ເພື່ອໃຫ້ບັນລຸໄດ້ຕາມ ແຜນການຄາດຄະເນຂອງປີ 2017 ແລະ ສາມາດສູ້ຊົນຈັດເກັບລາຍຮັບ ໃຫ້ໄດ້ເພີ່ມຂຶ້ນ ແມ່ນຈະໄດ້ດຳເນີນ ມາດຕະການ ທາງດ້ານລາຍຮັບ ໃຫ້ມີຄວາມເຂັ້ມງວດ, ທັນສະພາບການ ແລະ ມີປະສິດທິຜົນ. ພ້ອມທັງ, ດຳເນີນມາດຕະການ ທາງດ້ານລາຍຈ່າຍ ໃຫ້ມີຄວາມຮັດກຸມ ແລະ ເອົາໃຈໃສ່ຕໍ່ການ ປະຕິບັດນະໂຍບາຍ ປະຢັດມັດທະຍັດ ໃຫ້ເປັນຮູບປະທຳ. ເຊິ່ງເມື່ອບໍ່ດົນມານີ້, ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນ ຕີ ກະຊວງການເງິນ ໄດ້ສະເໜີຕໍ່ ກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ VIII ກ່ຽວກັບການຄາດຄະເນ ທິດທາງແຜນງົບປະມານ ໝົດປີ 2017 ທີ່ຈະຕ້ອງໄດ້ວາງ ມາດຕະການສຳຄັນ ທາງດ້ານລາຍຈ່າຍງົບປະມານ.
ເຊິ່ງທ່ານ ສົມດີ ດວງດີ ໄດ້ສະເໜີໃຫ້ຮູ້ວ່າ: ຕ້ອງຈັດຕັ້ງປະຕິບັດ ມາດຕະການປະຢັດ ແລະ ຕ້ານການຟູມເຟືອຍ ຕາມລຳດັດ ຂອງນາຍົກລັດຖະມົນຕີ ວາງອອກຢ່າງເຂັ້ມງວດ ແລະ ມີປະສິດທິຜົນສູງ ຕາມຄຳສັ່ງຂອງ ນາຍົກລັດຖະມົນຕີ ກ່ຽວກັບການປະຢັດ ການນຳໃຊ້ ງົບປະມານຂອງລັດ; ສືບຕໍ່ເຂັ້ມງວດ ໃນການກວດກາ, ການສະເໜີ ຂໍເບີກຈ່າຍບໍລິຫານ, ລາຍຈ່າຍດັດສົມ ແລະ ລາຍຈ່າຍຊື້ໃໝ່ ໃຫ້ມີປະສິດທິຜົນ ເຊັ່ນ: ຄ່ານ້ຳປະປາ ແລະ ຄ່າໄຟຟ້າ ຕ້ອງພຽງພໍກັບ ການນຳໃຊ້ຕົວຈິງ ເພື່ອບໍ່ໃຫ້ເກີດເປັນໜີ້ສະສົມ, ສ່ວນການຈັດກອງປະຊຸມ, ການຈັດງານລ້ຽງ, ການຮັບແຂກ, ການເດີນທາງ ໄປວຽກທາງການ ພາຍໃນ ແລະ ຕ່າງປະເທດ, ການຈັດຊື້ພາຫະນະ, ເຄື່ອງໃຊ້ຫ້ອງການ ແລະ ອື່ນໆ ຖ້າເຫັນວ່າລາຍຈ່າຍຮ່ວງໃດມີລາຄາສູງ ເກີນຄວາມເປັນຈິງ, ບໍ່ມີຄວາມຈຳເປັນ ກໍຈະບໍ່ໄດ້ຮັບການອະນຸມັດ; ປະສານສົມທົບກັບ ກະຊວງພາຍໃນ ແລະ ພາກສ່ວນກ່ຽວຂ້ອງ ດຳເນີນການກວດກາ ຈຳນວນພົນພະນັກງານ-ລັດຖະກອນ ໃນຂອບເຂດທົ່ວປະເທດ ເພື່ອເປັນບ່ອນອີງໃນການຄິດໄລ່ ລາຍຈ່າຍເງິນເດືອນ ແລະ ເງິນອຸດໜູນ ໃຫ້ຖືກຕ້ອງ ແລະ ຊັດເຈນຕາມຄວາມເປັນຈິງ; ປະສານສົບທົບກັບ ກະຊວງປ້ອງກັນຄວາມສະຫງົບ ຄົ້ນຄວ້າຫັນການເບີກຈ່າຍເງິນເດືອນ ແລະ ເງິນອຸດໜູນ ໃຫ້ແກ່ພະນັກງານບໍລິຫານ ແລະ ບາງກຳລັງຕາມເງື່ອນໄຂຕົວຈິງ ໃນການເບີກຈ່າຍຜ່ານບັດ ATM ເພື່ອສ້າງຄວາມໂປ່ງໃສ; ເອົາໃຈໃສ່ການກວດກາ ຫລັງການຈ່າຍຢ່າງເຄັ່ງຄັດ ໂດຍແຕ່ງຕັ້ງຄະນະ ລົງກວດກາຢູ່ບັນດາແຂວງ ແລະ ເມືອງ ເພື່ອເຮັດໃຫ້ການນຳໃຊ້ ງົບປະມານຖືກເປົ້າໝາຍ ແລະ ມີປະສິດທິຜົນສູງ; ປະສານສົບທົບກັບກະຊວງແຜນການ ແລະ ການລົງທຶນ ໃນການແຕ່ງຕັ້ງຄະນະ ລົງກວດການບັນດາ ໂຄງການລົງທຶນຂອງລັດ ທີ່ມີມູນຄ່າ 50 ຕື້ກີບຂຶ້ນໄປ ເພື່ອກວດກາຄືນ ການຄິດໄລ່ມູນຄ່າໂຄງການ ໃຫ້ສອດຄ່ອງກັບລາຄາຕົວຈິງ, ພ້ອມນັ້ນ ຖ້າເຫັນວ່າໂຄງການ ບໍ່ມີຄວາມຄືບໜ້າ ຫລື ບໍ່ມີປະສິດທິຜົນ ກໍສະເໜີໂຈະໂຄງການດັ່ງກ່າວ ເພື່ອຫລຸດຜ່ອນລາຍຈ່າຍໜີ້ສິນ ຂອງລັດຖະບານ; ປະສານສົບທົບກັບ ກະຊວງພາຍໃນ ເພື່ອຕັ້ງໜ້າປະຕິບັດຄຳສັ່ງ ຂອງນາຍົກລັດຖະມົນຕີ ສະ ບັບເລກທີ 55/ນຍ ວ່າດ້ວຍການຄຸ້ມຄອງ ການເບີກຈ່າຍເງິນເດືອນ, ເງິນອຸດໜູນ ແລະ ເງິນນະໂຍບາຍ ໂດຍສະເພາະ ການເບີກຈ່າຍຕົວຈິງຢູ່ຂັ້ນເມືອງ ແລະ ຢູ່ຂະແໜງການ ທີ່ມີຈຳນວນພົນຫລາຍເຊັ່ນ: ສຶກສາ, ສາທາ ແລະ ອື່ນໆ ເພື່ອຕັດຮອນ ຂັ້ນຕອນ ການຈັດຕັ້ງປະຕິບັດ ໃຫ້ກະທັດຮັດ ແລະ ວ່ອງໄວກວ່າເກົ່າ; ພ້ອມທັງກວດກາຄືນ ບາງຮ່ວງລາຍຈ່າຍ ທີ່ຂຶ້ນແຜນ ບໍ່ສອດຄ່ອງກັບຄວາມເປັນຈິງ ເປັນຕົ້ນແມ່ນ ລາຍຈ່າຍເງິນເດືອນ ແລະ ເງິນນະໂຍບາຍ ທີ່ເຫັນວ່າການສະເໜີແຜນ ເກີນຄວາມຕ້ອງການຈ່າຍຕົວຈິງ, ລາຍຈ່າຍບໍລິຫານ ແລະ ລາຍຈ່າຍດັດສົມ ທີ່ຂຶ້ນແຜນ ມີລັກສະນະຊ້ຳຊ້ອນກັນ ເພື່ອຫລຸດຜ່ອນການ ຂາດດຸນງົບປະມານ ແລະ ແຕ່ງຕັ້ງຄະນະປະສານງານກັບ ທະນາຄານ ແຫ່ງ ສປປ ລາວ ຢ່າງເປັນປົກກະຕິ ເພື່ອຄົ້ນຄວ້າກົນໄກ ແລະ ມາດຕະການລະດົມ ແຫລ່ງດຸ່ນດ່ຽງງົບປະມານ ໃຫ້ໄດ້ຕາມແຜນ.
ທ່ານ ສົມດີ ດວງດີ ຍັງໃຫ້ຮູ້ຕື່ມອີກວ່າ: ສຳລັບທິດທາງການສ້າງແຜນ ງົບປະມານແຫ່ງລັດ ປີ 2018 ກະຊວງການເງິນ ຈະໄດ້ເອົາໃຈໃສ່ ເລັ່ງຄົ້ນຄວ້າຮ່າງຄຳແນະນຳ ວ່າດ້ວຍການສ້າງແຜນ ງົບປະມານແຫ່ງລັດ ປີ 2018 ໂດຍລົງເລິກປຶກສາຫາລື ບາງບັນຫາທີ່ຈະຕ້ອງ ໄດ້ປັບປຸງແກ້ໄຂ ໃຫ້ມີຄວາມຄ່ອງຄົວ ແລະ ຫັນເຂົ້າສູ່ກົດໝາຍ ແລະ ລະບຽບການຢ່າງເຄັ່ງຄັດ ເປັນຕົ້ນແມ່ນ ການສ້າງແຜນ ລາຍຮັບ-ລາຍຈ່າຍ ວິຊາການ, ແຜນການລົງທຶນຂອງລັດ, ການສ້າງແຜນເປັນ ລາຍລະອຽດແຕ່ຫົວທີ່ ໂດຍຈະຕ້ອງຈັດສັນເພດານ ງົບປະມານເບື້ອງຕົ້ນ ໃຫ້ບັນດາຂະແໜງການ ແລະ ທ້ອງຖິ່ນ ສືບຕໍ່ປະສານສົບທົບກັບ ກຳມະທິການແຫ່ງຊາດ, ສະພາປະຊາຊົນຂັ້ນແຂວງ ແລະ ຂະແໜງການກ່ຽວຂ້ອງ ໃນການຈັດສັນລະອຽດ ເພື່ອຮັບປະກັນ ໃຫ້ສາມາດລາຍງານ ຂໍກັບການຮັບຮອງ ຈາກສະພາປະຊາຊົນຂັ້ນແຂວງ, ສະພາແຫ່ງຊາດຢ່າງ ລະອຽດ, ຊັດເຈນ ແລະ ທັນເວລາຕາມກຳນົດ.
ແຫຼ່ງຂ່າວ: www.kpl.gov.la/detail.aspx?id=24509