ກອງປະຊຸມສະໄໝສາມັນ ເທື່ອທີ 2 ຂອງສະພາປະຊາຊົນ ນະຄອນຫຼວງວຽງຈັນ ຊຸດທີ V ໄດ້ດໍາເນີນມາຮອດວັນທີ 13 ພະຈິກ 2026 ໄດ້ປິດລົງດ້ວຍຜົນສໍາເລັດອັນຈົບງາມ ພາຍໃຕ້ການເປັນປະທານຂອງ ທານ ປອ. ອາດສະພັງທອງ ສີພັນດອນ ກໍາມະການສູນກາງພັກ ເລຂາຄະນະພັກ ປະທານສະພາປະຊາຊົນ ນະຄອນຫຼວງວຽງຈັນ.
ກອງປະຊຸມ ໄດ້ດຳເນີນມາເປັນເວລາ 4 ວັນ ນັບແຕ່ວັນທີ 10 ຫາ 13 ພະຈິກ 2026 ກອງປະຊຸມຄັ້ງນີ້ ໄດ້ພິຈາລະນາ ແລະ ຮັບຮອງເອົາບັນຫາສຳ ຄັນເຊັ່ນ : ໄດ້ພິຈາລະນາ, ຮັບຮອງເອົາບົດລາຍງານຂອງຄະນະກຳມະການປົກຄອງນະຄອນຫຼວງ ກ່ຽວກັບ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ 9 ເດືອນ, ຄາດຄະເນໝົດປີ 2026 ແລະ ທິດທາງແຜນການ ປະຈຳປີ 2027 ຂອງນະຄອນຫຼວງວຽງຈັນ, ໄດ້ຮັບຟັງການລາຍງານ ການຈັດຕັ້ງປະຕິບັດວາລະແຫ່ງຊາດ ການພັດທະນາຊົນນະບົດ ແລະ ແກ້ໄຂຄວາມທຸກຍາກ.

ໂດຍສະເພາະແມ່ນການສ້າງແຜນປະຕິບັດງານ ແລະ ໂຄງການ ຢູ່ນະຄອນຫຼວງວຽງຈັນ, ໄດ້ພິຈາລະນາ, ຮັບຮອງເອົາ ແຜນຜັງເທດສະບານ ເມືອງນາຊາຍທອງເມືອງ ຫາດຊາຍຟອງ ແລະ ເມືອງປາກງື່ມ, ໄດ້ຮັບຟັງການລາຍງານຊີ້ແຈງບັນຫາສໍາຄັນຕ່າງໆ ຂອງນະຄອນຫຼວງວຽງຈັນ ຈໍານວນ 3 ບັນຫາຄື : ຊີ້ແຈງກ່ຽວກັບການຈັດຕັ້ງປະຕິບັດ ແຜນຍຸດທະສາດການບໍລິຫານຈັດການຂີ້ເຫຍື້ອ ແລະ ຂໍ້ຕົກລົງວ່າດ້ວຍການຄຸ້ມຄອງ ແລະ ກໍາຈັດຂີ້ເຫຍື້ອ ໃນນະຄອນຫຼວງວຽງຈັນ, ຊີ້ແຈງກ່ຽວກັບການຈັດຕັ້ງປະຕິບັດຄຳສັ່ງເລກທີ 11/ຄລສພ,ລົງວັນທີ 07 ພຶດສະພາ 2026 ວ່າດ້ວຍການເພິ່ມທະວີຊີ້ນໍາຂອງພັກ ຕໍ່ວຽກງານແຮ່ທາດ, ການຄຸ້ມຄອງ ແລະ ແກ້ໄຂບັນຫາຫຍໍ້ທໍ້ຂົງເຂດຊັບພະຍາກອນທໍາມະຊາດ; ລາຍງານກ່ຽວກັບສະພາບການສຶກສາ ຕິດພັນກັບບັນຫາການປະລະການຮຽນຂອງນັກຮຽນຊັ້ນປະຖົມ ແລະ ຊັ້ນມັດທະຍົມ ແລະ ບັນຫາການຂາດແຄນຄູສອນຢູ່ ເມືອງສັງທອງ ແລະ ເມືອງປາກງື່ມ.
ພ້ອມນີ້ ກອງປະຊຸມ ຍັງໄດ້ພິຈາລະນາ, ຮັບຮອງເອົານິຕິກຳສ້າງໃໝ່ ຂອງນະຄອນຫຼວງວຽງຈັນ ຈໍານວນ 3 ສະບັບຄື: ຮ່າງຂໍ້ຕົກລົງ ວ່າດ້ວຍພັນທະ ແລະ ຄວາມຮັບຜິດຊອບຂອງເຈົ້າຂອງກິດຈະການໂຮງແຮມ, ຣີສອດ, ເຮືອນພັກ, ຄອນໂດມີນຽມ, ອາພັດເມັ້ນ, ເຮືອນໃຫ້ເຊົ່າ, ເຮືອນຫ້ອງແຖວ ແລະ ຜູ້ມາພັກເຊົາ ຢູ່ ນະຄອນຫຼວງວຽງຈັນ,ຮ່າງຂໍ້ຕົກລົງ ວ່າດ້ວຍການຄຸ້ມຄອງ ແລະ ການພັດທະນາສະຖານທີ່ຈອດລົດ ໃນຕົວເມືອງນະຄອນຫຼວງວຽງຈັນ; ຮ່າງຂໍ້ຕົກລົງ ວ່າດ້ວຍກອງທຶນຊ່ວຍເຫຼືອສຸກເສີນ. ໄດ້ພິຈາລະນາ, ຮັບຮອງ ເອົານິຕິກໍາສະບັບປັບປຸງ ຈໍານວນ 2 ສະບັບຄື: ຂໍ້ຕົກລົງ ວ່າດ້ວຍການປະເມີນລາຄາທີ່ດິນ ທົ່ວນະຄອນຫຼວງວຽງຈັນ (ສະບັບປັບປຸງ); ຂໍ້ຕົກລົງ ວ່າດ້ວຍການຈັດສັນຄວາມບໍ່ເປັນລະບຽບຮຽບຮ້ອຍໃນຕົວເມືອງ ແລະ ຊານເມືອງ ນະຄອນຫຼວງວຽງຈັນ (ສະບັບປັບປຸງ) ແລະ ວຽກງານອື່ນໆ.

ໃນຕະຫຼອດໄລຍະການດໍາເນີນກອງປະຊຸມຄັ້ງນີ້, ຜູ້ແທນກອງປະຊຸມໄດ້ຮັບສາຍດ່ວນຈາກປະຊາຊົນທັງໝົດ ຈໍານວນ 52 ສາຍ, ສາມາດສັງລວມຄໍາສະເໜີ ຈໍານວນ 61 ຂໍ້, ເຊິ່ງປະກອບມີບັນຫາພົ້ນເດັ່ນຄື: ບັນຫາທີ່ດິນ ແລະ ການຊົດເຊີຍ, ບັນຫາສິ່ງແວດລ້ອມ ແລະ ການຂຸດຄົ້ນ, ບັນຫາພື້ນຖານໂຄງລ່າງ ແລະ ການຄຸ້ມຄອງຕົວເມືອງ, ບັນຫາຄວາມສະຫງົບ ແລະ ຄວາມເປັນລະບຽບຮຽບຮ້ອຍ, ບັນຫາການຄຸ້ມຄອງເສດຖະກິດ ແລະ ບໍລິການລັດ, ບັນຫາຍຸຕິທຳ ແລະ ລະບຽບກົດໝາຍ ພ້ອມນີ້ ກໍໄດ້ນໍາສົ່ງໃຫ້ ຄະນະກໍາມະການປົກຄອງ ນະຄອນຫຼວງວຽງຈັນ ກໍຄື ຄະນະຮັບຜິດຊອບ ໄດ້ນໍາໄປຄົ້ນຄວ້າ, ແກ້ໄຂ ຫຼື ຫາກບັນຫາໃດໄດ້ຮັບການແກ້ໄຂແລ້ວ ກໍສະເໜີໃຫ້ມີການຊີ້ແຈງໃຫ້ຄວາມກະຈ່າງ.
ຜົນສຳເລັດຂອງກອງປະຊຸມສະໄໝສາມັນເທື່ອທີ 2 ຂອງສະພາປະຊາຊົນ ນະຄອນຫຼວງວຽງຈັນ ຊຸດທີ 5 ຄັ້ງນີ້ ແມ່ນໝາກຜົນແຫ່ງການສຸມສະຕິປັນຍາຮ່ວມກັນ.
ທີ່ມາ: Vte9 Channel

