ເຟສບຸກຂ່າວສານປະເທດລາຍເປີດເຜີຍເມື່ອວັນທີ 5 ພຶດສະພາ 2017 ນີ້ວ່າ ລັດຖະບານລາວປະຕິເສດຫາງສຽງໃນສື່ສັງຄົມອອນລາຍອ້າງວ່າການສະຫງວນເນື້ອທີ່ດິນເບື້ອງລະ 50 ແມັດຕາມແລວເສັ້ນທາງລົດໄຟໃນໂຄງການກໍ່ສ້າງເສັ້ນທາງລົດໄຟລາວ-ຈີນເພື່ອມອບໃຫ້ຈີນນັ້ນບໍ່ມີມູນຄວາມຈິງ ແລະ ເປັນພຽງການສ້າງກະແສຂ່າວໃຫ້ສັງຄົມມີຄວາມສັບສົນ ຂະນະທີ່ຂະບວນການກໍ່ສ້າງເສັ້ນທາງລົດດັ່ງກ່າວແມ່ນໄດ້ຮັບການຈັດຕັ້ງປະຕິບັດຕາມມາດຕະຖານສາກົນ ແລະ ຮັບໃຊ້ຜົນປະໂຫຍດຂອງປະຊາຊົນລາວບັນດາເຜົ່າຢ່າງແທ້ຈິງ.
ທ່ານ ລັດຕະນະມະນີ ຄູນນີວົງ ຮອງລັດຖະມົນຕີ ກະຊວງໂຍທາທິການ ແລະ ຂົນສົ່ງໄດ້ຢືນຢັນຕໍ່ສື່ມວນຊົນລາວໃນອາທິດນີ້ວ່າ: ການກໍ່ສ້າງເສັ້ນທາງລົດໄຟລາວ-ຈີນນັ້ນໄດ້ຈັດຕັ້ງປະຕິບັດຕາມຂັ້ນຕອນທີ່ມີຄວາມເປັນເອກະພາບ, ໂປ່ງໃສ, ຍຸຕິທໍາ ແລະ ກວດສອບໄດ້ບົນພື້ນຖານຕ່າງຝ່າຍຕ່າງມີຜົນປະໂຫຍດຮ່ວມກັນ ສະນັ້ນ ການສະຫງວນດິນໄວ້ 50 ແມັດໃນແຕ່ລະເບື້ອງຂອງທາງລົດໄຟໃນບາງເຂດ ແລະ ບາງເຂດກໍໄດ້ສະຫງວນພຽງໄວ້ 20 ແມັດສໍາລັບເຂດຜ່ອນຄວາມໄວນັ້ນແມ່ນປະຕິບັດຕາມມາດຕະຖານສາກົນຢ່າງຄັກແນ່ ດ້ວຍຄວາມຮັບຜິດຊອບສູງເພື່ອຜົນປະໂຫຍດສ່ວນລວມຂອງຊາດ ແລະ ລັດຖະບານລາວກໍບໍ່ໄດ້ມີເຈດຕະນາຈະເອົາດິນສະຫງວນໄວ້ສອງເບື້ອງຂອງທາງລົດໄຟດັ່ງກ່າວໃຫ້ຈີນ ຫລື ບໍລິສັດໃດໆທັງນັ້ນ. ຕໍ່ບັນດາດັ່ງກ່າວຂໍໃຫ້ບັນດາທ່ານທຸກພາກສ່ວນ ແລະ ພໍ່ແມ່ປະຊາຊົນເຂົ້າໃຈຢ່າງເລິກເຊິ່ງ ພ້ອມໃຫ້ເພີ່ມສະຕິ ແລະ ພິຈາລະນາຢ່າງຮອບຄອບໃນການບໍລິໂພກສື່ສັງຄົມອອນລາຍຕ່າງໆຢ່າງລະມັດລະວັງ ລວມທັງຕີຖອຍຂອງບາງກຸ່ມຄົນບໍ່ດີທີ່ສ້າງກະແສຂ່າວ ແລະ ບິດເບືອນຄວາມຈິງເຮັດໃຫ້ສັງຄົມສັບສົນ. ແນວໃດກໍດີ ລັດຖະບານຍັງອະນຸຍາດໃຫ້ພໍ່ແມ່ປະຊາຊົນລາວບັນດາເຜົ່າສາມາດດໍາເນີນການຜະລິດຢູ່ເຂດບໍລິເວນເສັ້ນທາງລົດໄຟອີກດ້ວຍຕາມເງື່ອນເໝາະສົມເປັນຕົ້ນຢູ່ກ້ອງຂົວ ແລະ ອື່ນໆ.
ຮຽບຮຽງຂ່າວໂດຍ: ຮັກຊາດ