ສຳນັກຂ່າວຕ່າງປະເທດລາຍງານຈາກນະຄອນຫຼວງສະຕອກໂຮມ ປະເທດສະວີເດນ ເມື່ອວັນທີ 24 ເມສາ 2017 ນີ້ວ່າ ສະຖາບັນວິໄຈສັນຕິພາບນານາຊາດສະຕອກໂຮມ (ຊີປຣິ) ເຜີຍແຜ່ລາຍງານຖານຂໍ້ມູນກ່ຽວກັບງົບປະມານທາງທະຫານຂອງແຕ່ລະປະເທດໃນຮອບປະຈຳປີ 2016 ວ່າສະຫະລັດຍັງຄອງອັນດັບທີ 1 ດ້ວຍສະຖິຕິການໃຊ້ຈ່າຍງົບເຂົ້າໃນທາງທະຫານສູງເຖິງ 611,000 ລ້ານໂດລາ ເພີ່ມຂຶ້ນ 1.7% ຈາກປີ 2015 ແລະ ເປັນອັດຕາສ່ວນສູງທີ່ສຸດຕັ້ງແຕ່ປີ 2010 ສົ່ງສັນຍານອາດເປັນການສິ້ນສຸດຍຸກແຫ່ງການຄວບຄຸມງົບປະມານທາງການທະຫານຂອງລັດຖະບານວໍຊິງຕັນ ຈາກປີ 2008 ແລະ ປັດຈຸບັນນີ້ປະທານາທິບໍດີໂດນັລ ທຣັມ ໄດ້ສະເໜີເພີ່ມງົບປະມານທາງທະຫານໃນປີ 2017 ນີ້ອີກເປັນ 54% ແລ້ວ

ຂະນະທີ່ອັນທີ 2 ຕົກເປັນຈີນ ເຊິ່ງມີສະຖິຕິໃຊ້ຈ່າຍທາງການທະຫານເພີ່ມຂຶ້ນ 5.4% ຕົກເປັນງົບປະມານ 215,000 ລ້ານໂດລາ ຖືເປັນອັນດັບທີ 1 ຂອງທະວີບອາຊີ ຫຼາຍກວ່າງົບປະມານທາງການທະຫານຂອງອິນເດຍເກືອບ 4 ເທົ່າ

ຣັດເຊຍຢູ່ໃນອັນດັບທີ 3 ດ້ວຍສະຖິຕິ 69,200 ລ້ານໂດລາ ເພີ່ມຂຶ້ນ 5.9% ຈາກສະຖິຕິຂອງປີ 2015 ແລະ ຄິດເປັນ 5.3% ຂອງຜະລິດຕະພັນລວມໃນປະເທດ (ຈີດີພີ) ຖືເປັນອັດຕາສ່ວນທີ່ຫຼາຍທີ່ສຸດນັບຕັ້ງແຕ່ການລົ້ມລະລາຍຂອງສະຫະພາບໂຊວຽດ ເມື່ອປີ 1992 ນອກຈາກນີ້ຍັງຖືເປັນສະຖິຕິເພີ່ມຂຶ້ນເປັນປີທີ 2 ຕິດຕໍ່ກັນ