ເວັບໄຊຂ່າວ ມະຕິຊົນອອນໄລນ໌ ແລະ ສຳນັກຂ່າວບິບິຊີລາຍງານ ທ່ານ ເອັມມານູເອລ ມາຄົງ ວ່າທີ່ປະທານາທິບໍດີຄົນໃໝ່ຂອງປະເທດ ຝຣັ່ງ ຮ່ວມປະຕິ ບັດພາລະກິດຄຽງຄູ່ກັບປະທານາທິບໍດີ ຟຣອງຊົວສ໌ ໂອລອງ ທີ່ກຳລັງຈະໝົດວາລະຈາກຕຳແໜ່ງ ໃນການວາງພວງມາລາທີ່ປະຕູໄຊຝຣັ່ງ ໃນນະຄອນຫຼວງ ປາຣີສ ເຊິ່ງເປັນອານຸສາວະລີສະດຸດີທະຫານນິລະນາມທີ່ສະຫຼະຊີວິດໃນສົງຄາມ ໃນວະລະຄົບຮອບ 72 ປີ ຂອງການສິ້ນສຸດສົງຄາມໂລກຄັ້ງທີ 2 ເມື່ອຕອນເຊົ້າວັນຈັນທີ 8 ພຶດສະພາ ຕາມເວລາທ້ອງຖິ່ນ ເຊິ່ງມີຂຶ້ນຫຼັງຈາກ ທ່ານ ມາຄົງ ຫາກໍ່ໄດ້ຮັບໄຊຊະນະຈາກການເລືອກຕັ້ງປະທານາທິບໍດີໄປເມື່ອວັນອາທິດທີ 7 ພຶດສະພາ 2017 ທີ່ຜ່ານມາ ເຊິ່ງໄຊຊະນະໃນຄັ້ງນີ້ ເຮັດໃຫ້ ທ່ານ ມາຄົງ ກາຍເປັນປະທານາທິບໍດີຝຣັ່ງທີ່ມີອາຍຸນ້ອຍທີ່ສຸດຂອງຝຣັ່ງນັບຈາກ ໂປລຽນ ໂບນາປາຣ

ດ້ານປະທານາທິບໍດີ ໂອລອງ ປະກາດໃນວັນດຽວກັນນີ້ວ່າ ທ່ານ ມາຄົງຈະສາບານຕົນເພື່ອຮັບຕຳແໜ່ງປະທານາທິບໍດີຝຣັ່ງຄົນຕໍ່ໄປໃນພິທີທີ່ຈະເກີດຂຶ້ນທີ່ທຳນຽບ ເອລິເຊ ໃນວັນອາທິດທີ 14 ພຶດສະພາທີ່ໃກ້ຈະມາຮອດນີ້