜຶ່ງ ຕາມການສະເໜີ ຂອງປະທານປະເທດ; ພ້ອມ​ທັງ ໄດ້ພິຈາລະນາ ​ແລະ ຮັບຮອງ​​ເອົາ​ ການສະ​ເໜີ​ແຕ່ງ​ຕັ້ງ ທ່າ​ນ ອຳ​ໄພ ຈິດ​ມາ​ນົນ ​ເປັນ​ຮອງ​ປະທານ​ ກຳມາ​ທິການ​ກົດ ໝາຍ ຕາມ​ການສະ​ເໜີ​ ຂອງ​ຄະນະ​ປະຈຳ​ ສະພາ​ແຫ່ງ​ຊາດ; ພ້ອມ​ດຽວ​ກັນ​ນີ້, ກອງ​ປະຊຸມ ​ໄດ້​ພິຈາລະນາ ​ແລະ ຮັບຮອງ​ເອົາ​ກົດໝາຍ 14 ສະບັບ ​ໃນ​ນັ້ນ​ ມີ​ກົດ​ໝາຍ​ສ້າງ​ໃໝ່ 5 ສະບັບ ຄື: ກົດໝາຍ​ວ່າ​ດ້ວຍ​ສົນທິສັນຍາ ​ແລະ ສັນຍາ​ສາກົນ, ກົດ​ໝາຍວ່າ​ດ້ວຍ ​ສິລະ​ປະການ​ສະ​ແດງ, ກົດ​ໝາຍວ່າ​ດ້ວຍ​ ການ​ປົກ​ປ້ອງ​ ຂໍ້​ມູນ​ເອ​ເລັກ​ໂຕຣນິກ, ກົດໝາຍ​ວ່າ​ດ້ວຍ​ ຄື້ນຄວາມ​ຖີ່​ວິທະຍຸ​ສື່ສານ ແລະ ປະມວນ​ກົດໝາຍ​ອາຍາ; ກົດໝາຍ​ປັງ​ປຸງ 8 ສະບັບ ​ຄື: ກົດ ໝາຍ​ວ່າ​ດ້ວຍ ​ການ​ເລືອກ​ຕັ້ງ​ສະມາຊິກ​ ສະພາ​ແຫ່ງ​ຊາດ ​ແລະ ສະພາ​ປະຊາຊົນ​ຂັ້ນ​ແຂວງ, ກົດໝາຍ​ວ່າ​ດ້ວຍ​ ຄະ ນະ​ຊາວ​ໜຸ່ມ​ປະຊາຊົນ ປະຕິວັດ​ລາວ, ກົດໝາຍ​ວ່າ​ດ້ວຍ​ໄຟຟ້າ, ກົດໝາຍ​ວ່າ​ດ້ວຍ​ ກຳລັງ​ປ້ອງ​ກັນ ​ຄວາມ​ສະຫງົບ​ປະຊາຊົນ, ກົດໝາຍ​ວ່າ​ດ້ວຍ​ ອົງການ​ໄອ​ຍະ​ການ​ປະຊາຊົນ, ກົດໝາຍ​ວ່າ​ດ້ວຍ​ ສານ​ປະຊາຊົນ, ກົດໝາຍ​ວ່າ​ດ້ວຍ​ນ້ຳ ​ແລະ ຊັບພະຍາກອນ​ນ້ຳ, ກົດໝາຍ​ວ່າ​ ດ້ວຍ​ສະຖິຕິ ​ແລະ ກົດໝາຍ​ທາ​ບທາມ 1 ສະບັບ ຄື: ປະມວນ​ກົດໝາຍ​ແພ່ງ.

ພ້ອມ​ນັ້ນ, ທ່ານ ນາງ ປານີ ຢາ​ທໍ່​ຕູ້ ກ່າວ​ຕື່ມ​ວ່າ: ກອງ​ປະຊຸມ ​ໄດ້​ເຫັນ​ດີ​ເປັນ​ເອກະ​ພາບ​ ຕໍ່​ບົດ​ລາຍ​ງານ ​ແລະ ສະ​ເໜີ​ໃຫ້​ລັດຖະບານ ​ເອົາ​ໃຈ​ໃສ່​ບາງ​ບັນຫາ ​ເຊັ່ນ: ສືບ​ຕໍ່​ຊີ້​ນຳ ​ແລະ ຊຸກຍູ້​ບັນດາ​ກະຊວງ, ອົງການ​ຂະ​ແໜງ​ການ ​ແລະ ອົງການ​ປົກຄອງ​ທ້ອງ​ຖິ່ນ​ ສູ້​ຊົນ​ປະຕິບັດ​ ບັນດາ​ຄາດໝາຍ​ລວມ, ຄາດໝາຍ​ໝາຍ​ ແຕ່​ລະ​ດ້ານ, ທິດ​ທາງ​ວຽກ​ງານ ​ແລະ ບັນດາ​ມາດ​ຕະການ ​ທີ່​ກຳນົດ​ໄວ້​ ໃນ​ມະຕິ​ກອງ​ປະຊຸມ ​ສະພາ​ແຫ່ງ​ຊາດ ​ເລກທີ 14, 15, 16/ສພຊ ລົງ​ວັນ​ທີ 24/11/2016 ​ແລະ ​ເລກທີ 18/ສພຊ ລົງ​ວັນ​ທີ 28/11/2016 ກ່ຽວ​ກັບ​ແຜນ​ພັດທະນາ ​ເສດຖະກິດ-ສັງຄົມ, ​ແຜນ​ງົບປະມາ​ນແຫ່ງ​ລັດ​ ປະຈຳ​ປີ 2017 ກໍ​ຄື​ແຜນ​ສ້າງ ​ແລະ ປັບປຸງ​ກົດໝາຍ​ ປະຈຳ​ປີ 2017 ​ແລະ ປະກາດ​ໃຊ້​ນິຕິ​ກຳ​ລຸ່ມ ​ໃຫ້​ສຳ​ເລັດ​. ພ້ອມ​ທັງ ​ຊີ້​ນຳ​ກະຊວງ ​ອຸດສາຫະກຳ ​ແລະ ການ​ຄ້າ ປະສານ​ສົມທົບ​ ກັບ​ບັນ​ດາ​ກະຊວງ ​ແລະ ພາກສ່ວນ​ທີ່​ກ່ຽວຂ້ອງ ສືບ​ຕໍ່​ຄົ້ນຄວ້າ ​ແລະ ສະ​ເໜີ​ລັດຖະບານ ​ປະກາດ​ໃຊ້​ນະ​ໂຍບາຍ, ມາດ​ຕະການ​ຊຸກຍູ້ ​ແລະ ສົ່ງ​ເສີມການ​ຜະລິດ ​ສະບຽງອາຫານ ​ແລະ ການ​ຜະລິດ​ສິນຄ້າ​ທີ່​ຈຳ​ເປັນ ​ໃຫ້​ແກ່​ການ​ບໍລິ​ໂພ​ກ ປະຈຳ​ວັນ​ຂອງ​ປະຊາ​ຊົນ ​ໃຫ້​ມີ​ການ​ຂະຫຍາຍ​ຕົວ ​ແລະ ມີ​ຄວາມ​ຫລາ​ກຫລາ​ຍ ທາງ​ການ​ຜະລິດ​ຕະພັນ ​ທີ່​ມີ​ຄຸນ​ນະພາ​ບ ດ້ວຍ​ລາຄາ​ທີ່​ເໝາະ​ສົມ ​ແລະ ໝັ້ນ​ທ່ຽງ.

ແຫລ່ງຂ່າວ: kpl.gov.la/detail.aspx?id=24549